କଟକ,୧୩/୦୨: ଓଡ଼ିଶା କ୍ରିକେଟ୍ ଆସୋସିଏସନ୍(ଓସିଏ)ର ସଭାପତି ପଦ ପାଇଁ ନାମାଙ୍କନ ପତ୍ର ଦାଖଲ ପ୍ରକ୍ରିୟା ଶେଷ ହୋଇଛି । ବୁଧବାର ଏକମାତ୍ର ପ୍ରାର୍ଥୀ ଭାବେ ପଙ୍କଜଲୋଚନ ମହାନ୍ତି ନାମାଙ୍କନପତ୍ର ଦାଖଲ କରିଥିଲେ । ସେ ଏକ ପ୍ରକାର ନିଦ୍ୱର୍ନ୍ଦ୍ୱରେ ବିଜୟୀ ହୋଇଛନ୍ତି । ଆସନ୍ତା ୨୩ ତାରିଖରେ ଆନୁଷ୍ଠାନିକ ଭାବେ ବିଜେତାଙ୍କ ନାମ ଘୋଷଣା ହେବ ।
ଡିସେମ୍ବର ୨୯ ତାରିଖରେ ପୂର୍ବତନ ବିଧାୟକ ପ୍ରଣବପ୍ରକାଶ ଦାସ ଓସିଏ ସଭାପତି ପଦବିରୁ ଇସ୍ତଫା ଦେବା ପରେ ଏହି ପଦକ ଫାଙ୍କା ପଡ଼ିଥିଲା । ୪୫ ଦିନ ମଧ୍ୟରେ ସଭାପତି ପଦ ପୂରଣ ପାଇଁ ଓସିଏ ସମ୍ବିଧାନର ନିୟମ ରହିଛି । ସେଥିପାଇଁ ନିର୍ବାଚନ ପ୍ରକ୍ରିୟା ଆରମ୍ଭ ହୋଇଛି ।
ଶ୍ରୀ ମହାନ୍ତି ବୁଧବାର ନିର୍ଦ୍ଧାରିତ ସମୟ ମଧ୍ୟରେ ନିର୍ବାଚନ ଅଧିକାରୀ ଏମ୍.ଏଲ୍ ମଜୁମଦାରଙ୍କ ନିକଟରେ ପ୍ରାର୍ଥୀପତ୍ର ଦାଖଲ କରିଥିଲେ । ପ୍ରାର୍ଥୀପତ୍ର ଯାଞ୍ଚ୍ କରାଯାଇ ୧୫ ତାରିଖରେ ପ୍ରାର୍ଥୀ ତାଲିକା ଘୋଷଣା କରାଯିବ । ପ୍ରାର୍ଥୀପତ୍ର ନାକଚ ନହେଲେ ପଙ୍କଜ ନିଦ୍ୱର୍ନ୍ଦ୍ୱରେ ସଭାପତି ନିର୍ବାଚିତ ହେବେ । ସମ୍ପ୍ରତି ଉପସଭାପତି ପଦରେ ଥିବା ପଙ୍କଜ ସଭାପତି ହେଲେ ଓସିଏର ଉପସଭାପତି ପଦ ପୁଣି ଥରେ ଫାଙ୍କା ହେବ । ଏଥିନିମନ୍ତେ ଆଗାମୀ ଦିନରେ ଆଉ ଏକ ଉପନିର୍ବାଚନ ହେବା ନିଶ୍ଚିତ ।
ଗତ ୧୦ ତାରିଖ ସୁଦ୍ଧା ନୂତନ ସଭାପତି ଦାୟିତ୍ୱ ଗ୍ରହଣ କରିବା କଥା । ମାତ୍ର ଏହା ପୂର୍ବ ଦିନ ବାରବାଟୀ ଷ୍ଟାଡିୟରେ ଭାରତ-ଇଂଲଣ୍ଡ ମ୍ୟାଚ ରହିଥିବାରୁ ସ୍ୱତନ୍ତ୍ର ସାଧାରଣ ପରିଷଦ ବୈଠକ ଏବଂ ସଭାପତି ନିମନ୍ତେ କର୍ମକର୍ତ୍ତା ନିର୍ବାଚନକୁ ୨୩ ତାରିଖକୁ ଘୁଞ୍ଚାଇ ଦିଆଯାଇଥିଲା ।
