କଟକ, ୨୦/୦୧: କଟକ ସହରକୁ ଜଳବନ୍ଦୀ-ମୁକ୍ତ କରିବା ତଥା ସହରରୁ ବର୍ଷାଜଳ ନିଷ୍କାସନ କରିବା ଆଳରେ ପୁଣି ପୁଳା ପୁଳା ଟଙ୍କା ହରିଲୁଟ୍ ଯୋଜନା ଆରମ୍ଭ କରିବାକୁ ଯାଉଛି କଟକ ମହାନଗର ନିଗମ । ଆସନ୍ତା ୩ ବର୍ଷ ପାଇଁ ପୁଣି ଏକ ପ୍ରୋଗାମ୍ ମ୍ୟାନେଜ୍ମେଣ୍ଟ୍ କନ୍ସଲ୍ଟାଣ୍ଟ୍ (ପିଏମ୍ସି) ସର୍ଭିସ୍ କାର୍ଯ୍ୟକ୍ଷମ କରାଯିବ । ପାଖାପାଖି ୧୫ ଜଣ ଯନ୍ତ୍ରୀ ଓ ଏକ୍ସପର୍ଟଙ୍କୁ ନେଇ ଗଠନ ହେବାକୁ ଥିବା ଏହି ପିଏମ୍ସି ସହରର ବର୍ଷା ଜଳ ନିଷ୍କାସନ କ୍ଷେତ୍ରରେ ଡ୍ରେନ୍ ନିର୍ମାଣ ଦିଗରେ ପରାମର୍ଶ ପ୍ରଦାନ କରିବା ସହିତ ପୂରା ବ୍ୟବସ୍ଥାର ତଦାରଖ କରିବ । ଅର୍ଥାତ୍ ପରାମର୍ଶ ସେବା ଯୋଗାଇବ ।
ବିସ୍ମୟର କଥା ହେଉଛି ଯେ, ସିଏମ୍ସିରେ ନିଜର ୨୫ରୁ ଅଧିକ ଅଭିଜ୍ଞ ଯନ୍ତ୍ରୀ ରହିଛନ୍ତି । ସେମାନଙ୍କୁ ସହଯୋଗ କରିବା ପାଇଁ ପିଏମ୍ୟୁ ସେଲ୍ରେ ଅନେକ ଯନ୍ତ୍ରୀ ବି ରହିଛନ୍ତି । ଏମାନଙ୍କୁ ଛାଡ଼ି ପୁଣି ୩ ବର୍ଷ ପାଇଁ ପରାମର୍ଶ ସେବା ଯୋଗାଇବାକୁ ପିଏମ୍ସି କାର୍ଯ୍ୟକ୍ଷମ ହେବ । ଏଣୁ ସିଏମ୍ସି କର୍ତ୍ତୃପକ୍ଷ ପିଏମ୍ସି ଆଳରେ ୪ କୋଟିର ଟେଣ୍ଡର୍ ଡାକିବା ଅନେକ ପ୍ରଶ୍ନବାଚୀ ସୃଷ୍ଟି କରିଛି । କେବଳ ସେତିକି ନୁହେଁ, ଏହି ୪ କୋଟି ଟଙ୍କାର ଟେଣ୍ଡର୍ ସମ୍ପର୍କରେ କାଉନ୍ସିଲ୍ ଆଦୌ ଅବଗତ ନଥିବାରୁ ଟେଣ୍ଡର୍ର ସ୍ୱଚ୍ଛତା ଉପରେ ବି ସନ୍ଦେହ ପ୍ରକାଶ ପାଇଛି । କଟକ ସହରରେ ଡ୍ରେନ୍ ବ୍ୟବସ୍ଥା ସହିତ ସମସ୍ତ ପ୍ରକାରର ଉନ୍ନତିମୂଳକ କାର୍ଯ୍ୟ କରିବା ପାଇଁ ସିଏମ୍ସିର ସ୍ୱତନ୍ତ୍ର ଯନ୍ତ୍ରୀ ବିଭାଗ ରହିଛି । ଏହି ବିଭାଗରେ ପୂର୍ଣ୍ଣ ଅଭିଜ୍ଞତା ସଂପନ୍ନ ଜଣେ ନଗର ଯନ୍ତ୍ରୀ, ୩ଜଣ ନିର୍ବାହୀ ଯନ୍ତ୍ରୀ, ୩ ଜଣ ସହକାରୀ ଯନ୍ତ୍ରୀ, ୧୨ ଜଣ ପାଖାପାଖି କନିଷ୍ଠ ଯନ୍ତ୍ରୀ(ଜେଇଇ) ଓ ୧୫ ଜଣ ପାଖାପାଖି ୱାର୍କସରକାର ରହିଛନ୍ତି ।
ସେମାନଙ୍କୁ ସହଯୋଗ କରିବା ପାଇଁ ୩ ବର୍ଷ ହେବ ଏକ ପ୍ରୋଗ୍ରାମ୍ ମ୍ୟାନେଜ୍ମେଣ୍ଟ୍ ୟୁନିଟ୍ (ପିଏମ୍ୟୁ) ସେଲ୍ ରହିଛି । ସେଠାରେ ମଧ୍ୟ ୫ ରୁ ଅଧିକ ଅଭିଜ୍ଞ ଯନ୍ତ୍ରୀ ରହିଛନ୍ତି । ସରକାରୀ ଯନ୍ତ୍ରୀମାନଙ୍କ ଦରମା ବାଦ୍ ସିଏମ୍ସି ପାଣ୍ଠିରୁ ପିଏମ୍ୟୁ ସେଲ୍ ବାବଦକୁ ମାସିକ ୧୦ ଲକ୍ଷ ଟଙ୍କା ଖର୍ଚ୍ଚ ହେଉଛି । ଏବେ ପୁଣି ଅଧିକରୁ ଅଧିକ ଯନ୍ତ୍ରୀ ଆବଶ୍ୟକ କରାଯିବା ସହିତ ସିଏମ୍ସି ୪ କୋଟି ଟଙ୍କାର ଟେଣ୍ଡର୍ ଆହ୍ୱାନ କରିଛି । ତେବେ ଏତେ ସଂଖ୍ୟକ ଯନ୍ତ୍ରୀ ଥାଇ ମଧ୍ୟ ସେମାନେ କିଭଳି ଫେଲ୍ ମାରିଲେ ତାହାକୁ ନେଇ ଚିନ୍ତା । ଏ ସମ୍ପର୍କରେ ପୂର୍ବରୁ କାଉନ୍ସିଲ୍ରେ ଅନୁମୋଦନ କରାନଯିବା କିମ୍ବା ଆଲୋଚନା ହୋଇନଥିବା ୱାର୍କସ୍ ଷ୍ଟାଣ୍ଡିଂ କମିଟି ଅଧ୍ୟକ୍ଷ ପ୍ରଦୀପ୍ତ କିଶୋର ଖୁଣ୍ଟିଆ ଅଭିଯୋଗ ଆଣିଛନ୍ତି ।
ବିରୋଧୀ ଦଳ କର୍ପୋରେଟର ସନ୍ତୋଷ ଭୋଳ କହିଛନ୍ତି ଯେ, ଏହା କେବଳ ଟଙ୍କା ହରିଲୁଟ୍ କରିବାର ନୂଆ ବାଟ । କମିସନର ଅନାମ ଚରଣ ପାତ୍ର ମଧ୍ୟ ଏହି ଯୋଜନାକୁ ସମାଲୋଚନା କରିଛନ୍ତି ।
