କେନ୍ଦ୍ରାପଡ଼ା, ୧୭/୧୦ : ଅଟୋ ଡ୍ରାଇଭର୍ ଆକ୍ରମଣରୁ ବର୍ତ୍ତିବା ପାଇଁ ଚଳନ୍ତା ଅଟୋରୁ ଡେଇଁ ପଡିଲେ ୨ ଛାତ୍ରୀ। କେନ୍ଦ୍ରାପଡ଼ା ଡେରାବିଶ ଥାନା ଅନ୍ତର୍ଗତ ଚଣ୍ଡିବଜାର ଠାରେ ଏହି ଘଟଣା ଘଟିଛି। ୨ ଛାତ୍ରୀଙ୍କୁ ମଧ୍ୟରୁ ଜଣେ ଗୁରୁତର ଅବସ୍ଥାରେ କଟକର ଏକ ଘରୋଇ ହସ୍ପିଟାଲରେ ଚିକିତ୍ସାଧିନ ଥିବା ବେଳେ ଅନ୍ୟ ଜଣେ ଆହତ ହୋଇଛନ୍ତି।
ଅଭିଯୋଗ ଅନୁଯାୟୀ, କେନ୍ଦ୍ରାପଡାର ଏକ ଘରୋଇ ଶିକ୍ଷାନୁଷ୍ଠାନରେ DMLT କୋର୍ସ କରୁଥିବା ୨ ଛାତ୍ରୀ ସିପ୍ରା ସୋନାଲି ମହାପାତ୍ର ଓ ସ୍ମୃତି ପ୍ରଜ୍ଞା ପରିଡା କ୍ଲାସ୍ ସାରି ସନ୍ଧ୍ୟା ପ୍ରାୟ ୬ଟାରେ ଘରକୁ ଫେରୁଥିଲେ। ଚାନ୍ଦୋଳ ପର୍ଯ୍ୟନ୍ତ ଆସିବାକୁ ତିନି ମୁହାଣୀ ଛକରୁ ଏକ ଅଟୋ ଭଡା କରିଥିଲେ। ଅଟୋ ଚାଳକ ଜଣଙ୍କ ଆସିବା ବାଟରେ ଚଣ୍ଡିବଜାର ନିକଟରେ ନିଛାଟିଆ ଜାଗା ଦେଖି ପଛପଟକୁ ହାତ ବୁଲାଇ ସିପ୍ରା ସୋନାଲି ମହାପାତ୍ରଙ୍କ ବେକକୁ ଭିଡି ଧରିଥିଲା। ଏହା ଦେଖି ସ୍ମୃତି ପ୍ରଜ୍ଞା ଅଟୋ ଚାଳକ କବଳରୁ ସିପ୍ରା ସୋନାଲିଙ୍କୁ ଉଦ୍ଧାର କରିବା ପାଇଁ ଚେଷ୍ଟା କରି ବିଫଳ ହୋଇଥିଲେ। ତେବେ ପରିସ୍ଥିତି କିଛି ଅଧିକ ଖରାପ ହେବା ଆଶଙ୍କା କରି ଜୀବନ ବଞ୍ଚାଇବା ପାଇଁ ଉଭୟ ଛାତ୍ରୀ ଚଳନ୍ତା ଅଟୋରୁ ଡେଇଁ ପଡିଥିଲେ। ଏଥିରେ ସିପ୍ରା ସୋନାଲିଙ୍କ ଗୋଡ ଭାଙ୍ଗି ଯାଇଥିବା ବେଳେ ସ୍ମୃତି ପ୍ରଜ୍ଞାଙ୍କ ହାତ, କାନ୍ଧ, ଗୋଡରେ ଆଘାତ ଲାଗିଛି। ଉଭୟଙ୍କ ସୁନାଚେନ୍ ଓ ପର୍ଶ ଅଟୋ ଚାଳକ ନେଇଯାଇଥିବା ଅଭିଯୋଗ ହୋଇଛି। ଛାତ୍ରୀ ଦୁଇ ଜଣ ଗାଡିରୁ ଡେଇଁ ପଡ଼ିବା ପରେ ଅଟୋ ଚାଳକ ପୁନର୍ବାର କେନ୍ଦ୍ରାପଡା ଅଭିମୁଖେ ଦ୍ରୁତ ଗତିରେ ଫେରାର୍ ହୋଇଯାଇଥିଲା। ଏ ନେଇ ଡେରାବିଶ ଥାନାରେ ଏତଲା ଦିଆଯିବା ପରେ ପୋଲିସ ଅଟୋ ଚାଳକକୁ ଅଟକ ରଖି ପଚରାଉଚୁରା କରୁଛି।