ନୂଆଦିଲ୍ଲୀ, ୨୬।୭: ବିଶ୍ୱ ଏଭଳି ଅନେକ ରହସ୍ୟମୟୀ ସ୍ଥାନ ରହିଛି । ଯାହାର ରହସ୍ୟ ବିଷୟରେ ଜାଣିବା ମଣିଷ ପକ୍ଷେ ଅସମ୍ଭବପର । କିଛି ଏଭଳି ସ୍ଥାନ ମଧ୍ୟ ରହିଛି ଯେଉଁଠାକୁ ମଣିଷ ଯିବା ମନା । କିଛି ସ୍ଥାନ ଯାହା ମୃତ୍ୟୁକୁ କରେ ଆମନ୍ତ୍ରଣ । ସେହିପରି ଏକ ସ୍ଥାନ ରହିଛି ଯାହାକୁ କୁହାଯାଏ ମୃତ୍ୟୁର ବାଟ । ଏଠାକୁ ଯିବା ବାଟ ତ ଥାଏ କିନ୍ତୁ, ଆସିବା ବାଟ ବନ୍ଦ ହୋଇଯାଏ । କାରଣ ଏଠାକୁ ଆଜି ପର୍ଯ୍ୟନ୍ତ ଯିଏ ବି ଯାଇଛନ୍ତି, ସିଏ ଆଉ କେବେ ହେଲେ ଫେରିନାହାନ୍ତି । ଉତ୍ତର ଆଟଲାଣ୍ଟିକ୍ ମହାସାଗରରେ ରହିଛି ଏହି ରହସ୍ୟମୟ ସ୍ଥାନ । ଯାହାକୁ ନେଇ ହଜାର ହଜାର ବର୍ଷ ହେବ ଅନେକ ରାଷ୍ଟ୍ରର ବିଶେଷଜ୍ଞମାନେ ଅନୁସନ୍ଧାନ କରିଆସୁଛନ୍ତି । ଏହା ଗଭୀର ନୀଳ ସମୁଦ୍ରରେ ଥିବା ଏକ ଏଭଳି ସ୍ଥାନ, ଯାହା ମଧ୍ୟରେ ନିଖୋଜ ହୋଇଯାଇଛନ୍ତି ୧୦୦ରୁ ଅଧିକ ଜଳଜାହାଜ ଓ ବିମାନ । ଆଉ ନିଖୋଜ ହୋଇଥିବା ସେହି ଜଳଜାହାଜ ଓ ବିମାନ କେଉଁଆଡ଼େ ଗଲା ଆଜି ଯାଏ ତା’ର ପତ୍ତା ମିଳିନ ।
ତେବେ ବର୍ମୁଡା ଟ୍ରାଙ୍ଗେଲକୁ ନେଇ ଆମେରିକାର ଏକ ମିନେରାଲ ଏକ୍ସପର୍ଟ ଟିମ୍ ନୂଆ ତଥ୍ୟ ପ୍ରକାଶ କରିଛନ୍ତି । ଟିମ୍ର ମୁଖ୍ୟ ହୁଚିଙ୍ଗସଙ୍କ ଅନୁସାରେ, ସେମାନଙ୍କୁ ଏହି ଟ୍ରାଙ୍ଗେଲ ପାଖରୁ ଏକ କଳା ପଥର ଖଣ୍ଡ ମିଳିଛି । ଯାହାକୁ ସେମାନେ କମ୍ପାସ୍ ସହ ତୁଳନା କରିଛନ୍ତି । ପରୀକ୍ଷଣରେ ସେହି ପଥର ଖଣ୍ଡକୁ ଏକ ସମତଳ ପୃଷ୍ଠରେ ରଖାଯାଇଥିଲା ଏବଂ ପାଖରେ ଏକ କମ୍ପାସ୍ ରଖାଗଲା । ଦେଖାଯାଇଥିଲା ଯେ, କମ୍ପାସ୍ର କଣ୍ଟା ଖୁବ୍ ଦ୍ରୁତ ଗତିରେ ଘୂର୍ଣ୍ଣନ କରୁଛି । ଏଥିରୁ ଜଣାପଡ଼ିଥିଲା ଯେ, ପଥରରେ ମ୍ୟାଗ୍ନେଟାଇଟର ଅଂଶ ରହିଛି । ଅର୍ଥାତ୍, ଏହି ସ୍ଥାନର ସମୁଦ୍ର ଭିତରେ ରହିଛି ବୃହତ୍ତ ଚୁମ୍ୱକ ପାହାଡ଼ । ଯେଉଁ କାରଣରୁ ହୁଏତ ଜାହାଜ ଓ ବିମାନ ନିଖୋଜ ହୋଇଯାଉଛନ୍ତି ବୋଲି ହୁଚିଙ୍ଗସ କହିଛନ୍ତି ।
ଉତ୍ତର ଆମେରିକା ମହାଦେଶ ନିକଟସ୍ଥ ଆଟଲାଣ୍ଟିକ୍ ମହାସାଗର ମଧ୍ୟରେ ରହିଛି ବର୍ମୁଡା ଟ୍ରାଙ୍ଗେଲ ଅଞ୍ଚଳ । ଖ୍ରୀଷ୍ଟୋଫର୍ କଲୋମ୍ୱସ୍ ପ୍ରଥମେ ଏହି ସ୍ଥାନ ବିଷୟରେ ସୂଚନା ଦେଇଥିଲେ । ବର୍ମୁଡା, ଆମେରିକାର ଫ୍ଲୋରିଡା ଏବଂ ପୋର୍ଟାରିକା ଦ୍ୱୀପ ମଧ୍ୟରେ ଏହି ସ୍ଥାନ ରହିଛି । ଏକ ରିପୋର୍ଟ ଅନୁଯାୟୀ, ଗତ ୧୦୦ ବର୍ଷ ମଧ୍ୟରେ ଏହି ଅଞ୍ଚଳର ପ୍ରାୟ ୭୫ଟି ବିମାନ ଏବଂ ୧୦୦ରୁ ଅଧିକ ଛୋଟ-ବଡ଼ ଜାହାଜ ନିଖୋଜ ହୋଇଯାଇଛି । ଯାହାର ପତ୍ତା ଆଜି ଯାଏ ମିଳିନାହିଁ । କେବଳ ସେତିକି ନୁହେଁ, ଏପରିକି ଏହି ସ୍ଥାନକୁ ରିସର୍ଚ୍ଚ କରିବାକୁ ଯାଉଥିବା ବୈଜ୍ଞାନିକ ମଧ୍ୟ ଏ ପର୍ଯ୍ୟନ୍ତ ନିଖୋଜ ଅଛନ୍ତି । ତେବେ ଏହି ବର୍ମୁଡା ଟ୍ରାଙ୍ଗେଲଠାରେ ଥିବା ପାହାଡ଼ରେ ବାସ୍ତବରେ ଚୁମ୍ୱକୀୟ ଶକ୍ତି ଅଛି କି ନାହିଁ, ତାହା ଆଜି ବି ରହସ୍ୟ ଘେରରେ ।