ନୂଆଦିଲ୍ଲୀ,୨୨/୧୧ : ବିଶ୍ବକପ ୨୦୨୩ଶେଷ ହୋଇଛି । ଫାଇନାଲ ପର୍ଯ୍ୟନ୍ତ ପହଞ୍ଚିବା ପରେ ମଧ୍ୟ ଟିମ୍ ଇଣ୍ଡିଆ ଟ୍ରଫି ଉଠାଇବାରୁ ବଞ୍ଚିତ ହୋଇଛି । ଏବେ ଭାରତୀୟ କ୍ରିକେଟ ଫ୍ୟାନ୍ସଙ୍କୁ ବିଶ୍ବକପ ଟ୍ରଫି ଟିମ୍ ଇଣ୍ଡିଆ ହାତରେ ଦେଖିବାକୁ ଆହୁରି ୪ବର୍ଷ ଅପେକ୍ଷା କରିବାକୁ ପଡ଼ିବ । ଦିନିକିଆ କ୍ରିକେଟର ଆଗାମୀ ବିଶ୍ବକପ ୨୦୨୭ରେ ହେବାକୁ ଅଛି । ଏହି ବିଶ୍ବକପର ଆୟୋଜନ ଦକ୍ଷିଣ ଆଫ୍ରିକା, ଜିମ୍ବାଓ୍ବେ ଏବଂ ନାମବିୟା ନିକଟରେ ରହିଛି ।
ଏହା ଦ୍ବିତୀୟ ଥର ପାଇଁ ହେବ ଯାହାକି ଆଫ୍ରିକା ମହାଦ୍ବୀପରେ ବିଶ୍ବକପ ଖେଳାଯିବ । ଏହା ପୂର୍ବରୁ ୨୦୦୩ର ଆୟୋଜନ ବି ଆଫ୍ରିକାରେ ହୋଇଥିଲା । ସେତେବେଳେ ଦକ୍ଷିଣ ଆଫ୍ରିକା ଏବଂ ଜିମ୍ବାଓ୍ବେ ସହ କେନିଆ ବିଶ୍ବକପ ମ୍ୟାଚର ଆୟୋଜନ କରିଥିଲେ । ଉକ୍ତ ବିଶ୍ବକପରେ ଦକ୍ଷିଣ ଆଫ୍ରିକା ଏବଂ ଜିମ୍ବାଓ୍ବେ ଗ୍ରୁପ ଷ୍ଟେଜରୁ ବାହାରି ଯାଇଥିଲେ କିନ୍ତୁ କେନିଆ ସେମିଫାଇନାଲ ପର୍ଯ୍ୟନ୍ତ ଯାଇଥିଲା । ସେମିଫାଇନାଲରେ କେନିଆ ଭାରତଠାରୁ ପରାସ୍ତ ହୋଇଥିଲା ।
୨୦ବର୍ଷ ପୂର୍ବରୁ ଆଫ୍ରିକାରେ ହୋଇଥିବା ଏହି ବିଶ୍ବକପ୍ ଟିମ୍ ଇଣ୍ଡିଆ ଲାଗି ସ୍ମରଣୀୟ ଥିଲା। ୧୯୮୩ପରେ ଭାରତୀୟ ଦଳ ପ୍ରଥମ ଥର ବିଶ୍ବକପ ଫାଇନାଲରେ ପହଞ୍ଚି ଥିଲା । ମାତ୍ର ସେତେବେଳେ ବି ଭାରତକୁ ଅଷ୍ଟେ୍ରଲିଆଠାରୁ ପରାଜୟ ହେବାକୁ ପଡ଼ିଥିଲା ।
ଆୟେଜକ ଭାବେ ଦକ୍ଷିଣ ଆଫ୍ରିକା ଏବଂ ଜିମ୍ବାଓ୍ବେ ବିଶ୍ବକପ ୨୦୨୭ଖେଳିବା ଏବେ ନିର୍ଦ୍ଧାର୍ଯ୍ୟ କିନ୍ତୁ ନାମବିୟା ସହ ଏଭଳି ହେବନାହିଁ । ତାକୁ ନିଜ ସ୍ଥାନ ଆାଗାମୀ କିଛି ବର୍ଷରେ ପ୍ରସ୍ତୁତ କରିବାକୁ ପଡ଼ିବ । ନାମବିୟାର ବିଶ୍ବକପ ଏଣ୍ଟ୍ରି ଅନ୍ୟ ଦଳମାନଙ୍କ ଭଳି ହେବ ।
ଆାଗୀମ ବିଶ୍ବକପରେ ୧୪ଟି ଟିମ୍ ଭାଗ ନେବେ । ଏଥିରେ ଦୁଇଟି ଟିମ୍ ପ୍ରଥମରୁ ଚୁଡ଼ାନ୍ତ ହୋଇଛି । ଏହାପରେ ବିଶ୍ବକପ ପୂର୍ବରୁ ଏକ ସମୟସୀମା ମଧ୍ୟରେ ଆଇସିସି ଓ୍ବାନଡେ ରାଙ୍କିଂର ଟପ୍-୮ଟିମ୍କୁ ସିଧାସଳଖ ବିଶ୍ବକପ ଟିକେଟ ମିଳିଯିବ । ବାକି ୪ଟି ଟିମ୍ କ୍ବାଲିଫାଇର୍ସ ମୁକାବିଲାରେ କ୍ରିକେଟର ଏହି ବଡ଼ ଟୁର୍ଣ୍ଣାମେଣ୍ଟରେ ଏଣ୍ଟ୍ରି ନେଇପାରିବେ ।
