ନୟାଗଡ଼,୦୪/୦୧: ନୟାଗଡ଼ ଜଙ୍ଗଲରେ କଳା ବାଘ ରହିଥିବା ବହୁ ଦିନ ପୂର୍ବରୁ ଜଣାପଡ଼ିଥିଲା । ହେଲେ ନୂଆ ବର୍ଷରେ ସେହି କଳା ବାଘମାନଙ୍କ ମଧ୍ୟରୁ ଏକ ବାଘୁଣୀ ତା’ର ଛୁଆକୁ ପାଟିରେ କାମୁଡ଼ି ସୁରକ୍ଷିତ ସ୍ଥାନକୁ ନେଇ ଯାଉଥିବା ବନ ବିଭାଗ କ୍ୟାମେରାରେ ରେକର୍ଡ ହୋଇଛି । ଯାହାକୁ ନେଇ ବନ ବିଭାଗ କର୍ମଚାରୀ ସମେତ ବନ୍ୟପ୍ରାଣୀ ପ୍ରେମୀମାନଙ୍କ ମଧ୍ୟରେ ଖୁସିର ଲହରୀ ଖେଳିଯାଇଛି ।
ନୟାଗଡ଼ ଡିଏଫ୍ଓ କ୍ଷମା ଷଡ଼ଙ୍ଗୀଙ୍କ ସୂଚନା ଅନୁଯାୟୀ, ନୟାଗଡ଼ ଜିଲ୍ଲାରେ ନୂଆ ବର୍ଷରେ ନୂଆ ଅତିଥି ଆସିଛନ୍ତି । କଳା କଲରାପତରିଆ ବାଘୁଣୀ ୩ରୁ ୪ଟି ଛୁଆ ପ୍ରସବ କରିଥିବା କ୍ୟାମେରାରେ ରେକର୍ଡ ହୋଇଛି । ବାଘୁଣୀଟି ତା’ର ଗୋଟିଏ ଛୁଆକୁ ପାଟିରେ କାମୁଡ଼ି ନିରାପଦ ସ୍ଥାନକୁ ନେଉଥିବା ଦୃଶ୍ୟ ସମସ୍ତଙ୍କୁ ଖୁସି ଦେଇଛି । ନୟାଗଡ଼ ଜଙ୍ଗଲରେ ବାଘ ସଂଖ୍ୟା ପାଖାପାଖି ୭୦ରୁ ୮୦ ହେବ । କିନ୍ତୁ କ୍ୟାମେରାରେ ବାଘ ସଂଖ୍ୟା ପାଖାପାଖି ୬୦ରୁ ୭୦ ହେବ ।
ଏଥିରୁ ଜିଲ୍ଲାରେ ବାଘ ସଂଖ୍ୟା ବଢ଼ୁଥିବା ଅନୁମାନ କରାଯାଉଛି । ନୟାଗଡ଼ ପାଇଁ ଏହା ଶୁଭଙ୍କର ବୋଲି ଡିଏଫ୍ଓ ଶ୍ରୀମତୀ ଷଡ଼ଙ୍ଗୀ କହିଛନ୍ତି । ଶିକାରୀମାନଙ୍କ କବଳରୁ କଲରାପତିରିଆ ବାଘକୁ ସୁରକ୍ଷା ଦେବାକୁ ବନ ବିଭାଗ ବହୁ ଉଦ୍ୟମ କରୁଛି । କଳା ବାଘୁଣୀ ଏବଂ ତା'ର ଛୁଆମାନେ ସୁସ୍ଥ ରହିଥିବା କହିଛନ୍ତି । ବାଘୁଣୀଟି ତା’ ପାଟିରେ କାମୁଡ଼ି ନେଉଥିବା ତା’ଛୁଆର ରଙ୍ଗ ହଳଦିଆ କିପରି ହୋଇଛି ନେଇ ଡିଏଫ୍ଓଙ୍କୁ ପ୍ରଶ୍ନ କରାଯିବାରେ କହିଛନ୍ତି, ଏହି ବାଘ ଛୁଆଟି ପରବର୍ତ୍ତୀ ମୁହୂର୍ତ୍ତରେ କଳା ହୋଇପାରେ କିମ୍ବା ହଳଦିଆ ରଙ୍ଗର ହୋଇପାରେ । କଳା ବାଘୁଣୀ ସହ ହଳଦିଆ ରଙ୍ଗର କଲରାପତରିଆ ବାଘର ମିଶ୍ରଣରୁ କଳା ବାଘୁଣୀ ଛୁଆର ରଙ୍ଗ ହଳଦିଆ ହୋଇପାରିଥାଏ ବୋଲି ଡିଏଫ୍ଓ ସୂଚନା ଦେଇଛନ୍ତି ।
ବନ ବିଭାଗର କହିବା ଅନୁଯାୟୀ, ନୟାଗଡ଼ ଜଙ୍ଗଲ ଗତ ୫ ବର୍ଷ ଭିତରେ ବହୁତ ବୃଦ୍ଧି ପାଇଛି । ସେଥିରେ ବାସ କରୁଥିବା ଜଙ୍ଗଲ ଜନ୍ତୁମାନଙ୍କ ସଂଖ୍ୟା ମଧ୍ୟ ବୃଦ୍ଧି ପାଇଛି । ନୟାଗଡ଼ ଜଙ୍ଗଲ ଓ ସାତକୋଶିଆ ଅଭୟାରଣ୍ୟରେ ପାଖାପାଖି ୬୦ରୁ ୭୦ ବାଘ ରହିଥିବା ଜଣାପଡ଼ିଛି । ଅନ୍ୟପଟେ ବାର୍ହା, ହରିଣ, ଗୟଳ, କୁଟ୍ରା, ମୟୂର ପ୍ରଭୃତି ବନ୍ୟଜନ୍ତୁ ଆଶାତୀତ ଭାବେ ବୃଦ୍ଧି ପାଇଥିବା ବନ ବିଭାଗ ପକ୍ଷରୁ କୁହାଯାଇଛି ।
