ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ କ୍ୟାବିନେଟ ବୁଧବାର (୧୬ ଜୁଲାଇ ୨୦୨୫) ତିନୋଟି ପ୍ରମୁଖ ନିଷ୍ପତ୍ତିକୁ ମଞ୍ଜୁରୀ ଦେଇଛି । କୃଷି ଅର୍ଥନୀତି ଏବଂ ନବୀକରଣ ଯୋଗ୍ୟ ଶକ୍ତି କ୍ଷେତ୍ରରେ ଦେଶକୁ ସୁଦୃଢ଼ କରିବା ପାଇଁ କେନ୍ଦ୍ର କ୍ୟାବିନେଟ ଏହି ପଦକ୍ଷେପ ନେଇଛି । ଏଥିରେ ପ୍ରଧାନମନ୍ତ୍ରୀ ଧନଧାନ୍ୟ କୃଷି ଯୋଜନା (PMDDKY), NTPC ଏବଂ NLC ଇଣ୍ଡିଆ ଲିମିଟେଡ୍ ଅନ୍ତର୍ଭୁକ୍ତ । ଏଥିରେ ସରକାର ବଡ଼ ନିବେଶ କରିବାକୁ ଘୋଷଣା କରିଛନ୍ତି । ଚାଷୀଙ୍କ ଜୀବନରେ ପରିବର୍ତ୍ତନ ଆଣିବା ହିଁ ଧନଧାନ୍ୟ କୃଷି ଯୋଜନାର ଲକ୍ଷ୍ୟ । ସରକାର କୃଷି ଜିଲ୍ଲାଗୁଡ଼ିକର ସାମଗ୍ରିକ ବିକାଶ ପାଇଁ ୩୬ଟି କେନ୍ଦ୍ରୀୟ ଯୋଜନାର ସମନ୍ୱୟ ମାଧ୍ୟମରେ ପ୍ରତିବର୍ଷ ୨୪,୦୦୦ କୋଟି ଟଙ୍କା ଖର୍ଚ୍ଚ କରିବେ । ଏଥିପାଇଁ ୧୦୦ଟି ଜିଲ୍ଲାକୁ ଚୟନ କରାଯାଇଛି । 

ପ୍ରଧାନମନ୍ତ୍ରୀ ଧନଧାନ୍ୟ କୃଷି ଯୋଜନା 

୧୦୦ଟି ଜିଲ୍ଲାକୁ କୃଷି ଜିଲ୍ଲା ଭାବରେ ବିକଶିତ କରାଯିବ ।

କୃଷି କ୍ଷେତ୍ରରେ ପଛରେ ଥିବା ୧୦୦ଟି ଜିଲ୍ଲା (ପ୍ରତ୍ୟେକ ରାଜ୍ୟରୁ ଅତି କମରେ ଗୋଟିଏ ଜିଲ୍ଲା) ବିକଶିତ କରାଯିବ ।

୧୧ଟି ମନ୍ତ୍ରଣାଳୟର ୩୬ଟି ଯୋଜନା ଏଠାରେ ସମନ୍ୱିତ ଭାବରେ କାର୍ଯ୍ୟକାରୀ ହେବ ।

ଏହା ଏକ ୬ ବର୍ଷର କାର୍ଯ୍ୟକ୍ରମ ।

ପ୍ରତିବର୍ଷ ୨୪୦୦୦ କୋଟି ଟଙ୍କା ବ୍ୟୟବରାଦ କରାଯାଇଛି ।

ଜଳସେଚନ ସୁବିଧା ବିକଶିତ କରିବା ଏବଂ କୃଷି ଉତ୍ପାଦକତା ବୃଦ୍ଧି କରିବା ପାଇଁ ଏହି ଯୋଜନା ।

ଫସଲ ଅମଳ ପରେ ସଂରକ୍ଷଣ ଏବଂ ଋଣର ଉପଲବ୍ଧତା ବୃଦ୍ଧି କରିବାକୁ ସରକାରଙ୍କ ପ୍ରୟାସ ।

ସେହିଭଳି ନବୀକରଣ ଯୋଗ୍ୟ ଶକ୍ତି କ୍ଷେତ୍ରରେ ବିସ୍ତାର ପାଇଁ କେନ୍ଦ୍ର କ୍ୟାବିନେଟରେ NLC ଇଣ୍ଡିଆ ଲିମିଟେଡ୍ (NLCIL)କୁ ୭୦୦୦ କୋଟି ଟଙ୍କା ନିବେଶକୁ ଅନୁମୋଦନ ମିଳିଛି । କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ସରକାର ସବୁଜ ଶକ୍ତି କ୍ଷେତ୍ରରେ ନିବେଶ ପାଇଁ NTPCକୁ  ୨୦  ହଜାର କୋଟି ଟଙ୍କା ନିବେଶକୁ ମଞ୍ଜୁରୀ ଦେଇଛି  । 

କ୍ୟାବିନେଟ ବୈଠକ ପରେ କେନ୍ଦ୍ର ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି, ‘ଗ୍ରୁପ୍ କ୍ୟାପ୍ଟେନ୍ ଶୁଭାଂଶୁ ଶୁକ୍ଳାଙ୍କ ମିଶନ କେବଳ ଜଣେ ବ୍ୟକ୍ତିଙ୍କ ସଫଳତା ନୁହେଁ, ଏହା ଭାରତର ଯୁବ ପିଢ଼ିଙ୍କ ପାଇଁ ପ୍ରେରଣା । ଯୁବକମାନଙ୍କ ମଧ୍ୟରେ ଜିଜ୍ଞାସା ବୃଦ୍ଧି କରିବ ଏବଂ ବୈଜ୍ଞାନିକ ଚିନ୍ତାଧାରା ବିକଶିତ କରିବ। ଏହା ଦ୍ୱାରା ପ୍ରଭାବିତ ହୋଇ ବହୁ ସଂଖ୍ୟକ ଯୁବପିଢ଼ି ବିଜ୍ଞାନ ଏବଂ ନବସୃଜନକୁ ନିଜର କ୍ୟାରିୟର କରିବେ। କ୍ୟାବିନେଟ ଦୃଢ଼ ଭାବରେ ବିଶ୍ୱାସ କରେ ଯେ, ଏହି ମିଶନ ବିକଶିତ ଭାରତର ସଂକଳ୍ପକୁ ନୂତନ ଶକ୍ତି ଦେବ। ପ୍ରଧାନମନ୍ତ୍ରୀଙ୍କ ସ୍ୱପ୍ନ ୨୦୪୭ ସୁଦ୍ଧା ଭାରତକୁ ଏକ ବିକଶିତ ରାଷ୍ଟ୍ର କରିବା ପାଇଁ ନୂତନ ଶକ୍ତି ପାଇବ।’