ମୁମ୍ବାଇ,୨୮/୦୧: 'ସ୍କାଏ ଫୋର୍ସ' ସହ ବଡ଼ ପରଦାରେ ନିଜର ଦମଦାର ଅଭିନୟ ଦେଖାଉଛନ୍ତି ବଲିଉଡ଼ ଅଭିନେତା ଅକ୍ଷୟ କୁମାର। ବହୁ ପ୍ରତୀକ୍ଷିତ ତାଙ୍କର ଏହି ଫିଲ୍ମ ଜାନୁଆରୀ ୨୪ ରେ ସିନେମା ହଲରେ ମୁକ୍ତିଲାଭ କରିଛି । ଏହି ଫିଲ୍ମ ଦର୍ଶକଙ୍କ ମନ ଜିତିଛି । ପ୍ରଥମ ଦିନରେ ଫିଲ୍ମଟି ବକ୍ସ ଅଫିସରେ ଭଲ ପ୍ରଦର୍ଶନ କରିଥିବା ବେଳେ ୪ର୍ଥ ଦିନରେ ମଧ୍ୟ ବକ୍ସ ଅଫିସରେ ଧମାକା କରୁଛି ଫିଲ୍ମ ।
ନିର୍ମାତାଙ୍କ ଅନୁସାରେ, 'ସ୍କାଏ ଫୋର୍ସ' ପ୍ରଥମ ଦିନରେ ୧୫.୩୦ କୋଟି ଟଙ୍କାର ବ୍ୟବସାୟ କରିଥିଲା । ଦ୍ୱିତୀୟ ଦିନରେ, ଅକ୍ଷୟ କୁମାର ଅଭିନୀତ ଏହି ଫିଲ୍ମଟି ୨୬.୩୦ କୋଟି ଟଙ୍କା ରୋଜଗାର କରିଥିଲା । ସେହିପରି ତୃତୀୟ ଦିନରେ, ଗଣତନ୍ତ୍ର ଦିବସ ଅବସରରେ, ଫିଲ୍ମର କଲେକ୍ସନରେ ବୃଦ୍ଧି ରେକର୍ଡ କରାଯାଇଥିଲା। ୨୬ ଜାନୁଆରୀ ଅବସରରେ 'ସ୍କାଏ ଫୋର୍ସ' ୩୧.୬୦ କୋଟି ଟଙ୍କା ରୋଜଗାର କରିଥିଲା । ଫଳରେ ଫିଲ୍ମ ମୋଟ ୯୨.୯୦କୋଟି ଆୟ କରି ସଫଳତା ହାସଲ କରିଛି । ଆଉ ଖୁବଶୀଘ୍ର ଏହା ଶହେ କୋଟି କ୍ଲବରେ ସାମିଲ ହେବା ନେଇ ଆଶା କରାଯାଉଛି। ସେହିପରି ସାକ୍ସିଲ୍କଙ୍କ ରିପୋର୍ଟ ଅନୁଯାୟୀ, ସିନେମାଟି ପ୍ରଥମ ଦିନରେ ୧୨.୨୫ କୋଟି ଆୟ କରିଥିଲା ।
ଦ୍ୱିତୀୟ ଦିନରେ ୨୨ କୋଟି ଆୟ କରିଥିବା ବେଳେ ତୃତୀୟ ଦିନରେ ୨୮ କୋଟି ରୋଜଗାର କରିଛି ଯାହା ଏପର୍ଯ୍ୟନ୍ତ ସର୍ବାଧିକ କଲେକ୍ସନ କରିଥିଲା । ଏହା ପରେ ଆଗାମୀ ଦିନରେ ଫିଲ୍ମର ଆୟ ବୃଦ୍ଧି ପାଇବ ବୋଲି ଆକଳନ କରାଯାଇଥିଲା, କିନ୍ତୁ ଆୟରେ ହ୍ରାସ ଘଟିଛି । ଫିଲ୍ମ ୪ର୍ଥ ଦିନରେ ୬.୨୫ କୋଟି ଆୟ କରିଥିବା ବେଳେ ଫିଲ୍ମର ମୋଟ କଲେକ୍ସନ ୬୮.୫୦ କୋଟି ହୋଇପାରିଛି । ପ୍ରକାଶ ଥାଉକି, ସ୍କାଏ ଫୋର୍ସ ହେଉଛି ୨୦୨୫ ମସିହାରେ ନିର୍ମିତ ଏକ ଭାରତୀୟ ହିନ୍ଦୀ ଭାଷାର ଆକ୍ସନ୍ ଡ୍ରାମା ଚଳଚ୍ଚିତ୍ର । ଯାହା ୧୯୬୫ ମସିହାରେ ଭାରତ-ପାକିସ୍ତାନ ବିମାନ ଯୁଦ୍ଧରେ ପାକିସ୍ତାନର ସରଗୋଧା ଏୟାରବେସ୍ ଉପରେ ଭାରତର ଆକ୍ରମଣ ଉପରେ ଆଧାରିତ। ଯାହା ଭାରତର ପ୍ରଥମ ବିମାନ ଆକ୍ରମଣ ଥିଲା । ଫିଲ୍ମରେ ଅକ୍ଷୟ କୁମାର ଏବଂ ବୀର ପହରିଆ ଗୁରୁତ୍ୱପୂର୍ଣ୍ଣ ଭୂମିକାରେ ଅଛନ୍ତି । ସାରା ଅଲି ଖାନ ଏବଂ ନିମ୍ରିତ କୌର ଏଥିରେ ମୁଖ୍ୟ ଅଭିନେତ୍ରୀ ରହିଛନ୍ତି ।
