ଝାରସୁଗୁଡା,୧୭/୫ : ବ୍ରଜରାଜନଗର ଥାନା ଅଧୀନରେ ଦୁଇ ଜଣ ନାବାଳକଙ୍କ ସହ ଯୌନ ସଂପର୍କ ରଖିବା ଅଭିଯୋଗ ଜଣେ ଅଭିଯୁକ୍ତକୁ ଝାରସୁଗୁଡ଼ା ଅତିରିକ୍ତ ଜିଲ୍ଲା ଦୈରାଜଜ ପୂଜା ଷଡ଼ଙ୍ଗୀ ୨୫ ବର୍ଷ ସଶ୍ରମ କାରାଦଣ୍ଡାଦେଶ ଦେଇଛନ୍ତି। ଏଥିସହ ୧୦ ହଜାର ଟଙ୍କା ଜରିମାନା ନିର୍ଦ୍ଦେଶ ଦେଇଛନ୍ତି। ସେହିଭଳି ପିଡୀତ ଦୁଇ ନାବାଳକଙ୍କ ପରିବାରକୁ ୮ ଲକ୍ଷ ଟଙ୍କା ଲେଖାଏଁ ସରକାରଙ୍କ ପକ୍ଷରୁ ପ୍ରଦାନ ପାଇଁ ନିର୍ଦ୍ଦେଶ ଦେଇଛନ୍ତି। ଅଭିଯୁକ୍ତ ଜଣଙ୍କ ହେଲା ଅଜିତ ନାଗ (୨୫) ।
ସୂଚନା ଅନୁସାରେ ଗତ ମାର୍ଚ୍ଚ ମାସ ୨୨ ତାରିଖ ସ୍ଥାନୀୟ ତେଲେନପାଲି ଶାସ୍ତ୍ରୀନଗର ଅଞ୍ଚଳରେ ଅଜିତ ନାଗ ନାମକ ଜଣେ ଯୁବକ ଉକ୍ତ ଅଞ୍ଚଳର ଦୁଇ ଜଣ ନାବାଳକଙ୍କ ସହ ଓପିଏମ ସୁଇମିଙ୍ଗ ପୁଲ ପଛପଟ ଶୁନଶାନ୍ ସ୍ଥାନକୁ ଡାକି ନେଇ ଅପ୍ରାକୃତିକ ଯୌନ ସଂପର୍କ ରଖିଥିଲା। ଏ ସଂପର୍କରେ ଦୁଇ ଜଣ ନାବାଳକ ତାଙ୍କ ପରିବାରର ଅଭିଭାବକମାନଙ୍କୁ ଘଟଣା ସମ୍ପର୍କରେ ଅବଗତ କଲା ପରେ ପରିବାର ପକ୍ଷରୁ ଗତ ମାର୍ଚ୍ଚ ମାସ ୨୩ତାରିଖ ବ୍ରଜରାଜନଗର ଥାନାରେ ଅଭିଯୋଗ କରିଥିଲେ।
ଅଭିଯୋଗ ଆଧାରରେ ବ୍ରଜରାଜନଗର ଥାନା ଆଇଆଇସି ଧବଳେଶ୍ୱର ସାହୁ ଓ ଝାରସୁଗୁଡ଼ା ସାଇଣ୍ଟିଫିକ ଟିମ୍ ଘଟଣାର ତଦନ୍ତ କରି ଅଭିଯୁକ୍ତ ଅଜିତକୁ ଗିରଫ କରି ବ୍ରଜରାଜନଗର ଥାନା କେଶ୍ ନଂ ୦୯୩ରେ ପୋକ୍ସୋ ବଳରେ କୋର୍ଟ ଚାଲାଣ କରିଥିଲେ। ସରକାରୀ ଓକିଲ ପୃଥ୍ୱୀରାଜ ସିଂଦେଓ ଏହି ମକଦ୍ଦମାରେ ଅଭିଯୁକ୍ତ ଅଜିତକୁ ଦୋଷୀ ସାବ୍ୟସ୍ତ କରିବାକୁ ମାନ୍ୟବର ଅତିରିକ୍ତ ଜିଲ୍ଲା ଦୈରାଜଜଙ୍କ ପାଖରେ ସମସ୍ତ ସାକ୍ଷ ପ୍ରମାଣ ପ୍ରଦାନ କରିଥିଲେ। ଆଜି ୧୭ତାରିଖ ଅତିରିକ୍ତ ଜିଲ୍ଲା ଦୌରାଜଜ ପୂଜା ଷଡ଼ଙ୍ଗୀ ଏହି ମକଦ୍ଦମାରେ ଅଭିଯୁକ୍ତ ଅଜିତକୁ ଦୋଷୀ ସାବ୍ୟସ୍ତ ରାୟ ଶୁଣାଇ ୨୫ବର୍ଷ କାରାଦଣ୍ଡରେ ଦଣ୍ଡାଦେଶ ଶୁଣାଇଛନ୍ତି।
