ପାରାଦୀପ, ୧୭/୧୦ : ମାଛ ଧରି ଫେରିବା ବେଳେ ଅଘଟଣ। ନେହେରୁ ବଙ୍ଗଳା ନିକଟସ୍ଥ ସମୁଦ୍ରରେ ବୁଡିଲା ମାଛଧରା ବୋଟ୍। ବୋଟରେ ୩ ଜଣ ମତ୍ସ୍ୟଜୀବୀ ଥିଲେ। ସେମାନଙ୍କ ମଧ୍ୟରୁ ଦୁଇ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଏବେବି ଜଣେ ନିଖୋଜ ଅଛନ୍ତି।
ସୂଚନାନୁଯାୟୀ, ଦୟା ସାଗର ନାମକ ଏକ ମାଛଧରା ବୋଟ୍ ବୁଧବାର ସମୁଦ୍ରକୁ ରାତିରେ ମାଛ ଧରିବାକୁ ଯାଇଥିଲା। ଆଜି ମାଛ ଧରି ଫେରୁଥିବା ବେଳେ ଉଚ୍ଚା ଲହଡି ଯୋଗୁଁ ବୋଟ୍ଟି ନେହେରୁ ବଙ୍ଗଳା ନିକଟସ୍ଥ ସମୁଦ୍ରରେ ବୁଡି ଯାଇଥିଲା। ଏହି ବୋଟ୍ରେ ୩ ଜଣ ମତ୍ସ୍ୟଜୀବୀ ଥିଲେ। ସ୍ଥାନୀୟ ବୋଟ୍ ସହାୟତାରେ ୨ ଜଣଙ୍କୁ ଉଦ୍ଧାର କରାଯାଇଥିବା ବେଳେ ଏବେବି ଜଣେ ନିଖୋଜ ଅଛନ୍ତି। ନିଖୋଜ ଜଣଙ୍କ ହେଉଛନ୍ତି ଗୋପିଲା ସିନୁ। ଏବେ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଏପର୍ଯ୍ୟନ୍ତ ସିନୁଙ୍କର ସନ୍ଧାନ ମିଳିନାହିଁ।
