କେନ୍ଦୁଝର,୦୬/୦୯: ପୁଲିସ୍ ଗାଡ଼ି ଧକ୍କାରେ ଜଣେ ଖବରକାଗଜ ବିତରକ ପ୍ରାଣ ହରାଇଥିଲେ । ମୃତକ ପରିବାରକୁ କ୍ଷତିପୂରଣ ପାଇଁ ଅଦାଲତ ପୁଲିସ ଆରକ୍ଷୀ ଅଧୀକ୍ଷକଙ୍କୁ ନିର୍ଦ୍ଦେଶ ଦେଇଥିଲେ । ମାତ୍ର ୧୩ ବର୍ଷ ପରେ ମଧ୍ୟ କ୍ଷତିପୂରଣ ମିଳିନାହିଁ । ଯେଉଁଥିପାଇଁ ମୃତକଙ୍କ ପରିବାର ପକ୍ଷରୁ ପୁଣି ଅଦାଲତରେ ସତ୍ୟପାଠ ଦାଖଲ ପରେ ଜିଲ୍ଲା ଓ ଦୌରାଜଜ୍ କଡ଼ା ଆଭିମୁଖ୍ୟ ଗ୍ରହଣ କରିଛନ୍ତି । ଅଦାଲତ ଏସ୍ପିଙ୍କ ଚୌକି ସମେତ ଅନ୍ୟାନ୍ୟ ଉପକରଣ ଜବତ ପାଇଁ ନୋଟିସ୍ କରିଛନ୍ତି । ଏଭଳି ନିର୍ଦ୍ଦେଶକୁ ନେଇ ପୁଲିସ ପ୍ରଶାସନ ଓ ବିଚାର ବିଭାଗୀୟ ମୁହାଁମୁହିଁ ହୋଇଛନ୍ତି । କିନ୍ତୁ ନ୍ୟାୟ ଆଗରେ ସମସ୍ତେ ସମାନ ବୋଲି ଜଜ୍ କହିଛନ୍ତି । ନୋଟିସ୍ ପାଇବା ପରେ ପୁଲିସ ପକ୍ଷରୁ ତ୍ୱରିତ୍ ପଦକ୍ଷେପ ଗ୍ରହଣ ପାଇଁ ପ୍ରକ୍ରିୟା ଆରମ୍ଭ ହୋଇଛି । ଖୁବ୍ଶୀଘ୍ର ପୀଡିତ ପରିବାରଙ୍କୁ କ୍ଷତିପୂରଣ ଦିଆଯିବ ବୋଲି ସୂଚନା ମିଳିଛି ।
କେନ୍ଦୁଝର କବିତ୍ରା ଗ୍ରାମର ପ୍ରତାପ ଜେନା ଖବରକାଗଜ ବିତରକ ଭାବେ କାମ କରୁଥିଲେ । ସେ କେନ୍ଦୁଝର ଆସୁଥିବା ସମୟରେ ୨୦୦୮ ମସିହାରେ ପୁଲିସ ଗାଡି ଧକ୍କାରେ ଡ଼େଲି ମାର୍କେଟ୍ ନିକଟରେ ପ୍ରାଣ ହରାଇଥିଲେ । ଏହି ଘଟଣାକୁ ନେଇ ଅଦାଲତରେ ୨୦୧୧ରେ କ୍ଷତିପୂରଣ ମାମଲା ଦାୟର ହୋଇଥିଲା । ପୁଲିସ ଗାଡିର ଦାୟିତ୍ୱହୀନତା ପାଇଁ ଜଣେ ଗରିବ ଲୋକର ମୃତ୍ୟୁ ଘଟିଥିବା ଦର୍ଶାଇ ଜିଲ୍ଲା ଓ ଦୌରାଜଜ୍ ପୁଲିସ ଏସ୍ପିଙ୍କୁ ୫ ଲକ୍ଷ ଟଙ୍କା କ୍ଷତିପୂରଣ ଦେବାକୁ ନିର୍ଦ୍ଦେଶ ଦେଇଥିଲେ । ଅଦାଲତର ନିର୍ଦ୍ଦେଶ ସତ୍ତେ୍ୱ ପୁଲିସ ପ୍ରଶାସନ କ୍ଷତିପୂରଣ ଦେବାରେ ବିଳମ୍ବ କରିଥିଲେ । ୨୦୧୪ରେ ଏହି ଘଟଣାର ରାୟ ପ୍ରକାଶ ପାଇଥିଲା । ରାୟରେ ୨୦୧୧ ମସିହାରୁ ୯ ପ୍ରତିଶତ ସୁଧ ସହିତ ଏହି କ୍ଷତିପୂରଣ ରାଶି ମୃତକ ପରିବାରକୁ ପ୍ରଦାନ କରିବାକୁ ଅଦାଲତ ଆଦେଶ ଦେଇଥିଲେ । କିନ୍ତୁ ଆଦେଶକୁ କାର୍ଯ୍ୟକାରୀ କରିବାରେ ପୁଲିସ ପ୍ରଶାସନ ଯଥେଷ୍ଟ ବିଳମ୍ବ କରିଥିଲେ ।
