ଭଦ୍ରକ, ୧୫/୧୦ : ଦଶହରାରୁ ନିଖୋଜ ଥିଲେ ଯୁବତୀ, ଏବେ ଘର ପାଖ ପୋଖରୀରୁ ମିଳିଲା ମୃତଦେହ। ଭଦ୍ରକ ଜିଲ୍ଲା ଧାମନଗର ଥାନା ଅନ୍ତର୍ଗତ କରଦା ପଞ୍ଚାୟତ ଅଙ୍ଗେଇପାଳ ଗ୍ରାମରେ ଏହି ଘଟଣା ଘଟିଛି। ଯୁବତୀ ଜଣଙ୍କ ହେମନ୍ତ କରଙ୍କ ଝିଅ ଶୁଭସ୍ମିତା କର (୨୩ ବର୍ଷ) ବୋଲି ଜଣାପଡ଼ିଛି।

ସୂଚନାନୁଯାୟୀ, ଶୁଭସ୍ମିତା କର ରବିବାର ଠାରୁ ନିଖୋଜ ଥିଲେ। ଦଶହରା ଥିବାରୁ ଝିଅ ଠାକୁର ଦେଖିବାକୁ ଯାଇଥିବା ପରିବାର ଲୋକେ ଭାବିଥିଲେ। ହେଲେ ବିଳମ୍ଵିତ ରାତି ପର୍ଯ୍ୟନ୍ତ ନଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ। ଝିଅକୁ ନପାଇ ଥାନାରେ ଅଭିଯୋଗ କରିଥିଲେ। ଆଜି ଘର ଠାରୁ କିଛି ଦୂରରେ ଥିବା ପୋଖରୀରୁ ଶୁଭସ୍ମିତାଙ୍କ ମୃତଦେହ ଭାସୁଥିବା ସ୍ଥାନୀୟ ଲୋକେ ଦେଖିବାକୁ ପାଇଥିଲେ। ଖବର ପାଇ ଧାମନଗର ପୋଲିସ ପହଞ୍ଚି ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ଭଦ୍ରକ ପଠାଇ ତଦନ୍ତ ଆରମ୍ଭ କରିଛି। କୌଣସି କାରଣକୁ ନେଇ ଶୁଭସ୍ମିତା ଆତ୍ମହତ୍ୟା କରିଥାଇ ପାରନ୍ତି ବୋଲି ସନ୍ଦେହ କରାଯାଉଛି। ପୋଲିସ ମୃତ ଯୁବତୀଙ୍କ ମୋବାଇଲ୍‌କୁ ଆଧାର କରି ତଦନ୍ତ ଆରମ୍ଭ କରିଛି।