ଭୁବନେଶ୍ଵର, ୨୪/୦୨ : ଗର୍ଭନିରୋଧ ହେଉ କି ଭୟାବହ ଏଡ୍ସ୍ କିମ୍ଵା ଯୌନରୋଗ ସଂକ୍ରମଣ... ଏସବୁ ରୋକିବାକୁ ଏକମାତ୍ର ସାହାରା କଣ୍ଡୋମ। ହେଲେ ଏବେ କଣ୍ଡୋମ ପ୍ରତି କମୁଛି ଆଗ୍ରହ। ଦିନକୁ ଦିନ କଣ୍ଡୋମ ବ୍ୟବହାର ପ୍ରତି ବିମୁଖ ହେଉଛନ୍ତି ଓଡ଼ିଶାବାସୀ। ବଦଳୁଛି ଲୋକଙ୍କ ଅଭ୍ୟାସ। ଜନ୍ମ ନିୟନ୍ତ୍ରଣ ରୋକିବା ପାଇଁ ଆପଣେଇଲେଣି ବିକଳ୍ପ ପନ୍ଥା। ହେଲେ ସବୁଠୁ ସୁରକ୍ଷିତ କଣ୍ଡୋମ ବ୍ୟବହାରରେ ରାଜ୍ୟ ପୁରା ତଳମୁହାଁ। ଗତ ୬ବର୍ଷ ଭିତରେ ୮ ପ୍ରତିଶତ କମିଛି କଣ୍ଡୋମ ବ୍ୟବହାରକାରୀଙ୍କ ସଂଖ୍ୟା।
ଚଳିତ ଅର୍ଥନୈତିକ ରିପୋର୍ଟ କହୁଛି, ୨୦୧୮-୧୯ ମସିହାରେ ୨୪.୪ ପ୍ରତିଶତ ଲୋକେ କରୁଥିଲେ କଣ୍ଡୋମ ବ୍ୟବହାର। ହେଲେ ୨୦୨୩-୨୦୨୪ ମସିହାରେ ଏହି ସଂଖ୍ୟା ଖସି ୧୬.୧ ପ୍ରତିଶତରେ ପହଞ୍ଚିଛି। କେବଳ ସେତିକି ନୁହେଁ, ପରିବାର ନିୟନ୍ତ୍ରଣ ପାଇଁ ଆହୁରି କେତେ ଉପାୟ ଅଛି। ହେଲେ ସେଥିମଧ୍ୟରୁ ଗର୍ଭନିରୋଧକ ଉପକରଣ(ଆଇୟିସିଡି), ଗର୍ଭନିରୋଧକ ବଟିକା(ଓସିପି) ବ୍ୟବହାର, ମହିଳା ଓ ପୁରୁଷ ବନ୍ଧ୍ୟାକରଣ ମଧ୍ୟ କମିଚାଲିଛି। ଯାହାକୁ ନେଇ ଚିନ୍ତା ପ୍ରକଟ କରଛି ସ୍ୱାସ୍ଥ୍ୟ ବିଭାଗ। କଣ୍ଡୋମ ବ୍ୟବହାରକୁ କେମିତି ବୃଦ୍ଧି କରାଯିବ ସେଥିପାଇଁ ଲାଗିପଡ଼ିଲାଣି ସ୍ୱାସ୍ଥ୍ୟ ବିଭାଗ।
ସହରାଞ୍ଚଳରେ ଥିବା ଫାଷ୍ଟ ରେଫରାଲ ୟୁନିଟ୍, ସହରାଞ୍ଚଳ ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର ଓ ସହରାଞ୍ଚଳ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଥିବା ପୁରୁଷ ଶୌଚାଳୟ ଭିତରେ ରଖାଯାଉଛି କଣ୍ଡୋମ ବକ୍ସ। ସେଠାରୁ ବିନା ସଙ୍କୋଚରେ ପୁରୁଷମାନେ ଆଣିପାରିବେ କଣ୍ଡୋମ। ହେଲେ ବିଡ଼ମ୍ବନା ଏ ବିଷୟରେ ଆଜି ପର୍ଯ୍ୟନ୍ତ ବହୁ ଲୋକ ଅଜଣା। ଏପରିକି ସେଠାରେ କଣ୍ଡୋମ ବକ୍ସ ମଧ୍ୟ ରହୁନି। ଖାଲି ସେତିକି ନୁହେଁ ନବବିବାହିତ ଦମ୍ପତିଙ୍କୁ ପରିବାର ନିୟନ୍ତ୍ରଣ ଯୋଜନା ବିଷୟରେ ସଚେତନ କରିବାକୁ ୨୦୨୨ରେ ରାଜ୍ୟ ସ୍ୱାସ୍ଥ୍ୟ ବିଭାଗ ପକ୍ଷରୁ ଆରମ୍ଭ ହୋଇଥିଲା ‘ନୟି ପହଲ’ ଯୋଜନା। ଜାତୀୟ ସ୍ୱାସ୍ଥ୍ୟ ମିଶନ ଅଧୀନରେ ମଧ୍ୟ ଥିଲା ଏହି ଯୋଜନା। ଆଶା କର୍ମୀମାନେ ନବବିବାହିତ ଦମ୍ପତିଙ୍କ ଘରକୁ ଯାଇ ଏକ ୱେଡିଂ କିଟ୍ ଦେବାର ପ୍ରାବଧାନ ହୋଇଥିଲା। ହେଲେ ପରବର୍ତ୍ତୀ ସମୟରେ ଯୋଜନାଟି ଫେଲ୍ ମାରିଲା।
ତଥ୍ୟ କହୁଛି, ରାଜ୍ୟରେ କଣ୍ଡୋମ ବ୍ୟବହାର ହାର ୨୦୧୯-୨୦ରେ ୨୧.୮ ପ୍ରତିଶତ, ୨୦-୨୧ରେ ୨୦.୬ ପ୍ରତିଶତ, ୨୧-୨୨ ଓ ୨୨-୨୩ରେ ୧୭.୫ ପ୍ରତିଶତ ଥିଲା । ସେହିପରି ଆଇୟୁସିଡି ହାର ୨୦୧୮ରେ ୩୧.୮ ପ୍ରତିଶତ ଥିବାବେଳେ ୨୦୨୩-୨୪ରେ ଏହା ୧୭.୯ ପ୍ରତିଶତକୁ ଖସିଆସିଛି । ଓସିପି ହାର ୨୦୧୮-୧୯ରେ ୨୬.୭ ପ୍ରତିଶତ ଥିବା ବେଳେ ୨୦୨୩-୨୪ରେ ୧୬.୬ ପ୍ରତିଶତ ରହିଛି । ମହିଳା ବନ୍ଧ୍ୟାକରଣ ୨୦୧୮-୧୯ରେ ୧୫.୬ ପ୍ରତିଶତ ଓ ୨୦୨୩-୨୪ରେ ୮.୬ ପ୍ରତିଶତ ରହିଛି । ଏଥିସହ ପୁରୁଷ ବନ୍ଧ୍ୟାକରଣ ହାର ୨୦୧୮- ୧୯ରେ ୦.୩ ପ୍ରତିଶତ ଥିବା ବେଳେ ୨୦୨୩- ୨୪ରେ ୦.୨ ପ୍ରତିଶତ ରହିଛି । ତେଣୁ ଏଦିଗରେ ବ୍ୟାପକ ସଚେତନତା ଆବଶ୍ୟକ ବୋଲି ସ୍ୱାସ୍ଥ୍ୟ ବିଶେଷଜ୍ଞମାନେ କହିଛନ୍ତି।
ଏହି ଖବରଟିକୁ ପଢନ୍ତୁ-ତୃତୀୟ ଥର ପାଇଁ ମା’ ହେଲା ବାଘୁଣୀ ଅଙ୍କିତା, ଗୋଟିଏ ଶାବକକୁ ଦେଲା ଜନ୍ମ
