ନୂଆଦିଲ୍ଲୀ, ୧୪।୩: ଡାକ୍ତରଙ୍କ ବିନା ପରାମର୍ଶରେ ଗର୍ଭପାତ ପାଇଁ ଅନେକ ମହିଳା ଗର୍ଭନିରୋଧକ ବଟିକା ଖାଇଥାନ୍ତି । ଯଦି ଏଭଳି କରୁଥାନ୍ତି, ତା’ହେଲେ ସାବଧାନ ! ନହେଲେ ଆପଣଙ୍କୁ ବି ହୋଇପାରେ ଗର୍ଭାଶୟ କର୍କଟ । ଗର୍ଭାଶୟ-ସ୍ତନ କର୍କଟ ରୋଗର ଆଶଙ୍କା ସୃଷ୍ଟି କରିପାରେ କଣ୍ଟ୍ରାସେପଟିକ୍ ପିଲ୍ । ଏଭଳି ରିପୋର୍ଟ ଦେଇଛି National Health And Nutrition Examination Survey । ଗର୍ଭାଶୟ କର୍କଟ ରୋଗର ମୁଖ୍ୟ କାରଣ ହ୍ୟୁମାନ୍ ପାପିଲୋମା ଭାଇରସ୍ । ଏହି ଭାଇରସ୍ ଯୌନ ସମ୍ପର୍କ ମାଧ୍ୟମରେ ବ୍ୟାପିଥାଏ । ସାଧାରଣତଃ ଆମର ରୋଗ ପ୍ରତିରୋଧକ ଶକ୍ତି ଏହି ଭାଇରସକୁ ନଷ୍ଟ କରିଦିଏ, କିନ୍ତୁ ଦୁର୍ବଳ ରୋଗ ପ୍ରତିରୋଧକ ଶକ୍ତି ଥିବା ଲୋକଙ୍କଠାରେ ସଂକ୍ରମଣ ଏବଂ ଗର୍ଭାଶୟ କର୍କଟ ହେବାର ଆଶଙ୍କା ଅଧିକ ଥାଏ । ଗବେଷକମାନେ ରିପୋର୍ଟ କରିଛନ୍ତି ଯେ, ଏହି ସମୟରେ ଯେଉଁ ମହିଳାମାନେ ଗର୍ଭନିରୋଧକ ବଟିକା ବ୍ୟବହାର କରନ୍ତି, ସେମାନଙ୍କ ମଧ୍ୟରେ ସର୍ଭାଇକାଲ୍ ଏବଂ ସ୍ତନ କର୍କଟ ହେବାର ଆଶଙ୍କା ଅଧିକ ଥାଏ । 

ଅବାଞ୍ଛିତ ଗର୍ଭଧାରଣକୁ ରୋକିବା ପାଇଁ ଗର୍ଭନିରୋଧକ ବଟିକା ବ୍ୟବହାର କରାଯାଇଛି । କିନ୍ତୁ ଏଠି ପ୍ରଶ୍ନ ଉଠୁଛି କ’ଣ ଏହା କର୍କଟ ରୋଗର ଆଶଙ୍କା ସୃଷ୍ଟି କରିପାରେ ? ଏହି ଅଧ୍ୟୟନରେ, ଗବେଷକମାନେ କହିଛନ୍ତି ଯେ, ଗର୍ଭନିରୋଧକ ବଟିକାର ଅତ୍ୟଧିକ ସେବନ କର୍କଟ ରୋଗର ଆଶଙ୍କା ବୃଦ୍ଧି କରେ । କମ୍ ବୟସରୁ ଗର୍ଭନିରୋଧକ ବଟିକା ଖାଇବା ଆରମ୍ଭ କରୁଥିବା ମହିଳାଙ୍କ କ୍ଷେତ୍ରରେ ଏହି ବିପଦ ଅଧିକ ଥିବା ଦେଖାଯାଇଛି । ଅଧ୍ୟୟନରୁ ଜଣାପଡ଼ିଛି ଯେ, ଏହି ବଟିକାଗୁଡ଼ିକୁ ୫ ବର୍ଷ ଧରି ବ୍ୟବହାର କରିବା ଦ୍ୱାରା ସର୍ଭାଇକାଲ୍ କର୍କଟ ରୋଗର ଆଶଙ୍କା ୧୦ ପ୍ରତିଶତ ବୃଦ୍ଧି ପାଇପାରେ ଏବଂ ୫-୯ ବର୍ଷ ଧରି ଏହାକୁ ବ୍ୟବହାର କରିବା ଦ୍ୱାରା ୬୦ ପ୍ରତିଶତ ବୃଦ୍ଧି ପାଇପାରେ । 

ଗର୍ଭାଶୟ କର୍କଟ ବ୍ୟତୀତ, ଏହି ଔଷଧର ଅତ୍ୟଧିକ ସେବନ ସ୍ତନ କର୍କଟ ପାଇଁ ଏକ ବିପଦର କାରଣ । ଅଢ଼େଇ ଲକ୍ଷରୁ ଅଧିକ ମହିଳାଙ୍କ ତଥ୍ୟ ବିଶ୍ଳେଷଣରୁ ଜଣାପଡ଼ିଛି ଯେ, ଯେଉଁମାନେ ଗର୍ଭନିରୋଧକ ବଟିକା ବ୍ୟବହାର କରିଛନ୍ତି ସେମାନଙ୍କ ମଧ୍ୟରେ ଅନ୍ୟମାନଙ୍କ ତୁଳନାରେ ସ୍ତନ କର୍କଟ ହେବାର ଆଶଙ୍କା ୭ ପ୍ରତିଶତ ଅଧିକ । ଏହାକୁ ଅତ୍ୟଧିକ ବ୍ୟବହାର କରିବା ଦ୍ଵାରା ଆପଣଙ୍କର ବିପଦ ୨୪ ପ୍ରତିଶତ ବୃଦ୍ଧି ପାଇପାରେ । ଏହି କର୍କଟ ରୋଗକୁ ରୋକିବାକୁ ସମସ୍ତ ମହିଳାଙ୍କୁ ସତର୍କତା ଅବଲମ୍ବନ କରିବାକୁ ପରାମର୍ଶ ଦେଇଛନ୍ତି ବିଶେଷଜ୍ଞ । ନିୟମିତ ସ୍କ୍ରିନିଂ ଏବଂ ଆତ୍ମ-ପରୀକ୍ଷଣ ସ୍ତନ କର୍କଟକୁ ରୋକିବାରେ ସାହାଯ୍ୟ କରିପାରିବ । ଯଦି ସମୟ ମଧ୍ୟରେ ଏହାର ନିର୍ଣ୍ଣୟ କରାଯାଏ ତେବେ ସହଜ ହୋଇପାରିବ ଏହାର ଚିକିତ୍ସା ଏବଂ ହ୍ରାସ ପାଇବ ମୃତ୍ୟୁ ଆଶଙ୍କା ।