ଯାଜପୁର, ୬।୧: ପାଣିକୋଇଲି ପଣ୍ଡା ଅଳଙ୍କାରରେ କାର୍ଯ୍ୟ କରୁଥିବା ଯାଜପୁର ବ୍ଲକ କଳସଡିହି ଗ୍ରାମର ଦେବେନ୍ଦ୍ର ରାୟଙ୍କ ଏକମାତ୍ର ପୁଅ ସୁନିଲ ରାୟ(୩୨)ଙ୍କର ଡକାୟତଙ୍କ ଗୁଳିମାଡ଼ରେ ଜୀବନ ଯାଇଛି । ସୁନିଲ ପ୍ରାୟ ୩ବର୍ଷ ତଳେ ବିବାହ କରିଥିଲେ । ଦେଢ଼ ବର୍ଷ ତଳେ ତାଙ୍କର ଏକ କନ୍ୟା ସନ୍ତାନ ଜନ୍ମ ହୋଇଥିଲା । ଘରେ ବୃଦ୍ଧା ବାପା, ମା’ଙ୍କ ସମେତ ପତ୍ନୀ ଓ ଶିଶୁ କନ୍ୟା ଅଛନ୍ତି । ସୁନିଲଙ୍କ ରୋଜଗାର ଉପରେ ସଂପୂର୍ଣ୍ଣ ପରିବାର ନିର୍ଭରଶୀଳ । ସୁନିଲଙ୍କ ମୃତ୍ୟୁରେ ସମଗ୍ର ପରିବାର ବେସାହାରା ହୋଇପଡ଼ିଛି । ଦେଢ଼ବର୍ଷର ଶିଶୁ କନ୍ୟା ବାପାଙ୍କୁ ଖୋଜୁଥିବା ବେଳେ ପତ୍ନୀ ଓ ବାପା, ମା’ ବାରମ୍ବାର ଚେତା ହରାଉଛନ୍ତି । ବ୍ୟବଚ୍ଛେଦ ପରେ ସନ୍ଧ୍ୟାରେ ତାଙ୍କ ମୃତଦେହ ବାସଭବନରେ ପହଞ୍ଚି ଥିଲା । ବ୍ୟାପକ ପୁଲିସ ଫୋର୍ସ ଉପସ୍ଥିତିରେ ଗ୍ରାମ ଶ୍ମଶାନରେ ମୃତଦେହକୁ ଦାହ କରାଯାଇଥିଲା । ସୁନିଲଙ୍କ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି ।