ପାତ୍ରପୁର,୧୭/୫ : ଜରଡ଼ା ଥାନା ପାତ୍ରପୁର ବ୍ଲକ ଆଦିବାସୀ ଅଧ୍ୟୁଷିତ ଆଙ୍କୁଲି ପଞ୍ଚାୟତର ଜଣେ ୧୫ବର୍ଷୀୟା ନାବାଳିକା ଦୁଷ୍କର୍ମର ଶିକାର ହୋଇ ୮ମାସର ଗର୍ଭବତୀ ହୋଇଛନ୍ତି । ପରିବାର ଲୋକଙ୍କ ତରଫରୁ ଏ ନେଇ ଜରଡ଼ା ଥାନାରେ ଲିଖିତ ଅଭିଯୋଗ ହୋଇଛି । ପୋଲିସ ଏକ ଦୁଷ୍କର୍ମ ମାମଲା ରୁଜୁ ହୋଇ ଅଭିଯୁକ୍ତ ବେଲାଳସେନ ବିଷୋୟୀକୁ ଗିରଫ ପରେ କୋର୍ଟଚାଲାଣ କରିଛି । ଉଭୟ ପୀଡ଼ିତା ଓ ଅଭିଯୁକ୍ତର ଡାକ୍ତରୀ ମଇନା କରାଯାଇଛି । ଅଭିଯୁକ୍ତର ଜାମିନ ଖାରଜ ପରେ ତାକୁ ଜେଲ ହାଜତ ପଠେଇ ଦିଆଯାଇଥିବାବେଳେ ପୀଡ଼ିତା ନାବାଳିକାକୁ ବ୍ରହ୍ମପୁରର ଏକ ବାଳାଶ୍ରମରେ ଅବସ୍ଥାପିତ କରାଯାଇଛି ।
ନାବାଳିକା ଜଣକ ୮ମାସର ଗର୍ଭବତୀ ଥିବାରୁ ଡିଏନଏ ପାଇଁ ନମୂନା ପଠାଯାଇଛି । ଜରଡ଼ା ଥାନା ଖାରିଆଗୁଡା ଫାଣ୍ଡି ଅଧିକାରୀ ସମୀର ଜୟସିଂଙ୍କଠାରୁ ମିଳିଥିବା ସୂଚନା ଅନୁସାରେ ଜରଡ଼ା ଥାନା ଆଙ୍କୁଲି ପଂଚାୟତର ଜଣେ ୧୫ବର୍ଷୀୟା ନାବାଳିକାଙ୍କୁ ଉକ୍ତ ପଂଚାୟତ ଅନ୍ତର୍ଗତ ଗଡ଼ଙ୍ଗ ଗ୍ରାମର ବେଲାଳସେନ ବିଷୋୟୀ ନାମକ ବ୍ୟକ୍ତି ବିଭିନ୍ନ ଉପାୟରେ ଶାରୀରିକ ସମ୍ପର୍କ ରଖି ଆସୁଥିଲେ । ନାବାଳିକା ଗର୍ଭବତୀ ଥିବା ଖବର ପ୍ରଘଟ ପରେ ଅଂଚଳର ଭଦ୍ରବ୍ୟକ୍ତିଙ୍କ ଜରିଆରେ ଆଲୋଚନା ବି ହୋଇଥିଲା ।
ଅଭିଯୁକ୍ତ ସେଇଠି ସବୁ କଥାକୁ ଅମାନ୍ୟ କରିଥିଲା ଓ ବିଭିନ୍ନ ଧମକ ଚମକ ମଧ୍ୟ ଦେଇଥିଲା । ପୋଲିସ ଆଗରେ ନାବାଳିକା ଦେଇଥିବା ବୟାନ ଅନୁସାରେ ତା’ସହିତ ଅଭିଯୁକ୍ତ ୪ଥର ସମ୍ପର୍କ ରଖିଛି । ନାବାଳିକାର ବାପାଙ୍କ ଅଭିଯୋଗକୁ ଭିତ୍ତି କରି ଜରଡ଼ା ଥାନା ତରଫରୁ କେଶ ନମ୍ବର ୧୨୮/୨୫ରେ ଏକ ମାମଲା ରୁକୁ ହୋଇଥିଲା । ୧୦ତାରିଖ ଦିନ ଅଭିଯୋଗ ପରେ କେଶ ରୁଜୁ ହୋଇ ୧୧ ତାରିଖ ଦିନ ନାବାଳିକାର ଡାକ୍ତରୀ ମଇନା କରାଯାଇଥିଲା । ୧୩ତାରିଖ ଦିନ ଅଭିଯୁକ୍ତକୁ ଗିରଫ ପରେ ତାର ଡାକ୍ତରୀ ମଇନା କରି ତାକୁ କୋର୍ଟ ଚାଲାଣ କରାଯାଇଥିବା ଖାରିଆଆଗୁଡା ଫାଣ୍ଡି ଅଧିକାରୀ ଏସଆଇ ସମୀର ଜୟସିଂ ସୂଚନା ଦେଇଛନ୍ତି ।
