କଟକ,୧୭/୧୦: ମହାନଦୀ ବକ୍ଷରେ ହେବ ଡ୍ରୋନ୍ ସୋ’ ଲେଜର୍ ଲାଇଟ୍ ସୋ’ । ସୋନୁ ନିଗମ୍, ସୁରେଶ ୱାଡେକର୍, ପୀୟୂଷ ମିଶ୍ରଙ୍କ ଭଳି ବଲିଉଡ୍ର ଷ୍ଟାର୍ ସିଙ୍ଗର୍ଙ୍କୁ ମଞ୍ଚରେ ଦେଖିବେ, ଗୀତ ଶୁଣିବେ ଦର୍ଶକ । ବାଲିଯାତ୍ରା ପଡ଼ିଆରେ ପ୍ରଥମଥର ପୁସ୍ତକ ମେଳାର ଆନନ୍ଦ ଉଠାଇବେ ବହିପ୍ରେମୀ । ଓଡ଼ିଆ ସିନେମାର କ୍ରମବିକାଶର ଝଲକ୍ର ପ୍ରତିଛବି ଦେଖିବାକୁ ମିଳିବ ‘କଟକ୍ ଇନ୍ କଟକ’ରେ । କେବଳ କିଣାବିକା ନୁହେଁ, ମନୋରଂଜନର ଅନେକ ନୂଆ ଆକର୍ଷଣ ଆଣିବ ଏଥରର କଟକ ବାଲିଯାତ୍ରା । ବାଲିଯାତ୍ରାକୁ ଆକର୍ଷଣୀୟ ମହୋତ୍ସବରେ ପରିଣତ କରିବା ପାଇଁ ଏମିତିକା ନକ୍ସା ପ୍ରସ୍ତୁତ କରି ଅଣ୍ଟା ଭିଡ଼ିଛି କଟକ ଜିଲ୍ଲା ପ୍ରଶାସନ ।
ନଭେମ୍ବର ୧୫ ତାରିଖ କାର୍ତ୍ତିକ ପୂର୍ଣ୍ଣିମା ସନ୍ଧ୍ୟାରୁ ବାରବାଟୀ କିଲ୍ଲା ପଡ଼ିଆ ଓ ମହାନଦୀ ପଠାରେ ଆରମ୍ଭ ହେବ ଦେଶର ଅନ୍ୟତମ ବୃହତ ମୁକ୍ତାକାଶ ବାଣିଜ୍ୟ ମେଳା ‘ବାଲିଯାତ୍ରା’ । ଏହି ରାଜ୍ୟସ୍ତରୀୟ ମହୋତ୍ସବକୁ ସଫଳତାର ସହ ଆୟୋଜନ କରିବାକୁ ପ୍ରଶାସନ ତରଫରୁ ଦୁଇ ମାସ ପୂର୍ବରୁ ପ୍ରସ୍ତୁତି ଆରମ୍ଭ ହୋଇସାରିଛି । ଆଜିକୁ ଠିକ୍ ମାସେ ପରେ ବାଲିଯାତ୍ରା ହେଉଥିବା ବେଳେ ଆୟୋଜନ ସଂପର୍କରେ ବୁଧବାର ବିସ୍ତୃତ ସୂଚନା ପ୍ରଦାନ କରିଛି ଜିଲ୍ଲା ପ୍ରଶାସନ । ପାଖାପାଖି ୪୫ ଏକରରୁ ଅଧିକ ଜମିରେ ବାଲିଯାତ୍ରା ଆୟୋଜନ କରାଯାଉଥିବା ବେଳେ ସେଥିରୁ ମହାନଦୀ ପଠା ତଳ ପଡ଼ିଆର ୨୫ ଏକର ଓ ଉପର କିଲ୍ଲା ପଡ଼ିଆରେ ୬ଏକର ଜମିରେ ୧୨ ଶହରୁ ଅଧିକ ଷ୍ଟଲ୍ ରହିବ । ପ୍ଲଟ୍ ବୁକିଂ ପ୍ରକ୍ରିୟା ଏବେ ଜାରି ରହିଛି ।
