ମୁମ୍ବାଇ, ୨୯/୩ : ଆଜି ପ୍ରତି ସ୍ଥାନରେ ମୁହମ୍ମଦ ଅବ୍ବାସ ଛାଇ ଯାଇଛନ୍ତି । ପ୍ରକାଶ ଯେ, ଶନିବାର ୨୧ବର୍ଷୀୟ ଏହି ଯୁବ ଖେଳାଳୀ ନ୍ୟୁଜିଲାଣ୍ଡ ଲାଗି ଡେବ୍ୟୁ କରିଛନ୍ତି ଏବଂ ନିଜ ତୁଫାନୀ ବ୍ୟାଟିଂରେ ବିଶ୍ବ ରେକର୍ଡ଼ କରିଛନ୍ତି । ପାକିସ୍ତାନ ବିପକ୍ଷରେ ନିଜ ଡେବ୍ୟୁରେ ଅବ୍ବାସ କେବଳ ୨୪ବଲରେ ହିଁ ଅର୍ଦ୍ଧଶତକ ଯୋଡ଼ି ଛନ୍ତି । ଏହି ସମୟରେ ତାଙ୍କ ବ୍ୟାଟରୁ ୩ଛକ୍କା ଏବଂ ୩ଚୌକା ବାହାରିଛି । ଅବ୍ବାସ ଏବେ ଓ୍ବାନଡେ କ୍ରିକେଟ ଇତିହାସରେ ଡେବ୍ୟୁ ମ୍ୟାଚରେ ସବୁଠାରୁ ଦ୍ରୁତ ଅର୍ଦ୍ଧଶତକ ଲଗାଇବା ବ୍ୟାଟର ହୋଇଯାଇଛନ୍ତି ।
ଅବ୍ବାସଙ୍କ ପୂର୍ବରୁ ଏହି ରେକର୍ଡ଼ ଭାରତର କୃଣାଳ ପାଣ୍ଡ୍ୟାଙ୍କ ନାଁରେ ଥିଲା । କୃଣାଳ ନିଜ ଡେବ୍ୟୁ ମ୍ୟାଚରେ କେବଳ ୨୬ବଲରେ ୫୦ରନ୍ କରିପାରିଥିଲେ । କୃଣାଳ ପାଣ୍ଡ୍ୟା ଇଂଲଣ୍ଡ ବିପକ୍ଷ ୨୦୨୧ରେ ଏହି ରେକର୍ଡ଼ ନିଜ ନାଁରେ କରିଥିଲେ । ଏବେ ନ୍ୟୁଜିଲାଣ୍ଡର ଅବ୍ବାସ ଏହି କୀର୍ତ୍ତିମାନକୁ ନିଜ ନାଁରେ କରି ନେଇଛନ୍ତି । ପ୍ରକାଶ ଯେ, ପାକିସ୍ତାନ ବିପକ୍ଷ ୨୧ବର୍ଷୀୟ ମୁହମ୍ମଦ ଅବ୍ବାସ ୨୬ବଲରେ ୫୨ରନର ବିସ୍ଫୋରକ ପାଳି ଖେଳିଥିଲେ । ଓ୍ବାନଡେ ମ୍ୟାଚରେ ତାଙ୍କ ଟି-୨୦ ଭଳି ବ୍ୟାଟିଂ ତାରିଫ୍ ସବୁଆଡ଼େ ହେବାରେ ଲାଗିଛି । ଅବ୍ବାସ ନିଜ ପାଳିରେ ୩ ଚୌକା ଏବଂ ୩ଛକ୍କା ଲଗାଇଛନ୍ତି । ଅବ୍ବାସଙ୍କ ଦମଦାର୍ ପାଳିରେ ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂରେ ୫୦ଓଭରରେ ୯ଓ୍ବିକେଟରେ ୩୪୪ରନ୍ କରିଛନ୍ତି । ଏହାର ଜବାବରେ ପାକିସ୍ତାନ ଟିମ୍ ୨୭୧ରନରେ ଆଉଟ୍ ହୋଇଯାଇଥିଲା । ନ୍ୟୁଜିଲାଣ୍ଡ ପ୍ରଥମ ଓ୍ବାନଡେ ୭୩ରନରେ ବିଜୟୀ ହୋଇଯାଇଛି ।
ପ୍ରକାଶ ଯେ, ମୁହମ୍ମଦ ଅବ୍ବାସ ନ୍ୟୁଜିଲାଣ୍ଡ ସହ ଅନ୍ତର୍ଜାତୀୟ କ୍ୟାରିୟରର ଡେବ୍ୟୁ କରିଥାଇପାରନ୍ତି ମାତ୍ର ସେ ମୂଳତଃ ପାକିସ୍ତାନର ଅଟନ୍ତି । ମୁହମ୍ମଦ ଅବ୍ବାସ ପୂର୍ବତନ ପାକିସ୍ତାନୀ କ୍ରିକେଟର ଅଜହର ଅବ୍ବାସଙ୍କ ପୁଅ ଅଟନ୍ତି । ତାଙ୍କ ବାପା ପାକିସ୍ତାନ ଏବଂ ନ୍ୟୁଜିଲାଣ୍ଡ ଉଭୟ ଲାଗି ଫାଷ୍ଟ କ୍ଲାସ କ୍ରିକେଟ ଖେଳିଛନ୍ତି ।
