କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଜେପି ଉପରେ ଜୋରଦାର ବର୍ଷିଛନ୍ତି । ଯଦି ଜିତିବା ଲାଗି ଆପଣଙ୍କର ଏତେ ଆତ୍ମବିଶ୍ବାସ ତେବେ ରେଡ୍ କାହିଁକି କରୁଛନ୍ତି । ବିଜେପି ନେତା ଏନଆଇଏ-ବିଏସଏଫ୍କୁ ନେଇ ବୁଲୁଛନ୍ତି କାହିଁକି ବୋଲି କୁଚବିହାର ରାଲିରେ ବିଜେପିକୁ ପ୍ରଶ୍ନ କରିଛନ୍ତି ମମତା । ଏପରିକି ବିଜେପି ନିର୍ବାଚନରେ ଆଦର୍ଶ ଆଚରଣ ବିଧି ଉଲ୍ଲଂଘନ କରୁଛି ବୋଲି ସେ ଅଭିଯୋଗ କରିଛନ୍ତି । ସେପଟେ ମମତା ବାନାର୍ଜୀ କହିଛନ୍ତି ଯେ, ଜଣେ ବିଷାକ୍ତ ସାପ ଉପରେ ବିଶ୍ବାସ କରିପାରିବ କିନ୍ତୁ ବିଜେପିକୁ ନୁହେଁ । ବେଙ୍ଗଲ ନିର୍ବାଚନ ଉପରେ ନିର୍ବାଚୟ ଆୟୋଗ ନଜର ରଖିବେ ବୋଲି ପ୍ରଧାନମନ୍ତ୍ରୀ ମୋଦିଙ୍କ ମନ୍ତବ୍ୟକୁ ନେଇ ମମତା ତେରଛା ବାଣ ମାରିଛନ୍ତି । ଆପଣ ନିର୍ବାଚନ ଆୟୋଗକୁ ବି କିଣି ଦେଇଛନ୍ତି କି ବୋଲି ସେ ପ୍ରଶ୍ନ କରିଛନ୍ତି ।
ମମତା ବାନାର୍ଜୀ କହିଛନ୍ତି ଯେ, ଟିଏମସି କେନ୍ଦ୍ରୀୟ ଏଜେନ୍ସିର ଧମକ ଆଗରେ ହାର ମାନିବ ନାହିଁ । ଏପ୍ରିଲ ୧୯ରେ ହେବାକୁ ଥିବା ମତଦାନ ପୂର୍ବରୁ ବିଏସଏଫ ଯବାନଙ୍କ ଦ୍ବାରା ଯଦି ସ୍ବାନୀୟ ଲୋକଙ୍କୁ ଅତ୍ୟାଚାର କରାଯାଏ ତେବେ ପୋଲିସରେ ଅଭିଯୋଗ କରିବା ପାଇଁ ଉପସ୍ଥିତ ମହିଳାଙ୍କୁ ପରାମର୍ଶ ଦେଇଛନ୍ତି ମମତା । ସେ ଆହୁରି କହିଛନ୍ତି ଯେ, କେନ୍ଦ୍ରୀୟ ତଦନ୍ତ ଏଜେନ୍ସି, ଏନଆଇଏ, ଆୟକର ବିଭାଗ, ବିଏସଏଫ୍ ଏବଂ ସିଆଇଏସ୍ଏଫ ବିଜେପି ପାଇଁ କାମ କରୁଛନ୍ତି । ବିଜେପି କେବଳ ‘ଏକ ରାଷ୍ଟ୍ର ଏକ ପାର୍ଟି’ ସିଦ୍ଧାନ୍ତକୁ ପାଳନ କରୁଛି । ଦୁର୍ଭାଗ୍ୟର କଥା ଯେ, ଯେଉଁ ବ୍ୟକ୍ତିଙ୍କ ବିରୁଦ୍ଧରେ ଅନେକ ଅପରାଧିକ ମାମଲା ରହିଛି ତାଙ୍କୁ ଦେଶର ଗୃହ ରାଷ୍ଟ୍ର ମନ୍ତ୍ରୀ କରାଯାଇଛି । ଆମେ ତାଙ୍କୁ ବରଖାସ୍ତ କରିଥିଲୁ । ଏବେ ସେ ବିଜେପିର ସଂପତ୍ତି ବୋଲି ମମତା କହିଛନ୍ତି ।
ବିଜେପିକୁ ଟାର୍ଗେଟ କରି ମମତା ଆହୁରି କହିଛନ୍ତି ଯେ, ୨୦୨୧ ସୀତଲକୁଚିରେ ୫ ଜଣଙ୍କ ହତ୍ୟା ମାମଲାରେ ସଂପୃକ୍ତ ବ୍ୟକ୍ତିଙ୍କୁ ପ୍ରାର୍ଥୀ କରାଇଥିବା ବିଜେପିର ସତ ସାମ୍ନାକୁ ଆସିଛି । ଏହା ସହ ରାଜ୍ୟରେ ସିଏଏ ଏବଂ ଏନଆରସି ଲାଗୁ କରାଇ ଦେବୁ ନାହିଁ କହିବା ସହ ବିଜେପିକୁ ‘ଠକାମୀ’ ଦଳର ନାଁ ଦେଇଛନ୍ତି ମମତା ବାନାର୍ଜୀ । ବୈଧ ନାଗରିକଙ୍କୁ ବିଦେଶୀ କରିବାର ଜାଲ ହେଉଛି ସିଏଏ । ଥରେ ସିଏଏ ଲାଗୁ ହେଲେ ଏନଆରସି ଲାଗୁ କରିବାକୁ ବାଧ୍ୟ । ତେଣୁ ପଶ୍ଚିମବଙ୍ଗରେ ସିଏଏ ଏବଂ ଏନଆରସି ଲାଗୁ କରାଇବାକୁ ଦିଆଯିବ ନାହିଁ ବୋଲି ମମତା ବାନାର୍ଜୀ କହିଛନ୍ତି ।
