ପୁରୀ,୨୬/୦୭: ଜଗତ୍କର୍ତ୍ତାଙ୍କୁ ନିଅଣ୍ଟ ପଡ଼ୁଛି ବସ୍ତ୍ର । ବେଶରେ ପରିଧାନ କରୁଥିବା ପାଟ ବସ୍ତ୍ର କାଳିଆସାଆନ୍ତଙ୍କୁ ଅଣ୍ଟୁନି । ଶ୍ରୀବିଗ୍ରହ ପିନ୍ଧିଲା ବେଳକୁ ବସ୍ତ୍ର ଛୋଟ ହେଉଛି । ଠାକୁରଙ୍କୁ ବେଶ କଲା ବେଳେ ବାଧ୍ୟ ହୋଇ ସେବକମାନେ ଯାହିତାହି ତୁଲାଉଛନ୍ତି । ପୁଣି ଆଗଭଳି ଉନ୍ନତ ମାନର ପାଟ ବସ୍ତ୍ର ମଧ୍ୟ ଯୋଗାଯାଉନି । ଆଗେ ଦିଅଁଙ୍କ ପାଟବସ୍ତ୍ରର ଓଜନ ରହୁଥିଲା । ଏବେ ସୋଲ ଭଳି ହାଲୁକା ରହୁଛି ଠାକୁରଙ୍କ ବସ୍ତ୍ର । ବେଶ ପ୍ରିୟ ମହାପ୍ରଭୁ ଶ୍ରୀଜଗନ୍ନାଥ । ଦୁର୍ଲ୍ଲଭ ବେଶରେ କଳାଶ୍ରୀମୁଖଙ୍କୁ ଦର୍ଶନ କରିବାକୁ ବିଶ୍ୱବାସୀ ଆକୁଳ । ଏଣୁ ଦାରୁବ୍ରହ୍ମଙ୍କ ବେଶରେ ଅବହେଳା କରାଯିବା ନେଇ ଚିନ୍ତା ବ୍ୟକ୍ତ କରିଛନ୍ତି ସମ୍ପୃକ୍ତ ସେବକ ।
ବଡ଼ଠାକୁରଙ୍କ ପ୍ରତି ବଡ଼ ଅବହେଳାର ଅଭିଯୋଗ । ବଡ଼ଦେଉଳରେ ବିଜେ କୋଟି ବ୍ରହ୍ମାଣ୍ଡ ଇଶ୍ୱର । ଠାକୁରଙ୍କ ନିଆରା ରୀତିନୀତି ନେଇ ବିଶ୍ୱ ପ୍ରସିଦ୍ଧି ରହିଛି । ଶ୍ରୀବିଗ୍ରହଙ୍କ ଯେତେ ଧୂପ(ଭୋଗ) ସେତେ ବେଶ । ଆଗେ ବେଶ ପରେ ଧୂପ । ଅବକାଶ ବେଶରେ ତଡ଼ପ ଓ ଉତ୍ତରୀୟଠାରୁ ଆରମ୍ଭ କରି ସକାଳ ଧୂପ, ମଧ୍ୟାହ୍ନ ଧୂପ, ସନ୍ଧ୍ୟା ଧୂପ ଓ ବଡ଼ସିଂହାର ବେଶରେ ଠାକୁରଙ୍କୁ ଗୀତଗୋବିନ୍ଦ ପାଟ ପର୍ଯ୍ୟନ୍ତ ଠାକୁରେ ବିଭିନ୍ନ ବସ୍ତ୍ର ଲାଗି ହୋଇଥାନ୍ତି । ଶ୍ରୀମନ୍ଦିର ପ୍ରଶାସନ ଯୋଗାଉଛି ଠାକୁରଙ୍କ ପାଟ ବସ୍ତ୍ର । ଆଗେ ଶ୍ରୀମନ୍ଦିର ପ୍ରଶାସନ ନିଜେ ସଂଗ୍ରହ କରୁଥିଲା । ଏବେ ଦାତାମାନେ ପର୍ଯ୍ୟାପ୍ତ ପରିମାଣରେ ପାଟବସ୍ତ୍ର ଠାକୁରଙ୍କୁ ଦାନ ଦେଉଛନ୍ତି । ବସ୍ତ୍ର ସବୁକୁ ଶ୍ରୀମନ୍ଦିର ପ୍ରଶାସନ ଜିମା ଦିଆଯିବା ପରେ ଠାକୁରଙ୍କ ଲାଗି ପାଇଁ ସେବାୟତଙ୍କୁ ଦିଆଯାଏ ।
ଠାକୁରଙ୍କୁ ବେଶ କରିବା ଦାୟିତ୍ୱ ପୁଷ୍ପାଳକ ସେବକଙ୍କ ଉପରେ ନ୍ୟସ୍ତ । ଚତୁର୍ଦ୍ଧାମୂର୍ତ୍ତିଙ୍କୁ ପୁଷ୍ପାଳକ ସେବକମାନେ ବେଶ କରିଥାନ୍ତି । ଅଧିକାଂଶ ସମୟରେ ପାଟ ବସ୍ତ୍ର ଛୋଟ ରହୁଥିବାରେ ଶ୍ରୀଅଙ୍ଗକୁ ଉକ୍ତ ବସ୍ତ୍ର ଅଣ୍ଟୁ ନାହିଁ । ଛୋଟ ପାଟ ଯୋଗୁ ଶ୍ରୀଅଙ୍ଗକୁ ପାଉ ନାହିଁ । ଅନେକ ସମୟରେ ବସ୍ତ୍ରକୁ ଝୋବା ସହ ସଂଯୁକ୍ତ କରିବାକୁ ପଡ଼ୁଛି । ଠାକୁରଙ୍କ ଉପରେ ଦୃଷ୍ଟି ନପଡ଼ିବା ପାଇଁ ଝୋବା ଲାଗି ହୋଇଥାଏ । ଠାକୁରଙ୍କ ଶ୍ରୀଅଙ୍ଗ ସମ୍ମୁଖରେ ଝୋବା ଝୁଲୁଥିବା ଭକ୍ତ ଦେଖିପାରେ । ବସ୍ତ୍ର ପାଉ ନଥିବାରେ ଅନେକ ସମୟରେ ଝୋବା ସହିତ ଗଣ୍ଠି ପକାଇବାକୁ ହେଉଥିବା କୁହାଯାଉଛି । ଠାକୁରଙ୍କୁ ଲାଗି ପାଇଁ ପ୍ରସ୍ତୁତ ପାଟ କେତେ ଉପଯୁକ୍ତ ପୂର୍ବରୁ ଯାଞ୍ଚ ହେବା କଥା । ହେଲେ ଏଥିରେ ଅବହେଳା ହେଉଥିବାରୁ ଅନେକ ଦିନ ହେଲା ଏଭଳି ଅବହେଳିତ ଭାବେ ଠାକୁରଙ୍କ ବେଶ ଅନୁଷ୍ଠିତ ହେଉଥିବା ଅଭିଯୋଗ ହେଉଛି ।
ଏନେଇ ପୁଷ୍ପାଳକ ନିଯୋଗର ଜଣେ ବରିଷ୍ଠ କର୍ମକର୍ତ୍ତା କୁହନ୍ତି ମହାପ୍ରଭୁଙ୍କୁ କୌଣସି ପ୍ରକାରେ ଅବହେଳା କରା ନଯାଉ । କିଛି ବର୍ଷ ହେଲା ଠାକୁରଙ୍କୁ ଯେଉଁ ବସ୍ତ୍ର ଲାଗି କରାଯାଉଛି ତାହା ଉପଯୁକ୍ତ ନୁହେଁ । ମହାପ୍ରଭୁଙ୍କ ବେଶର ସ୍ୱତନ୍ତ୍ରତା ରହିଛି । ଉନ୍ନତ ମାନ ତଥା ଅସଲି ବସ୍ତ୍ର ଠାକୁରଙ୍କୁ ଲାଗି କରାଯିବା କଥା । ଆମେ ଛାର ମଣିଷ ହୋଇ ବେଶ ହେଲା ବେଳେ କେଉଁଠି ଅବହେଳା କରୁ ନାହେଁ । ତେବେ ଜଗତକର୍ତ୍ତା କୋଟି ବ୍ରହ୍ମାଣ୍ଡ ଇଶ୍ୱରଙ୍କ ବେଶକୁ କିପରି ଅଣଦେଖା କରାଯିବ? ଏପରକି ପୁଷ୍ପାଳକ ନିଯୋଗ ପକ୍ଷରୁ ମଧ୍ୟ ଶ୍ରୀମନ୍ଦିର ପ୍ରଶାସନଠାରେ ଅଭିଯୋଗ ହୋଇଥିବା ସେ ପ୍ରକାଶ କରିଛନ୍ତି । ଏନେଇ ଯୋଗାଯୋଗ କରାଯାଇଥିଲେ ସୁଦ୍ଧା ଶ୍ରୀମନ୍ଦିର ନୀତି ପ୍ରଶାସକଙ୍କ କୌଣସି ପ୍ରତିକ୍ରିୟା ମିଳିନାହିଁ ।
ଦୈନନ୍ଦିନ ନୀତିରେ ଠାକୁରଙ୍କୁ ଲୋଡ଼ା ବାରଲାଗି ପାଟ । ପୁଣି ଋତୁକୁ ନେଇ ଠାକୁରଙ୍କ ବେଶ ନିର୍ଦ୍ଦିଷ୍ଟ ରହିଛି । ସପ୍ତାହକୁ ବାର ଅନୁସାରେ ଭିନ୍ନ ଭିନ୍ନ ରଙ୍ଗର ବସ୍ତ୍ର ପରିଧାନ କରନ୍ତି ଠାକୁରେ । ରବିବାର ଲାଲ୍, ସୋମବାର କଳା ଛିଟା ମିଶା ଧଳା, ମଙ୍ଗଳବାର ବାର ପଟିଆ(ପଞ୍ଚ ରଙ୍ଗ ମିଶା), ବୁଧବାର ନୀଳ ରଙ୍ଗ, ଗୁରୁବାର ହଳଦିଆ, ଶୁକ୍ରବାର ଧଳା ଓ ଶନିବାର କଳା ରଙ୍ଗର ପାଟ ପରିଧାନ କରନ୍ତି ଠାକୁରେ । ଏହା ପରେ ଦୁର୍ମୂଲ୍ୟ ଅଳଙ୍କାର ଲାଗି ହୁଅନ୍ତି ଶ୍ରୀବିଗ୍ରହ । ଆଗେ ଠାକୁରଙ୍କ ଉଲାଗି ବସ୍ତ୍ର ସେହିଭଳି ପଡ଼ି ରହୁଥିଲା । ଏବେ ଏଥିରୁ ଭଲ ଉପାର୍ଜନ କରୁଛି ପ୍ରଶାସନ । ଏକ ପ୍ରକାର ଆର୍ଥିକ ଲାଭ ପାଉଛି ଶ୍ରୀମନ୍ଦିର ପ୍ରଶାସନ । ଠାକୁରଙ୍କୁ ଲାଗି ପରେ ପୁନଃ ଶ୍ରୀଅଙ୍ଗ ଲାଗି ବସ୍ତ୍ର ଶ୍ରୀମନ୍ଦିର ପ୍ରଶାସନ ଜିମା ରହୁଛି । ସୁଲଭ ମୂଲ୍ୟରେ ଏହାକୁ ଭକ୍ତମାନେ ପାଉଛନ୍ତି ।
