ଭୁବନେଶ୍ୱର,୨୦/୦୧: ସରକାରୀ ଅଧିକାରୀମାନେ ବ୍ୟବହାର କରୁଥିବା ଗାଡ଼ିର ଭଡ଼ା ବାବଦକୁ ଏଣିକି ଅଧିକ ଅର୍ଥ ଗଣିବେ । ଆସନ୍ତା ଫେବ୍ରୁଆରୀ ମାସରୁ ଏହି ସଂଶୋଧିତ ଭଡ଼ା ଲାଗୁ ହେବ ବୋଲି ରାଜ୍ୟ ଅର୍ଥ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି ।
ବିଜ୍ଞପ୍ତି ଅନୁସାରେ, ସଚିବ ଓ ତଦୁଦ୍ଧ୍ୱର୍, ଅତିରିକ୍ତ ସଚିବ, ବିଭାଗୀୟ ମୁଖ୍ୟ ଓ ଜିଲ୍ଲାପାଳଙ୍କ ସମେତ ଆଇଜି ଓ ତଦୁଦ୍ଧ୍ୱର୍ ପାହ୍ୟାର ଆଇପିଏସ୍ ଅଧିକାରୀ, ସିସିଏଫ୍ ଓ ତଦୁର୍ଦ୍ଧ୍ୱ ପାହ୍ୟାର ଆଇଏଫ୍ଏସ୍ ଅଧିକାରୀ, କମିଶନର ପାହ୍ୟାର ଆଇଏଏସ୍ ଅଫିସରମାନେ ବ୍ୟକ୍ତିଗତ କାର୍ଯ୍ୟ ପାଇଁ ସରକାରୀ ଗାଡ଼ିକୁ ସଂଶୋଧିତ ଭଡ଼ା ଦେଇ ଉପଯୋଗ କରିପାରିବେ । ଏବେ ବ୍ୟକ୍ତିଗତ କାର୍ଯ୍ୟରେ ସରକାରୀ ଗାଡ଼ିର ଉପଯୋଗ ପାଇଁ ସର୍ବାଧିକ ୩୦୦ କିମି ପର୍ଯ୍ୟନ୍ତ ଅଫିସରଙ୍କୁ ମାସିକ ୨୫୨୦ଟଙ୍କା ଏବଂ ୩୦୦ରୁ ୫୦୦କିମି ପର୍ଯ୍ୟନ୍ତ ମାସିକ ୪୨୦୦ ଟଙ୍କା ଦେବାକୁ ପଡ଼ୁଛି । ସଂଶୋଧିତ ଦରରେ ଯଥାକ୍ରମେ ୩୭୮୦ଟଙ୍କା ଓ ୬୩୦୦ଟଙ୍କା ଦେବାକୁ ପଡ଼ିବ ।
ସେହିପରି ବାସଭବନରୁ କାର୍ଯ୍ୟାଳୟ ଯିବା ନିମନ୍ତେ ବିଭିନ୍ନ ବର୍ଗର ଅଧିକାରୀଙ୍କ ନିମନ୍ତେ ଥିବା ଭଡ଼ାକୁ ମଧ୍ୟ ସଂଶୋଧନ କରାଯାଇଛି । ସଚିବ, ଅତିରିକ୍ତ ସଚିବ, ବିଭାଗୀୟ ମୁଖ୍ୟ ଓ ଆର୍ଡିସିଙ୍କୁ ଏଣିକି ମାସିକ ୧୬୮୦ ଟଙ୍କା ବଦଳରେ ୨୫୨୦ ଟଙ୍କା, ପ୍ରଶାସନିକ ବିଭାଗୀୟ ଅଧିକାରୀ ଓ ମିଳିତ ଭାବେ ଗାଡ଼ି ଉପଯୋଗ କରୁଥିବା ବିଭାଗୀୟ ଅଧିକାରୀଙ୍କୁ ମାସିକ ୧୧୨୦ଟଙ୍କା ପରିବର୍ତ୍ତ୧୬୮୦ଟଙ୍କା, ସରକାରୀ ଗାଡ଼ି ପାଇଥିବା ଅନ୍ୟ ଅଧିକାରୀଙ୍କୁ ମାସିକ ୧୪୦୦ ଟଙ୍କା ପରିବର୍ତ୍ତେ ୨୧୦୦ ଟଙ୍କା ଏବଂ ଜିଲ୍ଲାପାଳ, ଅତିରିକ୍ତ ଜିଲ୍ଲାପାଳ ଓ ଏସ୍ପିଙ୍କୁ ମାସିକ ୧୧୨୦ଟଙ୍କା ପରିବର୍ତ୍ତେ ୧୬୮୦ଟଙ୍କା ଭଡ଼ା ଦେବାକୁ ପଡ଼ିବ ।
ଅପରପକ୍ଷେ, ଭୁବନେଶ୍ୱରରୁ କଟକକୁ ଅବା କଟକରୁ ଭୁବନେଶ୍ୱରକୁ ଅଫିସ୍ କାର୍ଯ୍ୟ ପାଇଁ ଯାଉଥିବା ଅଧିକାରୀଙ୍କ ମାସିକ ଗାଡ଼ି ଭଡ଼ା ପୂର୍ବ ଭଳି ୬ହଜାର ଟଙ୍କା ରହିଛି । ତେବେ ଗୋଟିଏ ଗାଡ଼ିକୁ ଯଦି ମିଳିତ ଭାବେ ଅଧିକାରୀମାନେ ବ୍ୟବହାର କରିବେ ତା'ହେଲେ ସେମାନଙ୍କଠୁ ଭଡ଼ା ସମାନ ଭାଗ କରି ଆଦାୟ କରାଯିବ । ତେଲ ଦର ବଢ଼ିଥିବାରୁ ୮ବର୍ଷ ପରେ ଏହି ଭଡ଼ାରେ ସଂଶୋଧନ ଆବଶ୍ୟକ ହୋଇପଡ଼ିଛି ବୋଲି ଅର୍ଥ ବିଭାଗ ପକ୍ଷରୁ ସୂଚନା ମିଳିଛି ।