ସରକାରୀ ସଂସ୍ଥା, ପ୍ରମୁଖ ପ୍ରାୟୋଜକ ଓ ସାଧାରଣ ବ୍ୟବସାୟୀ- ଏଭଳି ତିନିଟି ବର୍ଗରେ ପ୍ଲଟ୍ ଆବଣ୍ଟନ କରାଯାଉଛି । ପୂର୍ବବର୍ଷ ଭଳି ଚଳିତ ବର୍ଷ ମଧ୍ୟ ବାଲିଯାତ୍ରାର ପରିଚାଳନା ଭାର ଇଭେଣ୍ଟ ମ୍ୟାନେଜମେଣ୍ଟ ସଂସ୍ଥା ଉପରେ ରହିଛି । ଚଳିତବର୍ଷ ପ୍ରଶାସନ ଏକ ନୂତନ ବ୍ୟବସ୍ଥା ଲାଗୁ କରିଛି । ସେହି କ୍ରମରେ ସମଗ୍ର ବାଲିଯାତ୍ରା ପାଇଁ ସିଙ୍ଗଲ୍ ଟେଣ୍ଡର୍ କରାଯିବ । ପୂର୍ବରୁ ବିଭିନ୍ନ ସରକାରୀ ସଂସ୍ଥା ନିଜ ନିଜ ବାଟରେ ଟେଣ୍ଡର୍ ଆହ୍ୱାନ କରି କାମ କରୁଥିଲେ । ଓର୍ମାସ୍, ସିଏମ୍ସି ସମେତ ବିଭିନ୍ନ ସରକାରୀ ପ୍ରତିଷ୍ଠାନ ଏଣିକି କିନ୍ତୁ ନିଜ ଆବଶ୍ୟକତା ବା ଚାହିଦା ପୂରଣ କରିବାକୁ ଜିଲ୍ଲା ପ୍ରଶାସନକୁ ପ୍ରସ୍ତାବ ଦେବେ । ଜିଲ୍ଲା ପ୍ରଶାସନ ତରଫରୁ ଧାର୍ଯ୍ୟ ମୂଲ୍ୟରେ ଟେଣ୍ଡର୍ ମାଧ୍ୟମରେ କାମ କରାଯିବ । ରାଜ୍ୟର ବିଭିନ୍ନ ମହୋତ୍ସବରେ ଏଭଳି ବ୍ୟବସ୍ଥା କାର୍ଯ୍ୟକାରୀ କରାଯାଉଥିବା ବେଳେ ପ୍ରଥମଥର ବାଲିଯାତ୍ରାରେ ଜିଲ୍ଲା ପ୍ରଶାସନ ଏଭଳି ନିୟମକୁ ଲାଗୁ କରିଛି ।
ସବୁ ବର୍ଷ ପରି ଏବର୍ଷ ବି ବାଲିଯାତ୍ରାର ମୁଖ୍ୟ ଆକର୍ଷଣ କୁହାଯାଉଥିବା ଗଣକବି ବୈଷ୍ଣବ ପାଣି ମଞ୍ଚ ଓ ଅକ୍ଷୟ ମହାନ୍ତି ମଞ୍ଚରେ ସାଂସ୍କୃତିକ କାର୍ଯ୍ୟକ୍ରମ କରାଯିବ । ବଲିଉଡ୍ର ତାରକା କଣ୍ଠଶିଳ୍ପୀ ସୋନୁ ନିଗମ୍ ମୁଖ୍ୟ ଆକର୍ଷଣ ସାଜିବେ । ଲୋକପ୍ରିୟ କଣ୍ଠଶିଳ୍ପୀ ସୁରେଶ ୱାଡେକର ଓ ପୀୟୂଷ ମିଶ୍ର ମଧ୍ୟ ଗୋଟିଏ ଲେଖାଏଁ ସନ୍ଧ୍ୟାରେ କାର୍ଯ୍ୟକ୍ରମ କରିବେ । ଗତ କିଛି