ନୂଆଦିଲ୍ଲୀ: ଭାରତ ନାଟୋ ମୁଖ୍ୟ ମାର୍କ ରୁଟେଙ୍କ ରୁଷିଆ ସହିତ ତୈଳ ଏବଂ ଗ୍ୟାସ ବ୍ୟାପାର ଜାରି ରଖିବା ପାଇଁ ଧମକକୁ ଦୃଢ଼ତାର ସହ ପ୍ରତ୍ୟାଖ୍ୟାନ କରିଛି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୟସୱାଲ ଗୁରୁବାର ଦିନ କହିଛନ୍ତି ଯେ, ଭାରତର ଜାତୀୟ ଶକ୍ତି ଆବଶ୍ୟକତା ସୁରକ୍ଷିତ କରିବା ହେଉଛି ଦେଶର ମୁଖ୍ୟ ପ୍ରାଥମିକତା। ଯାହା ବର୍ତ୍ତମାନର ବଜାର ପରିସ୍ଥିତି ଏବଂ ବିଶ୍ୱ ଭୂ-ରାଜନୈତିକ ପରିସ୍ଥିତି ଦ୍ୱାରା ପରିଚାଳିତ। ସେ ପଶ୍ଚିମ ଦେଶମାନଙ୍କୁ ଦ୍ୱିମୁଖୀ ନୀତି ଗ୍ରହଣ ନକରିବା ପାଇଁ ମଧ୍ୟ ସତର୍କ କରିଛନ୍ତି।

ନାଟୋ ମହାସଚିବ ମାର୍କ ରୁଟେ ବୁଧବାର ଆମେରିକୀୟ ସେନେଟରମାନଙ୍କ ସହ ବୈଠକ ପରେ ଭାରତ, ଚୀନ ଏବଂ ବ୍ରାଜିଲକୁ ରୁଷିଆ ସହିତ ବ୍ୟାପାର ଜାରି ରଖିଲେ ୧୦୦% ଦ୍ୱିତୀୟ ନିଷେଧାଜ୍ଞା(ପ୍ରତିବନ୍ଧକ) ଲାଗୁ କରିବା ପାଇଁ ଧମକ ଦେଇଥିଲେ। ସେ ଏହି ଦେଶଗୁଡ଼ିକୁ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କୁ ୟୁକ୍ରେନ ସହିତ ଶାନ୍ତି ଆଲୋଚନା ପାଇଁ ଚାପ ପ୍ରୟୋଗ କରିବାକୁ କହିଥିଲେ। ଆପଣଙ୍କୁ ଜଣାଇରଖୁ ଯେ ଏହା ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ରୁଷିଆ ଏବଂ ତାହାର ବ୍ୟାପାରିକ ଅଂଶୀଦାରମାନଙ୍କ ଉପରେ ପାଲଟା ଶୁଳ୍କ ଲଗାଇବା ଧମକ ସହ ସମାନ।

ଭାରତ ନିଜର ଶକ୍ତି ସୁରକ୍ଷାକୁ ପ୍ରାଥମିକତା ଦେଇ କହିଛି ଯେ, ୨୦୨୨ ମସିହାରୁ ରୁଷିଆ ରିହାତି ମୂଲ୍ୟରେ ଭାରତକୁ ତୈଳ ଆମଦାନୀ କରୁଛି। ଏହା ଏକ ବ୍ୟାବହାରିକ ପଦକ୍ଷେପ, ଯାହା ଦେଶର ଅର୍ଥନୀତିକୁ ବିଶ୍ୱ ତୈଳ ମୂଲ୍ୟ ଅସ୍ଥିରତାରୁ ରକ୍ଷା କରି ପାରିଛି। ଭାରତ ମଧ୍ୟପ୍ରାଚ୍ୟ, ଆଫ୍ରିକା ଏବଂ ଆମେରିକାରୁ ତୈଳ ଆମଦାନୀ କରି ନିଜର ଉତ୍ସକୁ ବିବିଧୀକରଣ କରିଛି। ଯାହା ରୁଷିଆ ଉପରେ ଅତ୍ୟଧିକ ନିର୍ଭରଶୀଳତାର ଅଭିଯୋଗକୁ ଖଣ୍ଡନ କରେ।

ଜୟସୱାଲ ପଶ୍ଚିମ ଦେଶମାନଙ୍କର ଦ୍ୱିମୁଖୀ ନୀତିକୁ କଟାକ୍ଷ କରି କହିଛନ୍ତି ଯେ, ନାଟୋ ସଦସ୍ୟ ଦେଶମାନେ, ଯେପରିକି ତୁର୍କୀ ନିଜେ ରୁଷିଆରୁ ତୈଳ ଏବଂ ଗ୍ୟାସ ଆମଦାନୀ ଜାରି ରଖିଛି। ସେଣ୍ଟର ଫର ରିସର୍ଚ ଅନ ଏନର୍ଜୀ ଆଣ୍ଡ କ୍ଲିନ ଏୟାର (CREA) ରିପୋର୍ଟ ଅନୁସାରେ, ୨୦୨୨ ପରେ ୟୁରୋପୀୟ ସଂଘ ରୁଷିଆରୁ ୫୧% ତରଳୀକୃତ ପ୍ରାକୃତିକ ଗ୍ୟାସ ଏବଂ ୩୭% ପାଇପଲାଇନ ଗ୍ୟାସ ଆମଦାନୀ କରିଛି। ଯାହା ୟୁକ୍ରେନକୁ ଦିଆଯାଇଥିବା ସାହାଯ୍ୟ ଅପେକ୍ଷା ଅଧିକ।

ନାଟୋର ଏହି ଧମକର ଉଚିତ୍ ଜବାବ ଭାରତ ଫେରାଇଛି। ଏହି ଘଟଣା ନାଟୋ ଏବଂ ପଶ୍ଚିମ ଦେଶମାନଙ୍କ ପାଇଁ ଏକ ସତର୍କ ଘଣ୍ଟି ଭାବେ କାର୍ଯ୍ୟ କରୁଛି। କାରଣ ଭାରତ ଏହି ଧମକର ଜବାବ ଦେଇ ନିଜର ଶକ୍ତି ସୁରକ୍ଷା ଏବଂ ଅର୍ଥନୈତିକ ସ୍ୱାର୍ଥକୁ ନେଇ ବୁଝାମଣା କରିବ ନାହିଁ ବୋଲି ସଙ୍କେତ ଦେଇଛି। ଏକ ବିକାଶଶୀଳ ଦେଶ ଭାବେ ଭାରତର ଏହି ଦୃଢ଼ ଅବସ୍ଥାନ ଅନ୍ୟ ଦେଶମାନଙ୍କ ପାଇଁ ପ୍ରେରଣାର ଉତ୍ସ ପାଲଟିଛି।