ଭୁବନେଶ୍ୱର,୧୬/୦୭: ନୂଆ ଢାଞ୍ଚା, ନୂଆ ମନ୍ତ୍ର । ପରାଜୟର ଗ୍ଳାନି ଭିତରୁ ବାହାରି ପୁଣି ମଇଦାନରେ ଅଣ୍ଟା ସଳଖିବା ପାଇଁ ବ୍ଲୁ ପ୍ରିଣ୍ଟ ପ୍ରସ୍ତୁତ କରୁଛି ବିଜୁ ଜନତା ଦଳ । ଖୁବଶୀଘ୍ର ଦଳର ହେବାକୁ ଯାଉଛି ନବକଳେବର । ଆସନ୍ତା ୧୦/୧୨ ଦିନ ଭିତରେ ନୂଆ ଟିମ୍ ଘୋଷଣା କରିପାରେ ଦଳ । ଏହି ଟିମ୍ ଛୋଟ ହେବ । ଅଭିଜ୍ଞ ଓ ଓଜନିଆ ନେତାଙ୍କୁ ଏଥିରେ ସ୍ଥାନ ଦେବାକୁ ବିଚାର ବିମର୍ଶ ଚାଲିଛି ।
ନିର୍ବାଚନରେ ପରାଜୟ ପରେ ବିଜେଡି ସଭାପତି ନବୀନ ପଟ୍ଟନାୟକ ପୂର୍ବାପେକ୍ଷା ଅଧିକ ସକ୍ରିୟ ହୋଇ ପଡ଼ିଛନ୍ତି । ଦଳ ସରକାରରୁ ହଟିବା ପରେ ନବୀନ ନୀରବରେ ବସିନାହାନ୍ତି । ଦଳକୁ ସଜାଡ଼ିବାକୁ ନିଜେ ଅଣ୍ଟା ଭିଡ଼ିଛନ୍ତି । ବରିଷ୍ଠ ନେତାଙ୍କ ସହ ଆଲୋଚନା କରି ସଂଗଠନକୁ ସୁଦୃଢ଼ ଓ ସକ୍ରିୟ କରିବାକୁ ଲାଗି ପଡ଼ିଛନ୍ତି । ଏଥିପାଇଁ ପ୍ରଥମେ ମିଡିଆ ଟିମ୍ର ପୁନର୍ବିନ୍ୟାସ କରାଯାଇଥିଲା । ଦଳର ରାଜ୍ୟସ୍ତରୀୟ ସାଂଗଠନିକ ଟିମ୍କୁ ଭଙ୍ଗାଯାଇଛି ।
ସୂତ୍ର ଅନୁସାରେ, ଏବେ ବିଜେଡି ଯେଉଁ ଟିମ୍ ଗଢ଼ିବାକୁ ଯାଉଛି, ତାହା ପୂର୍ବ ଭଳି ଜୁମ୍ବୋ ଟିମ୍ ହେବନି । ଅପେକ୍ଷାକୃତ ଛୋଟ ହେବ । ମନଇଚ୍ଛା କାହାକୁ ସଂଗଠନରେ ଥଇଥାନ କରାଯିବ ନାହିଁ । ପୂର୍ବ କମିଟିରେ ମାଳମାଳ ନେତାଙ୍କୁ ସ୍ଥାନ ଦିଆଯାଇଥିଲା । ଦଳ ଡିଆଁ ଓ ଅସନ୍ତୁଷ୍ଟ ନେତାଙ୍କୁ କମିଟିରେ ଥଇଥାନ କରାଯାଉଥିଲା । ଦାୟିତ୍ୱ ଥାଉ କି ନ ଥାଉ, କିନ୍ତୁ ପଦ ମିଳୁଥିଲା । ଏହାକୁ ଗୁରୁତର ସହ ନେଇଛନ୍ତି ନବୀନ ।
ଏଥର ସଂଗଠନକୁ ବଳୁଆ କରିବା ପାଇଁ ବଛାବଛା ଟାଣୁଆ ସଂଗଠକଙ୍କୁ ସଂଗଠନରେ ସ୍ଥାନ ମିଳିବ । ବହୁ ବଡ଼ ନେତା ରହିବେ ରାଜ୍ୟସ୍ତରୀୟ କମିଟିରେ । ପ୍ରତି ପଦାଧିକାରୀଙ୍କୁ ନିର୍ଦ୍ଦିଷ୍ଟ ଦାୟିତ୍ୱ ବଣ୍ଟାଯିବ । ଅନୁଭବୀ ନେତାମାନଙ୍କ ଅଭିଜ୍ଞତାକୁ ଦଳ ସାଂଗଠନିକ କାର୍ଯ୍ୟରେ ବ୍ୟବହାର କରିବ । ଏହାସହ କିଛି ଯୁବ ନେତାଙ୍କୁ ପଦୋନ୍ନତି ଦେବା ଭଳି ରାଜ୍ୟ କମିଟିରେ ଆଗକୁ ଅଣାଯିବ । ପୂର୍ବପରି ସଂଗଠନ ସମ୍ପାଦକ ପଦ ରହିବ କି ନାହିଁ, ତାହା ସ୍ପଷ୍ଟ ହୋଇନାହିଁ । ଯଦି ଏହି ପଦ ରହିବ, ତେବେ ଏଥିରେ କିଛି ପରିବର୍ତ୍ତନ ହେବ କି ନାହିଁ ତାହା ସ୍ପଷ୍ଟ ହୋଇନି ।
ଆସନ୍ତା ୨୨ ତାରିଖରୁ ବିଧାନସଭା ଅଧିବେଶନ ଆରମ୍ଭ ହେବ । ଚାଲିବ ସେପ୍ଟେମ୍ବର ୧୩ ପର୍ଯ୍ୟନ୍ତ । ବିଧାନସଭାରେ ନୂଆ ସରକାରଙ୍କୁ ଘେରିବାକୁ ବିଜେଡି ପ୍ରସ୍ତୁତି ଚଳାଇଛି । ବାହାରେ ସରକାରଙ୍କୁ ଘେରିବାକୁ ହେଲେ ସଂଗଠନକୁ ପୁଣି ଥରେ ସକ୍ରିୟ କରିବାକୁ ହେବ । ଦଳର ବରିଷ୍ଠ ନେତାଙ୍କ କହିବାନୁସାରେ ବିଧାନସଭା ଅଧିବେଶନ ଆରମ୍ଭ ହେବାର କିଛି ଦିନ ଭିତରେ ହିଁ ବିଜେଡିର ସାଂଗଠନିକ ନୂଆ ଟିମ୍ ଘୋଷଣା ହେବା ସମ୍ଭାବନା ଅଛି । ଦଳୀୟ ସୂତ୍ର ଅନୁସାରେ ପ୍ରଥମେ ରାଜ୍ୟସ୍ତରୀୟ ସାଂଗଠନିକ ଟିମ୍କୁ ନୂଆ ରୂପ ଦିଆଯିବ । ତା’ପରେ ଜିଲ୍ଲାସ୍ତରରେ ବି ବଡ଼ ପରିବର୍ତ୍ତନ କରାଯିବ । ଜିଲ୍ଲାସ୍ତରରେ ମିଡିଆ ଟିମ୍ ମଧ୍ୟ ଗଢ଼ାଯିବ ।
ଦଳର ଛାମୁଆ ସଂଗଠନ ଯୁବ, ଛାତ୍ର ଓ ମହିଳା ଟିମ୍କୁ ମଧ୍ୟ ନବକଳେବର କରାଯିବ । ବଡ଼ଧରଣର ଅଦଳବଦଳ ହେବ । ଛାତ୍ର ସଂଗଠନର ନେତୃତ୍ୱ ଧରିଥିବା କିଛି ନେତାଙ୍କୁ ରାଜ୍ୟର ଯୁବ ଟିମ୍କୁ ଅଣାଯିବ । ଯୁବ ଟିମ୍ରୁ ଅନେକ ଯିବେ ରାଜ୍ୟ ଓ ଜିଲ୍ଲା ସଂଗଠନ ଦାୟିତ୍ୱଙ୍କୁ । ବିଧାନସଭା ପାଇଁ ଲଢ଼ିଥିବା କିଛି ନେତା ଏଥର ଜିଲ୍ଲା କମିଟିର ମଙ୍ଗ ଧରିପାରନ୍ତି । ସମସ୍ତଙ୍କୁ ସାଙ୍ଗରେ ନେଇ ଦଳ ଆଗକୁ ବଢ଼ିବାକୁ ବ୍ଲୁପ୍ରିଣ୍ଟ ପ୍ରସ୍ତୁତ କରୁଛି ।
