ଭୁବନେଶ୍ୱର,୨୦/୦୧: ଠକେଇ ଅଭିଯୋଗରେ ଗିରଫ ହୋଇଥିବା ବିଷ୍ଣୁପ୍ରିୟା ଚାନ୍ଦ ଓରଫ ରାକ୍ଷୀ ଓରଫ ହଂସିକାଙ୍କ ମାମଲା ଦିନକୁ ଦିନ ନୂଆ ମୋଡ଼ ନେଉଛି । ୫୦ କୋଟି ଡିଲ୍କୁ ନେଇ ହୋଇଥିବା ବିବାଦକୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଖୋଳତାଡ଼ କରିବ ବୋଲି ଜଣାପଡ଼ିଛି । ଏନେଇ ଇଡିର ଅଧିକାରୀମାନେ ଆୟକର ବିଭାଗ ସହ ଯୋଗାଯୋଗ କରିଛନ୍ତି । ଟଙ୍କା କେଉଁଠୁ ଆସିଥିଲା ? କିଏ ଦେଇଥିଲା ? କାହାକୁ ଦେଇଥିଲା । କେଉଁ ମାଧ୍ୟମରେ ଦେଇଥିଲା ଇଡି ଏହାର ଖୋଳତାଡ଼ କରିବ ।
ଗତ ୨୮ ତାରିଖରେ ଗିରଫ ହୋଇଥିଲେ ହଂସିକା ଓ ତାଙ୍କ ସହଯୋଗୀ ଅନିଲ୍ ମହାନ୍ତି । ବିଏନ୍ଏସ୍ ୩୨୯ (ଗୃହରେ ଅନଧିକାର ପ୍ରବେଶ), ୩୧୮ (ପ୍ରବଞ୍ଚନା) ଓ ୩୧୯ (ଛଦ୍ମବେଶ ଧାରଣ କରି ପ୍ରବଞ୍ଚନା) । ଏ ସବୁ ଦଫାରେ ସଜା ୭ ବର୍ଷକୁ କମ୍ ଥିବାରୁ ପୁଲିସ୍ ଅଭିଯୁକ୍ତମାନଙ୍କୁ ନୋଟିସ୍ ଦେଇ ଛାଡ଼ି ପାରିବ । ହେଲେ ଇନ୍ଫୋସିଟି ଥାନା ପୁଲିସ୍ ସେମାନଙ୍କୁ ଜେଲ୍ ପଠାଇଥିଲା । ପରେ ଉକ୍ତ ମାମଲାର ତଦନ୍ତ ଭାର ନେଇଥିଲା ସ୍ପେଶାଲ୍ କ୍ରାଇମ୍ ୟୁନିଟ୍ । ସେ ସମୟରେ ଜଣା ପଡ଼ିଥିଲା ଜଣେ ଶିକ୍ଷାନୁଷ୍ଠାନ ମାଲିକଙ୍କ ସହ କୋଟି କୋଟି ଟଙ୍କାର ଡିଲ୍ ବିବାଦରୁ ଏ ସବୁ କାଣ୍ଡ ଘଟିଛି ।
ଶିକ୍ଷାନୁଷ୍ଠାନ ମାଲିକଙ୍କୁ ୫୦ କୋଟି ଡୋନେସନ୍ କରାଇ ଦେବାକୁ କହିଥିଲେ ହଂସିକା । ସେଥିପାଇଁ ହଂସିକାକୁ ୨୦% କମିଶନ ଦେବେ ବୋଲି କହିଥିଲେ ଶିକ୍ଷାନୁଷ୍ଠାନ ମାଲିକ । ହଂସିକା ଏଥିରେ ସଫଳ ହୋଇଥିଲେ । ୫୦ କୋଟି ଟଙ୍କାର କଳାଧନକୁ ବିଭିନ୍ନ ଏନ୍ଜିଓ ସଂସ୍ଥା ଜରିଆରେ ଧରାଧରି କରି ଶିକ୍ଷାନୁଷ୍ଠାନ ମାଲିକକକୁ ଟଙ୍କା କରାଇ ଦେଇଥିଲେ ହଂସିକା । ହେଲେ ଶିକ୍ଷାନୁଷ୍ଠାନ ମାଲିକ ହଂସିକାଙ୍କୁ କମିଶନ ଦେଇ ନଥିଲେ । ଫଳରେ ହଂସିକାଙ୍କ ସହ ଏହି ବିବାଦ ଦେଖା ଦେଇଥିଲା । ସ୍ପେଶାଲ୍ କ୍ରାଇମ୍ ୟୁନିଟ୍ର ତଦନ୍ତ ପରେ ଆୟକର ବିଭାଗ ମଧ୍ୟ ଏହି ୫୦ କୋଟିର କାରବାର ବିଷୟରେ ଜାଣିବାକୁ ପାଇଥିଲା । ଏବେ ଏ ସବୁ ଯାଞ୍ଚ ଇଡି ଆରମ୍ଭ କରିଛି । ଏହି କୋଟି କୋଟି ଟଙ୍କା ଡୋନେସନ୍ ପଛରେ ଶିକ୍ଷାନୁଷ୍ଠାନମାଲିକଙ୍କ କେଉଁ ଉଦ୍ଦେଶ୍ୟ ରହିଛି ତାହା ଜାଣିବା ପାଇଁ ତନାଘନା ଆରମ୍ଭ କରି ଦେଇଛି ଇଡି । ଏଥିରେ କିଛି ନେତାଙ୍କ ଲିଙ୍କ୍ ରହିଛି ବୋଲି ଜଣାପଡ଼ିଛି । ଖୁବ୍ଶୀଘ୍ର ଇଡି ସେମାନଙ୍କୁ ନୋଟିସ୍ କରି ଜେରା କରିବ ।
ଅନ୍ୟପକ୍ଷରେ ସ୍ପେଶାଲ୍ କ୍ରାଇମ୍ ୟୁନିଟ୍ ପକ୍ଷରୁ ଅଭିଯୋଗ ପରେ ଇନ୍ଫୋସିଟି ଥାନାରେ ପୁଣି ଏକ ମାମଲା ରୁଜୁ ହୋଇଛି । ଏତଲା ଦେଇଥିଲେ ସ୍ପେଶାଲ୍ କ୍ରାଇମ୍ ୟୁନିଟ୍ର ଇନ୍ସପେକ୍ଟର ତଥା ତଦନ୍ତକାରୀ ଅଧିକାରୀ ଏମ୍.କେ ଦାସ । ସେ ଏତଲାରେ ଦର୍ଶାଇଛନ୍ତି, ହଂସିକା ଦେଶ-ବିଦେଶରୁ ଯୁବତୀଙ୍କୁ ଆଣି ନେତା, ଖଣି ବ୍ୟବସାୟୀ ଓ ବଡ଼ ବଡ଼ ଅଧିକାରୀମାନଙ୍କ ପାଖକୁ ପଠାଉଥିଲେ । ସେ ସବୁ ଯୁବତୀଙ୍କ ଜରିଆରେ ଅନ୍ତରଙ୍ଗ ସମୟର ଫଟୋ ସଂଗ୍ରହ କରୁଥିଲେ ହଂସିକା । ତା’ପରେ ସେ ଫଟୋ ଜରିଆରେ ବ୍ଲାକ୍ ମେଲିଂ କରି କୋଟି କୋଟି ଟଙ୍କା ରୋଜଗାର କରୁଥିଲେ । ଏସବୁ ତଥ୍ୟ ହଂସିକାଙ୍କ ମୋବାଇଲ୍ରୁ ମିଳିବା ପରେ ଥାନାରେ ଅଭିଯୋଗ ହୋଇଛି । ପୁଲିସ୍ ମାମଲା ରୁଜୁ କରି ହଂସିକାଙ୍କ ବିରୋଧରେ ଆଇପିସି ଦଫା ୧୨୦ ବି (ଅପରାଧିକ ଷଡଯନ୍ତ୍ର), ଇମୋରାଲ୍ ଟ୍ରାଫିକିଂ (ପ୍ରିଭେନ୍ସନ୍) ଆକ୍ଟ-୫ ଲଗାଇଛି ।
