ବେଙ୍ଗାଲୁରୁ: କର୍ଣ୍ଣାଟକରେ କାୟା ମେଲାଉଛି ଡେଙ୍ଗୁ । ବର୍ଷା ଦିନରେ ମଶାଙ୍କ ଆତଙ୍କ ଦେଖିବାକୁ ମିଳୁଛି । କର୍ଣ୍ଣାଟକରେ ୭ ହଜାରରୁ ଅଧିକ ଡେଙ୍ଗୁ ମାମଲା ପଞ୍ଜିକୃତ ହୋଇଥିବା ବେଳେ ରାଜଧାନୀ ବେଙ୍ଗାଲୁରୁରେ ସ୍ଥିତି ସଙ୍ଗୀନ । ଜୁଲାଇ ୬ ତାରିଖ ସୁଦ୍ଧା ରାଜ୍ୟରେ ୭,୦୦୬ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି । କେବଳ ବେଙ୍ଗାଲୁରୁରେ ୧୯୦୮ ଜଣ ଡେଙ୍ଗୁରେ ଆକ୍ରାନ୍ତ ହୋଇଛନ୍ତି । ଅନ୍ୟ ଜିଲ୍ଲାରେ ମଧ୍ୟ ଡେଙ୍ଗୁ ଆତଙ୍କ ବୃଦ୍ଧି ପାଇବାରେ ଲାଗିଛି । ଚିକାମାଗାଲୁରୁରେ ୫୨୧ ମାମଲା, ମଇସୁରରେ ୪୯୬ ଏବଂ ହାଭେରିରେ ୪୮୧ ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି ।
ଧରଓ୍ବାଡରେ ୨୮୯ ଡେଙ୍ଗୁରେ ଆକ୍ରାନ୍ତ ହୋଇଛନ୍ତି । ସେହିଭଳି ଚିତ୍ରଦୁର୍ଗାରେ ୨୭୫ ମାମଲା ସାମ୍ନାକୁ ଆସିଛି । ସେପଟେ ଲକ୍ଷଣ ଦେଖାଗଲେ ତୁରନ୍ତ ହସ୍ପିଟାଲରେ ଚେକଅପ୍ କରାଇବାକୁ ଲୋକମାନଙ୍କୁ ପରାମର୍ଶ ଦେଇଛନ୍ତି ସ୍ବାସ୍ଥ୍ୟ ଅଧିକାରୀ । ଅନ୍ୟପଟେ ରାଜ୍ୟରେ ଡେଙ୍ଗୁକୁ ନେଇ ରାଜନୀତି ଜୋର ଧରିଛି । ଡେଙ୍ଗୁ ନିୟନ୍ତ୍ରଣ ଦିଗରେ ଶାସକ କଂଗ୍ରେସର ଉଦାସୀନତାକୁ ବିଜେପି ଦାୟୀ କରିଥିବା ବେଳେ ସିଦ୍ଧରମେୟାଙ୍କ ସରକାର ପାଲଟା ଜବାବ ଦେଇଛି ।
କର୍ଣ୍ଣାଟକର ସ୍ବାସ୍ଥ୍ୟ ମନ୍ତ୍ରୀ ଦୀନେଶ ଗୁଣ୍ଟୁ ରାଓ ବିଜେପିକୁ ଜବାବ ଦେଇ ଏକ୍ସରେ ଲେଖିଛନ୍ତି ଯେ, ଦୟାକରି ଖବରଟିକୁ ପଢ଼ି ପରିସ୍ଥିତିକୁ ବୁଝିବାକୁ ଚେଷ୍ଟା କରନ୍ତୁ । ଆମେ ସୁପରସ୍ମାର୍ଟ ମଶାଙ୍କୁ ତଡ଼ିବା ଲାଗି ପ୍ରଚେଷ୍ଟା କରୁଥିବା ବେଳେ ବିଜେପି ଲଗାତାର ଖରାପ ଟିପ୍ପଣୀ କରୁଛି । ଡେଙ୍ଗୁ ନିୟନ୍ତ୍ରଣ ଲାଗି ମୋର ଗତ କେତେ ସପ୍ତାହର କାର୍ଯ୍ୟକ୍ରମଙ୍କୁ ଦେଖନ୍ତୁ । କରୋନା ସମୟରେ ଆପଣ କରିଥିବା ଅବହେଳାକୁ ମନେ ପକାନ୍ତୁ । ପୀଡ଼ିତ ପରିବାରକୁ ଯାଇ ସତ କଣ ଜାଣନ୍ତୁ ବୋଲି ସେ ବିଜେପିକୁ ଜବାବ ଦେଇଛନ୍ତି ।
Please give it a read and take a moment to understand the crux of the situation. While we are trying to outsmart the supersmart mosquitos,@BJP4Karnataka continues to make dumb remarks.
— Dinesh Gundu Rao/ದಿನೇಶ್ ಗುಂಡೂರಾವ್ (@dineshgrao) July 7, 2024
I suggest reviewing my timeline from the past week to see the efforts made to contain dengue,… https://t.co/zXdIoBA24M pic.twitter.com/VPAaKKG33w
ସେହିଭଳି ବିଜେପି ଅଭିଯୋଗ କରିଛି ଯେ, କର୍ଣ୍ଣାଟକ ହସ୍ପିଟାଲଗୁଡ଼ିକରେ ପର୍ଯ୍ୟାନ୍ତ ପିଇବା ପାଣିର ଅଭାବ ରହିଛି । ଏଭଳି ସ୍ଥିତିରେ ରାଓ ନିଜକୁ ଦକ୍ଷ ମନ୍ତ୍ରୀ କହୁଛନ୍ତି । ଏହି ସମୟରେ ସଠିକ୍ ହେବ ଆପଣ (ସ୍ବାସ୍ଥ୍ୟ ମନ୍ତ୍ରୀ) ଇସ୍ତଫା ଦେଇ ଦିଅନ୍ତୁ ବୋଲି ବିଧାନସଭାର ବିରୋଧି ଦଳ ନେତା ବିଜେପିର ଆର ଅଶୋକ କହିଛନ୍ତି । ଏହା ସହ ଗରିବ ଲୋକଙ୍କ ଡେଙ୍ଗୁ ପରୀକ୍ଷା ଲାଗି ବ୍ଲକ୍ ସ୍ତରୀୟ ଟାସ୍କ ଫୋର୍ସ ଗଠନ ଲାଗି ସେ ଦାବି କରିଛନ୍ତି । ରାସ୍ତା ଉପରୁ ବର୍ଯ୍ୟ ସଫା କରିବା ସହ ପାଣି ଜମିଥିବା ସ୍ଥାନମାନଙ୍କରେ ମଶା ଘଉଡ଼ାଇବା ଲାଗି ଧୂଆଁ ଛାଡ଼ିବା ଉପରେ ସେ ଗୁରୁତ୍ବ ଦେଇଛନ୍ତି । ସରକାରୀ ହସ୍ପିଟାଲରେ ଡେଙ୍ଗୁ ରୋଗୀଙ୍କ ଚିକତ୍ସା ପାଇଁ ଅଲଗା ଓ୍ବାର୍ଡ କରିବାକୁ ଗୃହରେ ଦାବି କରିଛନ୍ତି ଆର ଅଶୋକ ।
