ଢେଙ୍କାନାଳ,୩୦/୩ : ଢେଙ୍କାନାଳ ଜିଲ୍ଲାବାସୀଙ୍କ ପାଇଁ ଖୁସି ଖବର । ଢେଙ୍କାନାଳରେ ପ୍ରତିଷ୍ଠା ହେବ ମେଡିକାଲ କଲେଜ । ମୁଖ୍ୟମନ୍ତ୍ରୀ ମୋହନ ଚରଣ ମାଝି ଶନିବାର ଏ ନେଇ ଘୋଷଣା କରିଛନ୍ତି । ମେଡିକାଲ କଲେଜ ହେଲେ ଜିଲ୍ଲା ସମେତ ପଡ଼ୋଶୀ ଜିଲ୍ଲାବାସୀ ଉନ୍ନତମାନର ସ୍ୱାସ୍ଥ୍ୟସେବା ପାଇବେ । ଏଥିସହ ଡାକ୍ତରୀ ପାଠ ପଢ଼ ିବାର ସୁଯୋଗ ପାଇବେ । ଏହାକୁ ନେଇ ଜିଲ୍ଲାବାସୀଙ୍କ ମଧ୍ୟରେ ଉତ୍କଣ୍ଠା ଦେଖାଦେଇଛି । ଜିଲ୍ଲାରେ ମେଡିକାଲ କଲେଜ ପ୍ରତିଷ୍ଠା ପାଇଁ ଘୋଷଣା କରିଥିବାରୁ ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ମୁଖ୍ୟମନ୍ତ୍ରୀଙ୍କୁ କୃତଜ୍ଞତା ଜଣାଇଛନ୍ତି । ଢେଙ୍କାନାଳ ଜିଲ୍ଲାରେ ମେଡିକାଲ କଲେଜ ପ୍ରତିଷ୍ଠା ନେଇ ବହୁଦିନରୁ ଦାବି ହୋଇ ଆସୁଥିଲା । ବିଭିନ୍ନ ରାଜନୈତକ, ସାମାଜିକ ଓ ସାଂସ୍କୃତିକ ସଂଗଠନ ପକ୍ଷରୁ ବିଭିନ୍ନ ସମୟରେ ଦାବି ଉପସ୍ଥାପନ କରାଯାଉଥିଲା । କେନ୍ଦ୍ର ସରକାର ଆକାଂକ୍ଷୀ ଜିଲ୍ଲା ଭାବରେ ଢେଙ୍କାନାଳ ଜିଲ୍ଲାକୁ ସାମିଲ କରିଥିଲେ । ଆକାଂକ୍ଷା ଜିଲ୍ଲା ହିସାବରେ ମେଡିକାଲ କଲେଜ ପ୍ରତିଷ୍ଠା କରିବା ପାଇଁ କେନ୍ଦ୍ର ସରକାର ନିଷ୍ପତ୍ତି ଗ୍ରହଣ କରିଥିଲେ । ଜନସଂଖ୍ୟା ଓ ଭୌଗଳିକ ଦୃଷ୍ଟିକାଣରୁ ଢେଙ୍କାନାଳ ଜିଲ୍ଲାରେ ମେଡିକାଲ୍ କଲେଜ୍ ପ୍ରତିଷ୍ଠା ଜରୁରୀ । ବର୍ତ୍ତର୍ମାନ ଜିଲ୍ଲା ମୁଖ୍ୟ ଚିକିତ୍ସାଳୟ ୩ଶହ ଶଯ୍ୟା ରହିଛି । ଏହାକୁ ୬ ଶହ ଶଯ୍ୟାରେ ପରିବର୍ଦ୍ଧିତ କରି ମେଡିକାଲ୍ କଲେଜ୍ ପ୍ରତିଷ୍ଠା କରିବା ଦିଗରେ ସମସ୍ତ ମାପଦଣ୍ଡ ପୂରଣ କରୁଛି । ସେହିପରି ମେଡିକାଲ୍ କଲେଜ ହେଲେ ଡାକ୍ତର, ନର୍ସ, ପରୀକ୍ଷାଗାର ସହାୟକ, ଫାର୍ମାସିଷ୍ଟ୍, ରେଡିଓଗ୍ରାଫର୍ ଆଦି ୧୦୦୧ ଜଣ ପଦବି ପୂରଣ ହେବ । ଏହାଦ୍ୱାରା ଢେଙ୍କାନାଳ, ଅନୁଗୁଳ, ଯାଜପୁର, କେନ୍ଦୁଝର ଆଦିର ଜନସାଧାରଣ ଉପକୃତ ହୋଇପାରିବେ ।
ତେଣୁ ଆକାଂକ୍ଷା ଜିଲ୍ଲା ମଧ୍ୟରେ ଢେଙ୍କାନାଳରେ ମେଡିକାଲ୍ କଲେଜ ପ୍ରତିଷ୍ଠା କରି ଜିଲ୍ଲାର ପ୍ରଥମ ସାଂସଦ ଶ୍ରୀସାରଙ୍ଗଧର ଦାସଙ୍କ ନାମରେ ନାମିତ କରିବା ପାଇଁ ଦାବି କରାଯାଇଥିଲା । ମାତ୍ର ତତ୍କାଳୀନ ରାଜ୍ୟ ସରକାର ପ୍ରସ୍ତାବ ନଦେବାରୁ ମେଡିକାଲ କଲେଜ ଘୋଷଣା ହୋଇ ପାରିନଥିଲା । ଗତ ନିର୍ବାଚନ ବେଳେ କ୍ଷମତାକୁ ଆସିଲେ ଢେଙ୍କାନାଳରେ ମେଡିକାଲ କଲେଜ ପ୍ରତିଷ୍ଠା କରାଯିବ ବୋଲି ବିଜେପି ତାର ନିର୍ବାଚନ ଇସ୍ତାହାରରେ ଘୋଷଣା କରିଥିଲା । ରାଜ୍ୟରେ ସରକାର ବଦଳିବା ପରେ ମେଡିକାଲ କଲେଜ ଆଶା ଏବେ ପୂରଣ ହେବାକୁ ଯାଉଛି । ମୁଖ୍ୟମନ୍ତ୍ରୀ ଶନିବାର ଏ ନେଇ ବିଧାନସଭାରେ ଘୋଷଣା କରିଛନ୍ତି । ପ୍ରାଥମିକ ପର୍ଯ୍ୟାୟରେ ଏମ୍ବିବିଏସ୍ ପାଠ୍ୟକ୍ରମ ଆରମ୍ଭ କରାଯିବ । ଏଥିପାଇଁ ବଜେଟ୍ରେ ଅର୍ଥ ଘୋଷଣା କରାଯାଇଛି । କଲେଜ୍ ପ୍ରତିଷ୍ଠା ପାଇଁ ମୁଖ୍ୟ ଚିକିତ୍ସାଳୟ ନିକଟରେ ଆଉ ୨୦ ଏକର ଅତିରିକ୍ତ ଜମି ଅଧିଗ୍ରହଣ ହେବ । ମୁଖ୍ୟ ଚିକିତ୍ସାଳୟର ଉଭୟ ରାସ୍ତାକୁ ପ୍ରଶସ୍ତ କରାଯିବ ବୋଲି ଢେଙ୍କାନାଳ ବିଧାୟକ ତଥା ମନ୍ତ୍ରୀ ଶ୍ରୀ ପାତ୍ର ପ୍ରକାଶ କରିଛନ୍ତି । ଏ ନେଇ ରବିବାର ଅପରାହ୍ନ ୪ଟାରେ ସ୍ଥାନୀୟ ସର୍କିଟ୍ ହାଉସ୍ଠାରେ ଏକ ସାମ୍ୱାଦିକ ସମ୍ମିଳନୀରେ ମନ୍ତ୍ରୀ କହିଛନ୍ତି, ଏହା ଢେଙ୍କାନାଳବାସୀଙ୍କର ବହୁଦିନର ଆଶା ଓ ଦାବି ଥିଲା । ଲୋକପ୍ରିୟ ମୁଖ୍ୟମନ୍ତ୍ରୀ ମୋହନ ମାଝି ଏହାକୁ ପୂରଣ କରି ଶନିବାର ଦିନ ବିଧାନସଭାରେ ଘାଷଣା କରିଛନ୍ତି । ଏଥିପାଇଁ ବଜେଟ୍ ପ୍ରସ୍ତୁତ ହୋଇଛି । ଯାହା ସମସ୍ୟା ରହିଛି ତାହା ଦୂର କରାଯାଇ ଖୁବ୍ ଶୀଘ୍ର କାର୍ଯ୍ୟକ୍ଷମ କରାଯିବ । ଏଥିପାଇଁ ମୁଖ୍ୟମନ୍ତ୍ରୀ ଶ୍ରୀ ମାଝୀ ଓ ସ୍ୱାସ୍ଥ୍ୟମନ୍ତ୍ରୀ ମୁକେଶ ମହାଲିଙ୍ଗଙ୍କୁ ମନ୍ତ୍ରୀ ଶ୍ରୀ ପାତ୍ରଙ୍କ ସମେତ ଜିଲ୍ଲା ବିଜେପି ପକ୍ଷରୁ କୃତଜ୍ଞତା ସହ ଧନ୍ୟବାଦ ପ୍ରଦାନ କରାଯାଇଛି ।
ଏ ଖବର ପ୍ରସାର ହେବା ମାତ୍ରେ ଢେଙ୍କାନାଳ ଜନସାଧାରଣଙ୍କର ମଧ୍ୟରେ ଖୁସି ପ୍ରକାଶ ପାଇଛି । ହିତାଧିକାରୀଙ୍କୁ ମିଳିଲା ଅନ୍ତ୍ୟୋଦୟ ଗୃହ ତିଳକ ଚକ୍ରବର୍ତ୍ତୀଙ୍କ ସଙ୍ଗୀତରେ ମତୁଆଲା ଦର୍ଶକ ପାଳଲହଡ଼ା ମହୋତ୍ସବ-୨୦୨୫ ଉଦ୍ଘାଟିତ ଢେଙ୍କାନାଳରେ ହେବ ମେଡିକାଲ କଲେଜ ।