ତା’ଛଡ଼ା ନକଲି କାଗଜ ପତ୍ର ଦେଇ ପାସ୍ପୋର୍ଟ ହାତେଇଥିଲେ ହଂସିକା । ଏ କଥା ସ୍ପେଶାଲ୍ କ୍ରାଇମ୍ ୟୁନିଟ୍ ଜାଣିବା ପରେ ଇନ୍ଫୋସିଟି ଥାନାରେ ଦୁଇ ଦିନ ତଳେ ଏତଲା ଦେଇଥିଲେ । ଏନେଇ ଇନ୍ଫୋସିଟି ଥାନା ୧୧/୨୦୨୫ରେ ଏକ ମାମଲା ରୁଜୁ କରିବା ସହ ଆଇପିସି ଦଫା ୪୧୭, ୪୧୯, ୪୨୦, ୪୬୮, ୪୭୧, ୧୨ ପାସ୍ପୋର୍ଟ ଆକ୍ଟରେ ଲାଗାଇ ତଦନ୍ତ କରୁଛି । ଏହାରି ଭିତରେ ଇନ୍ଫୋସିଟି ଥାନାର ପୂର୍ବତନ ଆଇଆଇସିଙ୍କ ପାଇଁ ଅଡୁଆ ବଢ଼ିଛି । କାରଣ ୨୦୦୮ ମସିହାରେ ଉତ୍ତରପ୍ରଦେଶ ଗ୍ୟାଙ୍ଗ୍ ଷ୍ଟାର ବ୍ରିଜେସ୍ ସିଂହଙ୍କୁ କମିଶନରେଟ୍ ପୁଲିସ୍ ଗିରଫ କରିଥିଲା । ତଦନ୍ତ ସମୟରେ ଜଣାପଡ଼ିଥିଲା ସେ ଓଡ଼ିଶାରୁ ପାସ୍ପୋର୍ଟ ହାତେଇଛି । ତା’ପୁଣି ନକଲି କାଗଜ ପତ୍ର ମାଧ୍ୟମରେ । ପାସ୍ପୋର୍ଟ ନୟାପଲ୍ଲୀ ଥାନା ପୁଲିସ୍ ଯାଞ୍ଚ କରିଥିଲା । ସେଥିପାଇଁ ସେତେବେଳେ ନୟାପଲ୍ଳୀ ଥାନା ଅଧିକାରୀଙ୍କୁ ନିଲମ୍ବିତ କରାଯାଇଥିଲା । ଏବେ ହଂସିକାଙ୍କ କ୍ଷେତ୍ରରେ ସମାନ ଘଟଣା ଘଟିଛି । ପୁଲିସ୍ର ଅବହେଳା ପାଇଁ ସେ ନକଲି କାଗଜ ପତ୍ରରେ ପାସ୍ପୋର୍ଟ ହାତେଇ ବିଦେଶ ବୁଲିବାକୁ ଯାଇଥିଲେ । ସେ ଯେଉଁ ମସିହାରେ ପାସ୍ପୋର୍ଟ ପାଇଥିଲେ ସେତେବେଳେ ଇନ୍ଫୋସିଟି ଥାନା ଦାୟିତ୍ୱରେ ଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୁଲିସ୍ କମିଶନର ଏସ୍. ଦେବ ଦତ୍ତ ସିଂହ ସୂଚନା ଦେଇଛନ୍ତି ।
ହଂସିକାଙ୍କ ମୋବାଇଲ୍ ଫୋନ୍ରୁ ପୁଲିସ୍ ଯେଉଁ ସବୁ ତଥ୍ୟ ପାଇଥିଲା ସେ ଆଧାରରେ ଆଉ ଏକ ଏତଲା ଦିଆଯାଇଛି । ଏହାରି ଭିତରେ ଉପକୂଳ ଓଡ଼ିଶାର ଚର୍ଚ୍ଚିତ ବ୍ୟକ୍ତି ତଥା ସାନବାବୁ ନାଁରେ ପରିଚିତ ଜଣେ ନେତା ସହ ହଂସିକାଙ୍କ ଲିଙ୍କ୍ ମିଳିଛି । ୨୦୨୩ ଶେଷ ଆଡ଼କୁ ହଂସିକାଙ୍କ ସହ ସାନବାବୁ ସିଙ୍ଗାପୁର ଯାଇଥିଲେ । ତା’ପୁଣି ଏକ ବ୍ୟବସାୟିକ ଡିଲ୍ରେ । ହେଲେ ସିଙ୍ଗାପୁରରେ କି ଡିଲ୍ ହେଲା, ତାହା କେବଳ ସାନବାବୁ ଓ ହଂସିକାଙ୍କୁ ଜଣାଥିବ । ଏ ସବୁର ଗୁମର ଖୋଲିବା ପାଇଁ ପୁଲିସ୍ ତାଙ୍କୁ ଦ୍ୱିତୀୟ ପର୍ଯ୍ୟାୟ ରିମାଣ୍ଡରେ ଆଣିବ ବୋଲି ଜଣାପଡିଛି ।
