ଶ୍ରୀନଗର,୧୭/୧୦: ସଦର୍ଣ୍ଣ ସୁପରଷ୍ଟାର୍ସ ସୁପର ଓଭରରେ କୋଣାର୍କ ସୂର୍ଯ୍ୟସ ଓଡ଼ିଶାକୁ ହରାଇ ଲିଜେଣ୍ଡସ ଲିଗ୍ କ୍ରିକେଟ୍ରେ ଚାମ୍ପିଅନ ହୋଇଛି । ଫାଇନାଲ ମ୍ୟାଚ୍ ବେଶ ଚିତାକର୍ଷକ ହୋଇଥିଲା । ପ୍ରଥମେ ବ୍ୟାଟିଂ କରି ସୁପରଷ୍ଟାର୍ସ ୬ ୱିକେଟ୍ରେ ୧୬୪ ରନ୍ କରିଥିଲା । ଜବାବରେ କୋଣାର୍କ ସୂର୍ଯ୍ୟସ ନିର୍ଦ୍ଧାରିତ ଓଭରରେ ୯ ୱିକେଟ୍ରେ ସମାନ ରନ ସଂଗ୍ରହ କରିବା ପରେ ଖେଳ ସୁପର ଓଭରକୁ ଯାଇଥିଲା
ସୁପର ଓଭରରେ କୋଣାର୍କ ସୂର୍ଯ୍ୟସ ପ୍ରଥମେ ବ୍ୟାଟିଂ କରି ୧ ୱିକେଟ୍ରେ ୧୩ ରନ୍ କରିଥିଲା । ୟୁସୁଫ ପଠାନ ଗୋଟିଏ ଛକା ମାରିଥିଲେ । ଜବାବରେ ମାର୍ଟିନ ଗୁପ୍ତିଲ ଓଭରର ପ୍ରଥମ ୨ଟି ବଲରେ ୨ଟି ବିଶାଳ ଛକା ମାରି ସୁପରଷ୍ଟାର୍ସର ବିଜୟ ସହଜ କରିଥିଲେ । ତୃତୀୟ ବଲରେ ସେ ଆଉଟ୍ ହୋଇଥିଲେ । ପରେ ପୱନ ନେଗି ଓ ଚିରାଗ ଗାନ୍ଧୀ ଦଳକୁ ଜିତାଇଥିଲେ ।
କୋଣାର୍କ ସୂର୍ଯ୍ୟସ ଅଧିନାୟକ ଇରଫାନ ପଠାନ ଟସ୍ ଜିତି ବୋଲିଂ ନିଷ୍ପତ୍ତି ନେଇଥିଲେ । ସଦର୍ଣ୍ଣ ସୁପରଷ୍ଟାର୍ସ ଓପନର ଶ୍ରୀବତ୍ସ ଗୋସ୍ୱାମୀ ଖାତା ଖୋଲି ପାରିନଥିଲେ । ପରେ ହାମିଲଟନ ମାସାକାଡଜା ଖେଳିଥିଲେ ଚମତ୍କାର ଅର୍ଦ୍ଧଶତକୀୟ ଇନିଂସ । ସେ ୫୮ ବଲରୁ ୮ ଚୌକା ଓ ୫ ଛକା ସହ କରିଥିଲେ ୮୩ ରନ୍ । ସେହିପରି ମାର୍ଟିନ ଗୁପ୍ତିଲ ୨୭ ଓ ପୱନ ନେଗିଙ୍କ ୩୩ ରନ ସହାୟତାରେ ଦଳ ୬ ୱିକେଟ୍ ହରାଇ ୧୬୪ ରନ୍ କରିଥିଲା । ଦିଲସାନ ମୁନାବୀରା ୪ଟି ୱିକେଟ୍ ନେଇଥିଲେ ।
ବିଜୟ ଲକ୍ଷ୍ୟକୁ ପିଛା କରି କୋଣାର୍କ ସୂର୍ଯ୍ୟସ କିନ୍ତୁ ଆରମ୍ଭରୁ ବିପର୍ଯ୍ୟୟର ଶିକାର ହୋଇଥିଲା । ଓପନର ରିଚାର୍ଡ ଲେଭି ୧୬, ଦିଲସାନ ୧୧, କେଭିନ ଓ’ବ୍ରାଏନ ୧୭ ଏବଂ ଅଧିନାୟକ ଇରଫାନ ୩ ରନ୍ କରି ଫେରିଥିଲେ । ୟୁସୁଫ ପଠାନ ହିଁ ଦଳର ରକ୍ଷା କବଜ ସାଜିଥିଲେ। ସେ ଏକାକୀ କ୍ରିଜରେ ଛିଡ଼ା ହୋଇ ଦଳକୁ ବିଜୟ ନିକଟତର କରାଇଥିଲେ । ୧୯ ଓଭରରେ ୟୁସୁଫ ୪ଟି ଛକା ଓ ଗୋଟିଏ ଚୌକା ମାରି ଖେଳ ଓଲଟପାଲଟ କରି ଦେଇଥିଲେ । ଅନ୍ତିମ ଓଭରରେ କୋଣାର୍କ ବିଜୟ ପାଇଁ ୭ ରନ୍ ଆବଶ୍ୟକ କରୁଥିଲା । ମାତ୍ର ଓଭରର ଅନ୍ତିମ ବଲରେ ୟୁସୁଫ ୨ ରନ୍ ନେବାକୁ ଯାଇ ରନ୍ ଆଉଟ୍ ହୋଇଥିଲେ । କୋଣାର୍କ ୯ ୱିକେଟ୍ରେ ୧୬୪ ରନ୍ ସଂଗ୍ରହ କରିବା ଫଳରେ ମ୍ୟାଚ୍ ସୁପର ଓଭରକୁ ଯାଇଥିଲା । ୟୁସୁଫ ୩୮ ବଲରୁ ୬ଟି ଚୌକା ଓ ୮ଟି ଛକା ମାରି ୮୫ ରନ୍ କରିଥିଲେ ।