ଭୁବନେଶ୍ୱର, ୩୦/୧୦: ଗୋମାଂସ ଚାଲାଣ ବେଳେ ସନ୍ଦେହ ହେବାରୁ ଗାଡି ଅଟକାଇଲେ ଲୋକେ । ପିକଅପ୍‌ ଗାଡ଼ିରୁ ଜବତ ହେଲା ୩ ବସ୍ତା ଗୋମାଂସ । ଏହି ମାଂସ ନିମାପଡ଼ା ଅଞ୍ଚଳରୁ ଚାଲାଣ ହେଉଥିବା ବେଳେ ରାଜଧାନୀ ଉପକଣ୍ଠ ବାଲିପାଟଣା ଥାନା ନରଦା ବଜାରରେ ଜବତ ହୋଇଛି । ରାଜଧାନୀ ଭୁବନେଶ୍ୱରରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ନିମାପଡ଼ା ଅଞ୍ଚଳରୁ ଏକ ପିକଅପ୍‌ ଗାଡ଼ିରେ ୩ ବସ୍ତା ଗୋମାଂସ ଚାଲାଣ ହେଉଥିଲା । ଗାଡ଼ିଟି ନରଦା ବଜାର ଦେଇ ଯିବା ବେଳ କିଛି ଲୋକଙ୍କର ସନ୍ଦେହ ହୋଇଥିଲା । ସନ୍ଦେହ ହେବାରୁ ସ୍ଥାନୀୟଲୋକେ ଗାଡିକୁ ଅଟକାଇଥିଲେ । ଉକ୍ତ ଗାଡ଼ିରେ ୩ ବସ୍ତା ଗୋମାଂସ ଚାଲାଣ ହେଉଥିବା ଦେଖିଥିଲେ । ଏହା ଦେଖି ତୁରନ୍ତ ବାଲିପାଟଣା ଥାନାକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚିଥିଲା । କିନ୍ତୁ ଏହାରି ଭିତରେ ଘଟଣା ସ୍ଥଳରେ ପିକଅପ୍‌ ଗାଡ଼ିକୁ ଛାଡ଼ି ଚାଳକ ଫେରାର ହୋଇଥିଲା । ଘଟଣା ସ୍ଥଳରେ ପୋଲିସ ପହଞ୍ଚି ସମସ୍ତ ମାଂସ ଜବତ କରି ଘଟଣାର ତଦନ୍ତ ଚଳାଇଛି । ଏହି ଘଟଣା ପରେ ସ୍ଥାନୀୟଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି ।