ଭୁବନେଶ୍ୱର,୨୩/୦୯: ଆସନ୍ତା ୨୫ ତାରିଖ (ବୁଧବାର) ରମାଦେବୀ ମହିଳା ବିଶ୍ୱବିଦ୍ୟାଳୟ ପରିଦର୍ଶନରେ ଆସିବେ ନ୍ୟାସନାଲ୍ ଆସେସ୍ମେଣ୍ଟ ଆଣ୍ଡ ଆକ୍ରିଡେସନ୍ କାଉନସିଲ୍ (ନାକ୍) ଟିମ୍ । ୩ ଦିନିଆ ଗସ୍ତରେ ଆସୁଥିବା ଏହି ଟିମ୍ ବିଶ୍ୱବିଦ୍ୟାଳୟର ସମସ୍ତ ଦିଗକୁ ଯାଞ୍ଚ କରିବେ । ଏନେଇ ଜୋରଦାର ପ୍ରସ୍ତୁତ ହେଉଛି ରମାଦେବୀ ମହିଳା ବିଶ୍ୱବିଦ୍ୟାଳୟ । ରବିବାରରେ ବି ବିଶ୍ୱବିଦ୍ୟାଳୟକୁ ଆସୁଛନ୍ତି କର୍ମଚାରୀ ଓ ଅଧ୍ୟାପକ । ବିଶ୍ୱବିଦ୍ୟାଳୟକୁ ସଜ୍ଜା ଯାଉଛି । ପରିସରର ସୌନ୍ଦର୍ଯ୍ୟକରଣ ଚାଲିଛି । ତେବେ ବିଶ୍ୱବିଦ୍ୟାଳୟ ପାଇଁ ଆହ୍ୱାନ ପାଲଟିଛି ଭିତ୍ତିଭୂମି । କ୍ରୀଡ଼ା ଭିତ୍ତିଭୂମି, କ୍ଲାସରୁମ୍, ଷ୍ଟାଫ୍ କ୍ୱାର୍ଟର୍ର ଆଦି ପ୍ରମୁଖ ଆହ୍ୱାନ ରହିବ । ତେବେ ଏହାକୁ ମୁକାବିଲା କରିବାକୁ କର୍ତ୍ତୃପକ୍ଷ ମଧ୍ୟ ପ୍ରସ୍ତୁତ ହେଉଛନ୍ତି ।
ପ୍ରଥମ ଦିନରେ ବିଶ୍ୱବିଦ୍ୟାଳୟର କୁଳପତିଙ୍କ ସହ ନାକ ଟିମ ଆଲୋଚନା କରିବେ । କୁଳପତି ବିଶ୍ୱବିଦ୍ୟାଳୟ ଉପରେ ଏକ ସ୍ୱତନ୍ତ୍ର ଉପସ୍ଥାପନ କରିବେ । ଏହାପରେ ଇଣ୍ଟରନାଲ୍ କ୍ୱାଲିଟି ସେଲ୍ (ଆଇକ୍ୟୁସି) ଉପସ୍ଥାପନା କରାଯିବ । ବିଭାଗରେ ପାଠପଢ଼ା, ଗବେଷଣା ଆକ୍ଟିଭିଟି, କ୍ଲାସରୁମ୍ର ଭିତ୍ତିଭୂମି, ଛାତ୍ରୀଙ୍କ ପ୍ରୋଫାଇଲ୍ ଦେଖିବେ । ପରୀକ୍ଷା ପରିଚାଳନା, ଅର୍ଥ କାରବାର, କାର୍ଯ୍ୟାଳୟ ସଂପର୍କିତ କାର୍ଯ୍ୟ ଆଦି ବିଷୟରେ ଆଲୋଚନା କରିବେ।
ଦ୍ୱିତୀୟ ଦିନରେ ବିଭିନ୍ନ ବିଭାଗ, ହଷ୍ଟେଲ୍, ଗବେଷଣାଗାର, କ୍ୟାଣ୍ଟିନ୍, ଗେଷ୍ଟ ହାଉସ୍, ପ୍ରେକ୍ଷାଳୟ ଆଦି ପରିଦର୍ଶନ କରିବେ । ପିଲାଙ୍କ ସହିତ ଆଲୋଚନା କରିବେ । ଶେଷ ଦିନ ପ୍ରସ୍ଥାନ ବୈଠକ ହେବ । ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କ ସହ ଆଲୋଚନା ପରେ ଡକ୍ୟୁମେଣ୍ଟ ଆଦି ପ୍ରସ୍ତୁତ କରିବେ । ନାକ୍ ପରିଦର୍ଶନ ସମୟରେ ସଂଧ୍ୟାରେ ଓଡ଼ିଶା ପରମ୍ପରା ଥିମକୁ ନେଇ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ ହୋଇପାରେ ।
ଉଲ୍ଲେଖଯୋଗ୍ୟ, ରମାଦେବୀ ମହିଳା ମହାବିଦ୍ୟାଳୟ ଥିବା ସମୟରେ ଶେଷ ଥର ପାଇଁ ୨୦୧୪ ମସିହାରେ ନାକ୍ ପରିଦର୍ଶନ କରିଥିଲା । ଏହି ସମୟରେ କଲେଜକୁ ନାକ୍-ଏ ଗ୍ରେଡ୍ ମାନ୍ୟତା ମିଳିଥିଲା । ମାତ୍ର ୨୦୧୫ ମସିହାରେ ବିଶ୍ୱବିଦ୍ୟାଳୟ ମାନ୍ୟତା ପାଇବା ପରେ ନାକ୍ ପରିଦର୍ଶନ ହେଉଛି ପ୍ରଥମ ।
