ଜୟପୁର,୦୧/୧୦: ସୋମବାର ଶେଷ ହୋଇଛି ସେଷ୍ଟ୍ରାଲ୍ କିଚେନ ପକ୍ଷରୁ ସରକାରୀ ସ୍କୁଲଗୁଡ଼ିକୁ (ମଧ୍ୟାହ୍ନଭୋଜନ)ଏମ୍ଡିଏମ୍ ଯୋଗାଣ ଚୁକ୍ତି । ଏହା ନବୀକରଣ ହେବ ନା ନାହିଁ ସ୍ପଷ୍ଟ ହୋଇନି । ଏହାକୁ ନେଇ ଏବେ ଦ୍ୱନ୍ଦ୍ୱରେ ରହିଛନ୍ତି ସ୍କୁଲଗୁଡ଼ିକର ପ୍ରଧାନଶିକ୍ଷକ । ମଙ୍ଗଳବାରରୁ ଛାତ୍ରଛାତ୍ରୀଙ୍କୁ କିଏ ଯୋଗାଇବ ଏମ୍ଡିଏମ୍, ତାହା ଜଣାପଡ଼ିନି । ସନ୍ଧ୍ୟା ସୁଦ୍ଧା ଏ ସମ୍ପର୍କରେ ସ୍କୁଲ କର୍ତ୍ତୃପକ୍ଷଙ୍କୁ କୌଣସି ସୂଚନା ଦିଆଯାଇନି । ପ୍ରଶ୍ନ ଉଠୁଛି ପିଲା କ’ଣ ଭୋକିଲା ରହିବେ ନା କିଛି ବିକଳ୍ପ ବ୍ୟବସ୍ଥା କରାଯିବ । କୌଣସି ଆଗୁଆ ପ୍ରସ୍ତୁତି କରାଯାଇ ନ ଥିବାରୁ ଅଡ଼ୁଆରେ ସ୍କୁଲ କର୍ତ୍ତୃପକ୍ଷ । ସେଣ୍ଟ୍ରାଲ୍ କିଚେନ ପକ୍ଷରୁ ଜୟପୁର ବ୍ଲକ୍ ଓ ପୌରାଞ୍ଚଳ, କୋରାପୁଟ ପୌରାଞ୍ଚଳ ଏବଂ ବୋରିଗୁମ୍ମା ବ୍ଲକର ୩୧୨ ସରକାରୀ ସ୍କୁଲକୁ ଏମ୍ଡିଏମ୍ ଯୋଗାଣ ହେଉଛି । ବର୍ଷକ ଲାଗି ଏହା ଯୋଗାଇବାକୁ ଡିଇଓ କାର୍ଯ୍ୟାଳୟ ସହ ଚୁକ୍ତି କରିଥିଲା ଏକ ଘରୋଇ ସଂସ୍ଥା । ଚୁକ୍ତିର ଅବଧି ସୋମବାର ଶେଷ ହୋଇଯାଇଛି । ପୂର୍ବରୁ ସ୍କୁଲକୁ ସଂସ୍ଥା ପକ୍ଷରୁ ଦିଆଯାଇଥିବା ଷ୍ଟିଲ୍ କଣ୍ଟେନର ଫେରାଇ ନିଆଯାଇଛି ।
ସଂସ୍ଥା ପକ୍ଷରୁ ଦିଆଯାଉଥିବା ଏମ୍ଡିଏମ୍ ଯୋଗାଣର ମାନ ସମ୍ପର୍କରେ ଟିପ୍ପଣୀ ଦେବାକୁ ପ୍ରଧାନଶିକ୍ଷକ ଓ ପରିଚାଳନା କର୍ତ୍ତୃପକ୍ଷଙ୍କୁ ଚିଠି କରିଥିଲେ ଜିଲ୍ଲାପାଳ । ଚିଠି ମିଳିବା ପରେ ପରିଚାଳନା କମିଟିଗୁଡ଼ିକ ବୈଠକ କରିଥିଲେ । ୮୦ ପ୍ରତିଶତ ପରିଚାଳନା କିମିଟି ଓ ପ୍ରଧାନଶିକ୍ଷକ ସଂସ୍ଥା ବିରୋଧରେ ଟିପ୍ପଣୀ ଦେଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି । ସେମାନେ ସ୍କୁଲରେ ହିଁ ମଧ୍ୟାହ୍ନ ଭୋଜନ ରୋଷେଇ କରିବାକୁ ଅନୁରୋଧ କରିଛନ୍ତି । ଏଥିରୁ ସ୍ପଷ୍ଟ ହେଉଛି ଅଧିକାଂଶ ସ୍କଲ କର୍ତ୍ତୃପକ୍ଷ ଚାହୁଁନାହାନ୍ତି ପୁଣି ଥରେ ଉକ୍ତ ସଂସ୍ଥା ଏମ୍ଡିଏମ୍ ଯୋଗାଉ। ଯାହା ଜଣାପଡ଼ୁଛି, ଏଭଳି ମନ୍ତବ୍ୟ ପରେ ଉକ୍ତ ସଂସ୍ଥାର ଚୁକ୍ତି ନବୀକରଣ ହୋଇନପାରେ । ଆଉ ଯଦି ନବୀକରଣ ହେବନି, ତା’ହେଲେ ମଙ୍ଗଳବାରଠାରୁ ମଧ୍ୟାହ୍ନ ଭୋଜନ ଯୋଗାଇବ କିଏ ।
କେତେକ ସ୍କୁଲର ପ୍ରଧାନଶିକ୍ଷକ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ମଙ୍ଗଳବାରରୁ ମଧ୍ୟାହ୍ନ ଭୋଜନ ସମ୍ପର୍କରେ ବିଇଓ କାର୍ଯ୍ୟାଳୟ ତରଫରୁ କୌଣସି ସୂଚନା ଦିଆଯାଇନି । ସଙ୍ଗେସଙ୍ଗେ ସ୍କୁଲରେ ରୋଷେଇ କରିବାକୁ ନିର୍ଦ୍ଦେଶ ମିଳିଲେ ଅସୁବିଧା ହେବ । କାରଣ ରୋଷେଇ ଲାଗି କେହି ପ୍ରସ୍ତୁତ ହୋଇନାହାନ୍ତି । ଏଥିଲାଗି ଦରକାର ପଡ଼ୁଥିବା ସାମଗ୍ରୀ କିଣିବାକୁ ପଡ଼ିବ । ଦୀର୍ଘଦିନ ହେବ ରୋଷେଇ ହେଉ ନ ଥିବାରୁ ରୋଷେଇ ଘରକୁ ପ୍ରଥମେ ସଫାସୁତରା କରିବାକୁ ହେବ । ସବୁଠୁ ବଡ଼ ସମସ୍ୟା ହେବ ଖୋଲାବଜାରରୁ ଚାଉଳ କିଣିବା । କାରଣ ଏଥିଲାଗି ଡିଇଓଙ୍କ କାର୍ଯ୍ୟାଳୟରୁ ନିର୍ଦ୍ଦେଶ ଆସିବା ଦରକାର । ତା’ ପରେ ରୋଷେଇ ଦାୟିତ୍ୱ ଏସ୍ଏଚ୍ଜି ନେବ ନା ସ୍କୁଲ କର୍ତ୍ତୃପକ୍ଷ-ତାହା ବି ସ୍ପଷ୍ଟ ହୋଇନି । ଅତିକମ୍ରେ ସପ୍ତାହେ ପୂର୍ବରୁ ପ୍ରସ୍ତୁତି ଆରମ୍ଭ ହୋଇଥିଲେ ରୋଷେଇ କରିବାରେ କୌଣସି ସମସ୍ୟା ନଥାନ୍ତା ।
ଏ ସମ୍ପର୍କରେ ବିଇଓ ଚନ୍ଦନ କୁମାର ନାୟକ କହିଛନ୍ତି, ଜିଲ୍ଲା ଶିକ୍ଷା ଅଧିକାରୀଙ୍କ ନିର୍ଦ୍ଦେଶକୁ ଅପେକ୍ଷା କରାଯାଇଛି । ନିର୍ଦ୍ଦେଶ ଆସିବା ପରେ ହିଁ ପ୍ରଧାନଶିକ୍ଷକଙ୍କୁ ଅବଗତ କରିବେ ।
