ପାଣିକୋଇଲି, ୬।୧: ନୀଳମାଧବଙ୍କୁ ଝୁରୁଛି ସୋତ ଦେଢ଼ ବର୍ଷ ପୂର୍ବେ ବାପା ଓ ୬ମାସ ତଳେ ଜେଜେଙ୍କ ମୃତ୍ୟୁ ପାଣିକୋଇଲି ପଣ୍ଡା ଅଳଙ୍କାରରେ ସଶସ୍ତ୍ର ଡକାୟତି ଚାଲିଥିଲା । ପାଣିକୋଇଲି କଲେଜ ପଡ଼ିଆକୁ ଏକ ବିଦ୍ୟୁତ୍ ସଂଯୋଗ କରିବାକୁ ୩ଜଣ ବିଦ୍ୟୁତ କର୍ମଚାରୀଙ୍କୁ ବୋଲେରୋରେ ନେଇ ଯାଇଥିବା ଚାଳକ ଗୋଳେଇପୁର ପଞ୍ଚାୟତ ସୋତି ଗ୍ରାମର ସ୍ୱର୍ଗତ ଗୌରାଙ୍ଗ ପଣ୍ଡାଙ୍କ ବଡ଼ପୁଅ ନୀଳମାଧବ ପଣ୍ଡା(୨୫) ଏହି ସମୟରେ ଘଟଣାସ୍ଥଳରେ ପହଞ୍ଚିଥିଲେ । ନୀଳମାଧବ ବୋଲେରୋରୁ ଓହ୍ଲାଇ ଛିଡ଼ା ହୋଇଥିବା ବେଳେ ଖସି ଯିବାକୁ ଉଦ୍ୟମ କରୁଥିବା ଡକାୟତମାନେ ନୀଳମାଧବଙ୍କୁ ଗାଡ଼ି ଚାବି ମାଗିଥିଲେ । ନୀଳମାଧବ ଚାବି ନଦେବାରୁ ଉତ୍ତ୍ୟକ୍ତ ହୋଇ ଜଣେ ଡକାୟତ ନୀଳମାଧବଙ୍କ ପେଟକୁ ଗୁଳି ମାରିଥିଲା ।
ଫଳରେ ଘଟଣାସ୍ଥଳରେ ତାଙ୍କର ମୃତ୍ୟୁ ଘଟିଥିଲା । ଯାଜପୁର ମୁଖ୍ୟ ଚିକିତ୍ସାଳୟରେ ବ୍ୟବଚ୍ଛେଦ ପରେ ଆଜି ଅପରାହ୍ଣରେ ନୀଳମାଧବଙ୍କ ମୃତଦେହ ତାଙ୍କ ସୋତିସ୍ଥିତ ବାସଭବନରେ ପହଞ୍ଚିଥିଲା । ଏହି ସମୟରେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଥିଲା । ଅପ୍ରୀତିକର ପରିସ୍ଥିତିକୁ ଏଡ଼ାଇବା ପାଇଁ ବ୍ୟାପକ ପୁଲିସ ଫୋର୍ସ ମୁତୟନ କରାଯାଇଥିଲା । ଗ୍ରାମ ଶ୍ମଶାନରେ ତାଙ୍କର ଶେଷକୃତ୍ୟ ସଂପନ୍ନ କରାଯାଇଥିଲା । ହସଖୁସିରେ ଫାଟି ପଡ଼ୁଥିବା ନୀଳମାଧବଙ୍କ ପରିବାର ଏବେ ବେସାହାରା ହୋଇ ପଡ଼ିଛି । ଦେଢ଼ ବର୍ଷ ତଳେ ତାଙ୍କ ବାପା ଗୌରାଙ୍ଗଙ୍କର ମୃତ୍ୟୁ ଘଟିଥିଲା । ଏହି ଦୁଃଖକୁ ପରିବାର ଭୁଲିବାକୁ ଚେଷ୍ଟା କରୁଥିବା ବେଳେ ରିଟେଲର ଭାବେ କାର୍ଯ୍ୟ କରୁଥିବା ଜେଜେ ଜଗନ୍ନାଥ ପଣ୍ଡା ବୃଦ୍ଧ ବୟସରେ ବି ପରିବାରର ମଙ୍ଗ ଧରିଥିଲେ ।
ଗତ ଜୁନ୍ ମାସରେ ତାଙ୍କର ହୃଦ୍ଘାତରେ ମୃତ୍ୟୁ ଘଟିଲା । ଜଗନ୍ନାଥଙ୍କ ମୃତ୍ୟୁ ପରେ ନୀଳମାଧବ ପରିବାର ପ୍ରତିପୋଷଣ ପାଇଁ ଘରୁ ଗୋଡ଼ କାଢ଼ିଲେ । ଟାଟା ପାୱାର ଅଧୀନରେ କାର୍ଯ୍ୟ କରୁଥିବା ଠିକାସଂସ୍ଥା ବ୍ରାନ୍ରେ ବୋଲେରୋ ଚାଳକ ଭାବେ କାର୍ଯ୍ୟ କରି ସାନଭାଇ ଓ ସାନଭଉଣୀର ପଢ଼ା ଖର୍ଚ୍ଚ ସହ ପରିବାର ବୋଝ ମଧ୍ୟ ଉଠାଉଥିଲେ । ନୀଳମାଧବଙ୍କ ମୃତ୍ୟୁ ପରେ ତାଙ୍କ ପରିବାର ସଂପୂର୍ଣ୍ଣ ଅସହାୟ ହୋଇ ପଡ଼ିଛି । ତାଙ୍କ ସାନ ଭାଇ ପାଣିକୋଇଲି କଲେଜରେ ଏବେ ଯୁକ୍ତ ଦୁଇ ପଢ଼ୁଥିବା ଜଣାପଡ଼ିଛି । ଘରେ ବୃଦ୍ଧା ଜେଜେମା’, ବିଧବା ମା’ ଓ ଭଉଣୀ ଅଛନ୍ତି । ଏବେ ଏହି ପରିବାର କିପରି ଆଗକୁ ବଢ଼ିବ ସେ ନେଇ ସମସ୍ତଙ୍କ ଚିନ୍ତା । ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି ।
