ବାଲେଶ୍ଵର,୩୦/୦୮: ଦୀର୍ଘ ତିନିଦିନ ହେଲା ନାବାଳିକା ଜଣକ ନିଖୋଜ ହୋଇଥିଲେ । ପରେ ରେମୁଣା ବ୍ଲକ ଇସ୍ପାତ କାରଖାନା ନିକଟସ୍ଥ ଏକ ପରିତ୍ୟକ୍ତ ବନ୍ଦ କୋଠରୀରୁ ଉଦ୍ଧାର ହେଲା ୯ ବର୍ଷୀୟ ନାବାଳିକାଙ୍କ ଗଳିତ ମୃତଦେହ ।  ଦୁଷ୍କର୍ମ ପରେ ହତ୍ୟା ହୋଇଥିବା ଅଭିଯୋଗ କରିଲେ ପରିବାର ଲୋକେ । ହତ୍ୟାକାଣ୍ଡରେ ସମ୍ପୃକ୍ତ ଥିବା ବ୍ୟକ୍ତି ରବି ସିଂ ଗିରଫ । ସେ କିଛିଦିନ ଧରି ରସଲପୁର ଅଞ୍ଚଳରେ ବୋଲି ଜଣାପଡିଛି ।

ସୂଚନା ଅନୁଯାୟୀ, ରବି ସିଂ ଅନେକ ସମୟରେ ନାବାଳିକାଙ୍କ ଘରକୁ ଯିବା ଆସିବା କରୁଥିଲା । ତେବେ ଅଗଷ୍ଟ ୨୭ ତାରିଖ ଅର୍ଥାତ ମଙ୍ଗଳବାରରେ ନାବାଳିକା ଜଣକ ନିଖୋଜ ହୋଇଥିଲେ । ନିଖୋଜ ହୋଇଥିବାରୁ ତାଙ୍କ ପରିବାର ଲୋକେ ଥାନାରେ ଅଭିଯୋଗ କରିଥିଲେ । ଏହାର ତିନି ଦିନ ପରେ ରେମୁଣାବ୍ଲକ ଇସ୍ପାତ କାରଖାନା ପାଖରେ ଥିବା ଏକ ପରିତ୍ୟକ୍ତ ବନ୍ଦ କୋଠରୀ ଭିତରେ ଦୁର୍ଗନ୍ଧ ହେବାର ଦେଖିବାକୁ ପାଇଥିଲେ ସ୍ଥାନୀୟଲୋକେ । ଏହା ଦେଖି  ସ୍ଥାନୀୟଲୋକ ପୋଲିସକୁ ଏ ବିଷୟରେ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପହଞ୍ଚି ପୋଲିସ ଉକ୍ତ ଘର ଭିତରୁ ନିଖୋଜ ନାବାଳିକାର ମୃତଦେହ ଉଦ୍ଧାର କରିଛି । ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ପୋଲିସ । ଘଟଣାସ୍ଥଳରେ ଏକ ସାଇଣ୍ଟିଫିକ ଟିମ୍‌ ଆସି ତଦନ୍ତ ଆରମ୍ଭ କରିଛି । ତେବେ ନାବାଳିକାଙ୍କୁ ଦୁଷ୍କର୍ମ କରିବା ପରେ ହତ୍ୟା କରାଯାଇଥିବା ପରିବାର ତରଫରୁ ଅଭିଯୋଗ ହୋଇଛି । ଏହି ହତ୍ୟାକାଣ୍ଡରେ ସମ୍ପୃକ୍ତ ଥିବା ଅଭିଯୁକ୍ତକୁ ଥାନାରେ ଅଟକ ରଖି ପଚରାଉଚରା କରୁଛି ପୋଲିସ ।