ନିକଟରେ ମୃତକଙ୍କ ଉତ୍ତରାଧିକାରୀ ଅଦାଲତରେ ଉପସ୍ଥିତ ହୋଇ କ୍ଷତିପୂରଣ ପାଇନଥିବା ଦର୍ଶାଇ ଏକ ସତ୍ୟପାଠ ଦାଖଲ କରିଥିଲେ । ୨୦୧୪ ମସିହାରେ ଜିଲ୍ଲା ଦୌରାଜଜ୍ଙ୍କ ଆଦେଶ କାର୍ଯ୍ୟକାରୀ କରାଯାଇନଥିବା ସହିତ ମୃତକ ପରିବାର କ୍ଷତିପୂରଣରୁ ବଞ୍ଚିତ ହୋଇଥିବାରୁ ଅଦାଲତ କ୍ଷୋଭ ପ୍ରକାଶ କରିଥିଲେ । ଏସ୍ପିଙ୍କ ସଂପତ୍ତି ଜବତ ପାଇଁ ଏକ ପିଟିସନ ଅଦାଲତରେ ଦାଖଲ ହୋଇଥିଲା । ଏଥିରେ ଏସ୍ପିଙ୍କ ଚୌକି ସହିତ ଟେବୁଲ, କମ୍ପ୍ୟୁଟର, ପ୍ରିଣ୍ଟର, ପଙ୍ଖା ଏବଂ ଏସି ଜବତ କରାଯାଇ ମୃତକ ପରିବାରକୁ କ୍ଷତିପୂରଣ ଭରଣା କରାଯାଉ ବୋଲି ପିଟିସନ ଦାଖଲ ହୋଇଥିଲା । ଅଦାଲତ ଉକ୍ତ ଆବେଦନକୁ ଗ୍ରହଣ କରି ସଂପତ୍ତି ଜବତ ପାଇଁ ଏସ୍ପିଙ୍କୁ ନୋଟିସ କରିଥିଲେ ।
ମଙ୍ଗଳବାର ଅଦାଲତର ପ୍ରୋସେସ୍ ସର୍ଭରର ନୋଟିସ୍ ନେଇ ଏସପିଙ୍କୁ ପ୍ରଦାନ କରି ୧୨ ତାରିଖ ସୁଦ୍ଧା କ୍ଷତିପୂରଣ ରାଶି ଦେବା ସହିତ ଅଦାଲତରେ ଉପସ୍ଥିତ ରହିବାକୁ ନିର୍ଦ୍ଦେଶ ଥିବାର ସୂଚନା ଦେଇଛନ୍ତି । ଅଦାଲତର କଡା ଅଭିମୁଖ୍ୟ ପରେ ପୁଲିସ ପ୍ରଶାସନ ଚେତିଛି । ପୁଲିସ ପକ୍ଷରୁ କ୍ଷତିପୂରଣ ପ୍ରଦାନ ପ୍ରକ୍ରିୟା ଆରମ୍ଭ ହୋଇଛି ।
ସୂଚନା ଅନୁଯାୟୀ, ୨୦୧୪ ମସିହାରେ ରାୟ ପ୍ରକାଶ ପରେ ପୁଲିସ ପ୍ରଶାସନ ପକ୍ଷରୁ କ୍ଷତିପୂରଣ ରାଶି ଚେକ୍ ମାଧ୍ୟମରେ ଦିଆଯିବାକୁ ପ୍ରସ୍ତୁତ କରାଯାଇଥିଲା । ମାତ୍ର ଉକ୍ତ ଚେକ୍ ମୃତକ ପରିବାରକୁ ପ୍ରଦାନ କରାଯାଇନଯାଇ ଫାଇଲରେ ରଖି ଦିଆଯାଇଥିଲା । ଚେକ୍ର ଅବଧି ଶେଷ ହୋଇଯାଇଥିବାରୁ ପୁଣି ଏକ ନୂଆ ଚେକ୍ ଜରିଆରେ କ୍ଷତିପୂରଣ ରାଶି ପ୍ରଦାନ କରାଯିବ ବୋଲି ପୁଲିସ ପକ୍ଷରୁ କୁହାଯାଇଛି । ଏହି ମାମଲାକୁ ମୃତକଙ୍କ ପରିବାର ପକ୍ଷରୁ ଜୟନ୍ତ ମହାନ୍ତି ପରିଚାଳନା କରୁଥିଲେ ।