ମୋହନା,୨୪/୦୭: ବିଗତ ଦିନରେ ଲଗାଣ ବର୍ଷା ଯୋଗୁଁ ବୃଦ୍ଧି ପାଇଛି ହରଭଙ୍ଗୀ ନଦୀର ଜଳସ୍ତର। ଏହି କାରଣରୁ ଜଳବନ୍ଦୀ ଅବସ୍ଥାରେ ରହିଛନ୍ତି ମୋହନା ବ୍ଳକ ଗୁରୁଝୁଳି ପଞ୍ଚାୟତର ଅନେକ ଗାଁ। ନଦୀ ପାର ହେବାକୁ ପୋଲ ନଥିବାରୁ ବିଦ୍ୟୁତ ତାର ସହାୟତାରେ ନଦୀ ପାର ହେଉଛନ୍ତି ଗାଁ ଲୋକେ।
ସୂଚନା ଅନୁଯାୟୀ, ଲଘୁଚାପ କାରଣରୁ ଅନେକ ସ୍ଥାନରେ ଲାଗି ରହିଛି ବର୍ଷା । ଗତ କିଛି ଦିନ ଧରି ହୋଇଥିବା ଲଗାଣ ବର୍ଷାରେ ବେହାଲ ହୋଇଛି ଗଜପତି ଜିଲ୍ଲା । ଏହି କାରଣରୁ ଗାଙ୍ଗୁଡ଼ିପଙ୍କାଳ ଗାଁ ସମେତ ଗରଡ଼ମା, ଖାରୀଗୁଡା, ମାଣ୍ଡିମେରା ପଞ୍ଚାୟତର ମଧ୍ୟ କିଛି ଗାଁ ଜଳବନ୍ଦୀ ଅବସ୍ଥାରେ ଅଛନ୍ତି। ନଦୀ ପାର ହେବାକୁ ପୋଲ ନଥିବାରୁ ଗାଁ ଲୋକେ ବିଦ୍ୟୁତ ତାର ସହାୟତାରେ ନଦୀ ପାର ହୋଇ ପଞ୍ଚାୟତ କାର୍ଯ୍ୟାଳୟକୁ ଯାଉଥିବା ଦେଖିବାକୁ ମିଳିଛି । ଏଭଳି ଅବସ୍ଥାରେ ଗାଁର ମହିଳା ଓ ଛୋଟଛୋଟ ପିଲାମାନେ ମଧ୍ୟ ନଦୀ ପାର ହେଉଛନ୍ତି । ପ୍ରତିବର୍ଷ ବର୍ଷା ଦିନ ଆସିଲେ ଏଭଳି ସମସ୍ୟାର ସମ୍ମୁଖୀନ ହେଉଛନ୍ତି ଏକାଧିକ ଗାଁ ଲୋକେ । ସେପଟେ ନଦୀ ଉପରେ ପୋଲ ନିର୍ମାଣ ପାଇଁ ଅଞ୍ଚଳବାସୀଙ୍କ ବାରମ୍ୱାର ଦାବି ସତ୍ତ୍ୱେ କୌଣସି ପଦକ୍ଷେପ ନିଆ ଯାଉନଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ।