ଇସଲାମାବାଦ, ୧୩/୦୮: ପାକିସ୍ତାନର ଅସ୍ଥାୟୀ ପ୍ରଧାନମନ୍ତ୍ରୀ ହୋଇଛନ୍ତି ଅନୱର-ଉଲ୍-ହକ୍ । ଅନୱର କେୟାର ଟେକର ପିଏମ୍ ହେବା ପରେ ପାକିସ୍ତାନର ଆଗାମୀ ଭବିଷ୍ୟତ ନେଇ ପ୍ରଶ୍ନ ଉଠିଛି । ପାକିସ୍ତାନର ନ୍ୟାସନାଲ ଆସେମ୍ବ୍ଲି ରାଷ୍ଟ୍ରପତି ଭଙ୍ଗ କରିବା ସହ ନିର୍ବାଚନର ରାସ୍ତା ସଫା ହୋଇ ଯାଇଛି ।
ପାକିସ୍ତାନର ସମ୍ବିଧାନ ଅନୁସାରେ, ୯୦ ଦିନ ଭିତରେ ନିର୍ବାଚନ ହେବ । ସେହି ହିସାବରେ ଦେଖିଲେ ଆସନ୍ତା ନଭେମ୍ବରରେ ପାକିସ୍ତାନରେ ହେବ ନିର୍ବାଚନ । ଏବେ କିନ୍ତୁ ନିର୍ବାଚନ ତାରିଖକୁ ନେଇ ଦ୍ୱନ୍ଦ୍ୱ ଦେଖା ଦେଇଛି । ଯାହାର କାରଣ ହେଉଛି ଏବେ ପାକିସ୍ତାନ ସାମ୍ବିଧାନିକ, ରାଜନୈତିକ ଓ ଆର୍ଥିକ ସଂକଟ ସହ ଜୁଝୁଛି ।
ପାକିସ୍ତାନକୁ ମିଳିଲେ ଅସ୍ଥାୟୀ ପ୍ରଧାନମନ୍ତ୍ରୀ, ଆଗାମୀ ନିର୍ବାଚନ ଯାଏଁ ଦାୟିତ୍ବରେ ରହିବେ
ଅସ୍ଥାୟୀ ପ୍ରଧାନମନ୍ତ୍ରୀ କିଏ ?
ବିଦାୟୀ ପ୍ରଧାନମନ୍ତ୍ରୀ ଶହବାଜ ସରିଫ ଓ ବିରୋଧୀ ଦଳ ନେତା ରାଜା ରିୟାଜ, ସାଂସଦ ଅନୱର-ଉଲ୍-ହକଙ୍କୁ ନୂତନ ପ୍ରଧାନମନ୍ତ୍ରୀ ନିଯୁକ୍ତ କରିଛନ୍ତି । ବଲୁଚିସ୍ତାନକର ଆବାମୀ ପାର୍ଟିର ନେତା ଅନୱର । ସେ ଗତ ମାର୍ଚ୍ଚ ମାସରେ ଇମ୍ରାନ୍ ଖାନଙ୍କ ଦଳରୁ ସମର୍ଥନ ପ୍ରତ୍ୟାହାର କରି ନେଇଥିଲେ । ଆଗାମୀ ନିର୍ବାଚନ ଯାଏ ପାକିସ୍ତାନର କମାଣ ଅନୱରଙ୍କ ହାତରେ ରହିବ ।
କୁହାଯାଉଛି ଅନୱର-ଉଲ୍-ହକ୍ ଓ ତାଙ୍କ ଦଳର ସମ୍ପର୍କ ପାକିସ୍ତାନ ସେନା ସହ ବହୁତ ଭଲ ରହିଛି । ଯେଉଁଥିପାଇଁ ତାଙ୍କୁ ଅସ୍ଥାୟୀ ପ୍ରଧାନମନ୍ତ୍ରୀ ନିଯୁକ୍ତ କରାଯାଇ ପୁରସ୍କୃତ କରାଯାଇଥିବା ନେଇ ଚର୍ଚ୍ଚା ହେଉଛି । ବଲୁଚିସ୍ତାନକୁ ନେଇ ଚର୍ଚ୍ଚାରେ ରହୁଥିବା ଅନୱର ପ୍ରମୁଖ ମନ୍ତ୍ରଣାଳୟ ପରିଚାଳନା ଲାଗି ମନ୍ତ୍ରୀମାନଙ୍କ ନିର୍ବାଚନ କରାଇ ପାରନ୍ତି । ଏବେ ଦେଖିବାର କଥା ଅନୱର କିଭଳି ପାକିସ୍ତାନକୁ ଆଗେଇ ନେଉଛନ୍ତି ।
ସେପ୍ଟେମ୍ବରରେ ପାକିସ୍ତାନ ଫେରିବେ ନୱାଜ୍ ସରିଫ୍, ନିର୍ବାଚନ ପ୍ରଚାରରେ ସାମିଲ୍ ହେବେ
ଟଳିପାରେ ନିର୍ବାଚନ !
ପାକିସ୍ତାନର ସମ୍ବିଧାନ ଅନୁସାରେ, ଅସ୍ଥାୟୀ ସରକାରର ୯୦ ଦିନ ଭିତରେ ନିର୍ବାଚନ ହେବା ଉଚିତ୍ । ତେବେ ବିଦାୟୀ ସରକାର ଶେଷ ଦିନରେ ନୂଆ ଜନଗଣନାକୁ ମଞ୍ଜୁରୀ ଦେଇଥିଲା । ଫଳରେ ନିର୍ବାଚନ ଆୟୋଗ ନୂଆ ନିର୍ବାଚନ ମଣ୍ଡଳୀ ସୀମା ନିର୍ଦ୍ଧାରଣ କରିବେ । ରାଜ୍ୟ ଓ ଦେଶର ଆଧାରରେ ନୂଆ ନିର୍ବାଚନ କ୍ଷେତ୍ର ସୀମା ନିର୍ଦ୍ଧାରଣ ପାଇଁ ୬ ମାସରୁ ଅଧିକ ସମୟ ଲାଗିପାରେ ।
ଏହାଛଡ଼ା ଏହି ସମୟରେ ନୂଆ ନିର୍ବାଚନ କ୍ଷେତ୍ର ସୃଷ୍ଟି ହେଲେ କିଛି ଲୋକ ନିର୍ବାଚନ ଆୟୋଗଙ୍କ ବିରୋଧରେ ମାମଲା ବି ଦାଏର କରି ପାରନ୍ତି । ଏସବୁ ଦିଗକୁ ଧ୍ୟାନରେ ରଖି ସ୍ଥିର ହେବ ନିର୍ବାଚନ ତାରିଖ । ୯୦ ଦିନ ପରେ ନିର୍ବାଚନ ବି ହୋଇପାରେ ।
ସେନାର ଭୂମିକା
ପ୍ରାୟ ସମସ୍ତେ ମାନନ୍ତି ପାକିସ୍ତାନରେ ସରକାରଙ୍କ ପରଦା ପଛରେ ସେନା ଶାସନ କରେ । ପାକିସ୍ତାନର ସାତ ଦଶନ୍ଧିର ଇତିହାସରେ ସେନା ୩ ଦଶନ୍ଧିରୁ ଅଧିକ ସମୟ ସରକାର ପରିଚାଳନା କରିଛି । ରାଜନୈତିକ ବିଶେଷଜ୍ଞଙ୍କ ଅନୁସାରେ, ଯଦି ଅସ୍ଥାୟୀ ପ୍ରଧାନମନ୍ତ୍ରୀଙ୍କ କାର୍ଯ୍ୟକାଳ ବଢ଼ାଯାଏ । ତାହେଲେ ପାକିସ୍ତାନ ସେନା ଦେଶର ଶାସନ କ୍ଷମତା ହାତକୁ ନେଇ ପାରେ । ତାହା ପରେ ସେନା ହିଁ ନିଷ୍ପତ୍ତି ନେବ କେବେ ହେବ ନିର୍ବାଚନ ।
ତା ଛଡ଼ା ପାକିସ୍ତାନରେ ଲାଗି ରହିଥିବା ଆର୍ଥିକ ଅସ୍ଥିରତା ନିର୍ବାଚନରେ ଅନ୍ତରାୟ ସୃଷ୍ଟି କରିପାରେ । ଅନ୍ତରାଷ୍ଟ୍ରୀୟ ମୁଦ୍ରା ପାଣ୍ଠିରୁ ମିଳିଥିବା ସହାୟତାରେ ପାକିସ୍ତାନର ଅର୍ଥ ବ୍ୟବସ୍ଥା କୌଣସି ପ୍ରକାରେ ବଞ୍ଚି ରହିଛି । ଦେଶରେ ରାଜନୈତିକ ଅସ୍ଥିରତା ମଧ୍ୟ ଆଉ ଏକ ଚ୍ୟାଲେଞ୍ଜ । ଇମ୍ରାନ ଖାନଙ୍କୁ ଜେଲରେ ଭର୍ତ୍ତି କରି ତାଙ୍କ ନିର୍ବାଚନ ଲଢ଼ିବା ଉପରେ ରୋକ୍ ଲଗାଇ ଦିଆ ଯାଇଛି ।