ନୀଳଗିରି,୧୩/୯ : ବାଲେଶ୍ୱର ଜିଲ୍ଲା ନୀଳଗିରି ଉପଖଣ୍ଡ ଅଧିନ ବାବା ପଞ୍ଚଲିଙ୍ଗେଶ୍ୱର ଶୈବ ପୀଠକୁ ବୁଲିବାକୁ ଆସିଥିବା ବଙ୍ଗୀୟ ପର୍ଯ୍ୟଟକଙ୍କ ମଧ୍ୟରୁ ଜଣେ ନିଖୋଜ । ଏ ନେଇ ପରିବାର ପକ୍ଷରୁ ଆଜି ନୀଳଗିରି ଥାନାରେ ଲିଖିତ ଅଭିଯୋଗ ହୋଇଛି । 

ସୂଚନା ମୁତାବକ ଗତ ୧୧ ତାରିଖ ବୁଧବାର ବଙ୍ଗ ପ୍ରଦେଶ ହାଓଡ଼ା ଜିଲ୍ଲା ଶ୍ୟାମପୁର ଥାନା ଅଞ୍ଚଳର ୬୦ରୁ ଊର୍ଦ୍ଧ୍ବ ବଙ୍ଗୀୟ ପର୍ଯ୍ୟଟକ ନୀଳଗିରିସ୍ଥିତ ବାବା ପଞ୍ଚଲିଙ୍ଗେଶ୍ୱର ଶୈବ ପୀଠକୁ ଏକ ଘରୋଇ ବସରେ ବୁଲିବାକୁ ଆସିଥିଲେ ।  ଯିବାବେଳେ ପର୍ଯ୍ୟଟକମାନଙ୍କ ମଧ୍ୟରୁ ଉକ୍ତ ଥାନା ଅନ୍ତର୍ଗତ ଗୋବିନ୍ଦପୁର ଗ୍ରାମର ସ୍ବର୍ଗତ ଈଶ୍ୱର ବିବେକାନନ୍ଦ କୁନ୍ତୀଙ୍କ ପୁଅ ସୁଜିତ (୪୮) ବସରେ ଯାଇ ନ ପାରି କୁଆଡ଼େ ନିଖୋଜ ହୋଇଯାଇଛନ୍ତି ବୋଲି ଆଜି ପରିବାରର ସୁଜିତଙ୍କ ପୁଅ ଶୈକତ କୁନ୍ତୀ, ଭାଇ ସୁନୀଲ କୁନ୍ତୀ, ପୁତୁରା ପୁଷ୍ପେନ୍ଦୁ କୁନ୍ତୀ ଶୈବ ପୀଠରେ ଆଜି ସକାଳ ୧୦ଘଟିକାରେ ପହଞ୍ଚି  ସିସି ଟିଭି ଫୁଟେଜ ଦେଖିବା ସହ ପୀଠ ସ୍ଥଳୀରେ ଥିବା ଦୋକାନୀମାନଙ୍କୁ ଫଟୋ ଦେଖାଇ ଭାଇର ଠିକଣା ପଚାରିଥିଲେ । ବହୁ ଖୋଜାଖୋଜି କରିବା ପରେ ସୁଜିତର ଠିକଣା ନ ପାଇ ନିରୁପାୟ ହୋଇ ନୀଳଗିରି ଥାନାରେ ଏକ ଲିଖିତ ଅଭିଯୋଗ କରିଛନ୍ତି । ଅଭିଯୋଗ ପାଇ ପୋଲିସ ତଦନ୍ତ ଚଳାଇଛି ।