ନୂଆଦିଲ୍ଲୀ: ନ୍ୟାସନାଲ ବୋର୍ଡ ଅଫ୍ ଏଗଜାମିନେସନ୍ ଇନ୍ ମେଡିକାଲ ସାଇନ୍ସେସ୍ (NBEMS) NEET PGର ନୂତନ ପରୀକ୍ଷା ତାରିଖର ବିଜ୍ଞପ୍ତି ପ୍ରକାଶ କରିଛି । ଏହି ପରୀକ୍ଷା ୧୧ ଅଗଷ୍ଟ ୨୦୨୪ରେ କରାଯିବ । ଦୁଇଟି ପର୍ଯ୍ୟାୟରେ ହେବ ପରୀକ୍ଷା । SOP ଏବଂ ପ୍ରୋଟୋକଲ୍ ସମୀକ୍ଷା କରିବା ପରେ, NEET PG ର ନୂତନ ତାରିଖ ଘୋଷଣା କରାଯାଇଛି ।
ଦୁଇଟି ସିଫ୍ଟରେ ହେବାକୁ ଥିବା NEET PG ପରୀକ୍ଷା ସମ୍ବନ୍ଧୀୟ ଅଧିକ ସୂଚନା ବୋର୍ଡର ଅଫିସିଆଲ୍ ୱେବସାଇଟ୍ natboard.edu.in ରେ ଉପଲବ୍ଧ । ସ୍ନାତକୋତ୍ତର ମେଡିକାଲ ପ୍ରବେଶିକା ପରୀକ୍ଷା (NEET PG) ପାଇଁ ଆବେଦନ କରିଥିବା ଏବଂ ଜୁନ୍ ୨୩ରେ ପରୀକ୍ଷା ପାଇଁ ପ୍ରସ୍ତୁତ ଥିବା ପ୍ରାର୍ଥୀମାନେ NBEର ଅଫିସିଆଲ୍ ୱେବସାଇଟରେ ପରୀକ୍ଷା ସମ୍ବନ୍ଧୀୟ ତଥ୍ୟ ଯାଞ୍ଚ କରିପାରିବେ ।
ସୂଚନାଯୋଗ୍ୟ, ନିଟ ପିଜି ୨୦୨୪ ପରୀକ୍ଷା ଜୁନ୍ ୨୩ରେ ହେବାର ଥିଲା । କିନ୍ତୁ ପରୀକ୍ଷାର ୧୨ ଘଣ୍ଟା ପୂର୍ବରୁ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରାଳୟ ଏହାକୁ ବାତିଲ କରିବା ସହ ପରବର୍ତ୍ତୀ ତାରିଖ ଘୋଷଣା ହେବ ବୋଲି କହିଥିଲା । ଏହା ପରେ ଆଜି ନ୍ୟାସନାଲ ବୋର୍ଡ ଅଫ୍ ଏଗଜାମିନେସନ୍ ଇନ୍ ମେଡିକାଲ ସାଇନ୍ସେସ୍ ପକ୍ଷରୁ ପରୀକ୍ଷା ପାଇଁ ନୂଆ ତାରିଖ ଘୋଷଣା କରାଯାଇଛି । ନିଟ୍ ପିଜି ପରୀକ୍ଷାରେ ପ୍ରତିବର୍ଷ ୨ରୁ ୩ ଲକ୍ଷ ପରୀକ୍ଷାର୍ଥୀ ସାମିଲ ହୋଇଥାନ୍ତି ।