ବର୍ଷ ହେଲାଣି ବାଲିଯାତ୍ରାର ମୁଖ୍ୟ ଆକର୍ଷଣ ପାଲଟିଥିବା ‘କଟକ ଇନ୍ କଟକ’ ଏଥର ନୂଆ ରୂପ ନେବ । ‘ଓଡ଼ିଆ ସିନେମା ମାଧ୍ୟମରେ ଓଡ଼ିଆ ଅସ୍ମିତା’ ବିଷୟବସ୍ତୁକୁ ନେଇ ସଜେଇ ହେବ । ଏଥିରେ ଓଡ଼ିଆ ସିନେମାର ଆଦ୍ୟକାଳରୁ ବର୍ତ୍ତମାନ ଯାଏ କ୍ରମବିକାଶର ପ୍ରତିଛବି ଦେଖିବାକୁ ମିଳିବ । କଟକ ଇନ୍ କଟକ ଭିତରେ ପୁସ୍ତକ ମେଳା ବି କରାଯିବାକୁ ନିଷ୍ପତ୍ତି ହୋଇଛି । ଏଥିସହ ମହାନଦୀ ଉପରେ ଡ୍ରୋନ୍ ସୋ’ କରାଯିବ । ଏକାସଙ୍ଗେ ୩ଶହ ଡ୍ରୋନ୍ ଉଡ଼ି ବାଲିଯାତ୍ରାର ଐତିହ୍ୟ, ଗରିମା ଏବଂ ସ୍ୱତନ୍ତ୍ରତାର ପ୍ରତିଛବିକୁ ନିଆରା ଢଙ୍ଗରେ ପ୍ରଦର୍ଶିତ କରିବେ ।
ଉଦ୍ଘାଟନୀ ସନ୍ଧ୍ୟାର ସୋ ପରେ ଯଦି ଲୋକେ ପସନ୍ଦ କରିବେ, ବାଲିଯାତ୍ରାର ଅନ୍ୟ ସନ୍ଧ୍ୟାମାନଙ୍କରେ ମଧ୍ୟ ଏହା କରାଯିବାର ଯୋଜନା ରହିଛି । ଲେଜର୍ ଲାଇଟ୍ ସୋ’ ମଧ୍ୟ ଦେଖିବାକୁ ମିଳିବ ବୋଲି ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେ ପ୍ରକାଶ କରିଛନ୍ତି । ମ୍ୟୁଜିକାଲ୍ ଫାୟାର୍ ୱାର୍କ (ଆତସବାଜି) ମଧ୍ୟ ଏଥରର ଆଉ ଏକ ଆକର୍ଷଣ ଭାବେ ଯୋଡ଼ି ହେବାକୁ ଯାଉଛି । ଚଳିତବର୍ଷ ପ୍ରଥମଥର ପାଇଁ ‘ବାଲିଯାତ୍ରା ଜୀବନ ଗୌରବ ସମ୍ମାନ’ ମଧ୍ୟ ପ୍ରଦାନ କରାଯିବ । ଏହା ଏକ ରାଜ୍ୟସ୍ତରୀୟ ସମ୍ମାନ ହେବ ବୋଲି ଜଣାପଡ଼ିଛି । ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ବିଶିଷ୍ଟ ବ୍ୟକ୍ତିବିଶେଷଙ୍କୁ ଚୟନ କରାଯାଇ ଏ ସମ୍ମାନ ପ୍ରଦାନ କରାଯିବ ବୋଲି ଜିଲ୍ଲା ପ୍ରଶାସନ ପକ୍ଷରୁ ସୂଚନା ଦିଆଯାଇଛି ।
