ଦାରିଙ୍ଗବାଡ଼ି, ୨୪/୭: ମୋ ହସ୍ପିଟାଲ ଉଦ୍ଘାଟନକୁ ବିତିଲାଣି ହୋଇ ୫ ମାସ । ହେଲେ ଆଜି ପର୍ଯ୍ୟନ୍ତ କୋ ବର୍ହି ବିଭାଗରେ ରୋଗୀ ସେବା ଆରମ୍ଭ ହୋଇନାହିଁ । ଅନ୍ୟପଟେ ହସ୍ପିଟାଲ କାନ୍ଥରେ ଫାଟ ଦେଖିବାକୁ ମିଳିଛି । ଏ ଦୃଶ୍ୟ କିଛି ଦାରିଙ୍ଗବାଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର । ଏହି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ରାଜ୍ୟ ସରକାର ୫ ଟିରେ ରୂପାନ୍ତରିକରଣ କରିବା ନିମନ୍ତେ ୨୦୨୩ ମସିହାରେ ମୋ ହସ୍ପିଟାଲ ଯୋଜନାରେ ସାମିଲ କରିଥିଲେ । ଏଥିପାଇଁ ୨ କୋଟି ୮୫ ଲକ୍ଷ ଟଙ୍କା ମଞ୍ଜୁର ହୋଇଥିଲା । ଚଳିତ ବର୍ଷ ଫେବ୍ରୁଆରୀ ୧୭ ତାରିଖରେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିସି ମାଧ୍ୟମରେ ଉଦ୍ଘାଟନ କରିଥିଲେ ।
ଉଦ୍ଘାଟନର ୫ ମାସ ବିତି ଯାଇଥିଲେ ସୁଦ୍ଧା ଆଜି ପର୍ଯ୍ୟନ୍ତ ବର୍ହି ବିଭାଗରେ ରୋଗୀ ସେବା ଆରମ୍ଭ ହୋଇନଥିବା ବେଳେ ନିର୍ମାଣ ହୋଇଥିବା କୋଠାରେ ଫାଟ ଦେଖାଗଲାଣି । ଏପରିକି ଯେଉଁ ପୁରୁଣା କୋଠାରେ ପୁଟି ଓ ରଙ୍ଗ ମାରାଯାଇଥିଲା କିଛି କିଛି ସ୍ଥାନରେ କାନ୍ଥ ରଙ୍ଗ ଓ ପୁଟି ଛାଡ଼ି ଗଲାଣି । ନିମ୍ନ ମାନର କାମ ଯୋଗୁଁ ୫ ମାସ ନ ବିତୁଣୁ କାନ୍ଥରେ ଫାଟ ଦେଖା ଯାଇଥିବା ବେଳେ ପୁଟି ଛାଡ଼ି ଯାଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି । କାର୍ଯ୍ୟ ଆରମ୍ଭରୁ ନିମ୍ନମାନର କାର୍ଯ୍ୟ ହେଉଥିବା ନେଇ ପୂର୍ବରୁ ଅଭିଯୋଗ ହୋଇଥିଲେ ସୁଦ୍ଧା ଦାୟିତ୍ୱରେ ଥିବା ଅଧିକାରୀ ଏଥିପ୍ରତି କୌଣସି ଦୃଷ୍ଟି ଦେଇନଥିବାରୁ ଆଜି କାନ୍ଥରେ ଫାଟ ଦେଖାଯାଉଥିବା ଅଞ୍ଚଳବାସୀ ଅଭିଯୋଗ କରିଛନ୍ତି ।
୫ ମାସରେ ଯଦି କାନ୍ଥରେ ଫାଟ ଦେଖା ଦେଲାଣି ତା ହାଲେ ଆଗକୁ କୋଠାର ଅବସ୍ଥା କ’ଣ ହେବ ? ଏନେଇ ଅଞ୍ଚଳବାସୀ ଚିନ୍ତାପ୍ରକଟ କରିଥିବା ବେଳେ ଆଗାମୀ ଦିନରେ ଉକ୍ତ କୋଠା ସାଧାରଣ ଲୋକଙ୍କୁ ମୃତ୍ୟୁମୁଖକୁ ଠେଲିଦେବ ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି । ଏଣୁ ଏହାର ସଠିକ୍ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରାଯିବା ପାଇଁ ଦାବି ହୋଇଛି । ଏନଆରଏଚଏମର କନିଷ୍ଠ ଯନ୍ତ୍ରୀ ମନୋଜ ବାରିକଙ୍କୁ ପଚାରିବାରୁ ଗୁରୁବାର ଦିନଠାରୁ ରୋଗୀ ସେବା ଆରମ୍ଭ ହେବ ବୋଲି ସେ କହିଛନ୍ତି ଓ କାନ୍ଥରେ କୌଣସି ଫାଟ ନଥିବା ସେ ସଫେଇ ଦେଇଥିଲେ ।
