ନୂଆଦିଲ୍ଲୀ, ୨୩।୫: ମାତୃତ୍ୱ ଛୁଟିକୁ ନେଇ ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି । ତାମିଲନାଡ଼ୁର ଦାୟର କରାଯାଇଥିବା ଏକ ଆବେଦନରେ ଶୁଣାଣି । ମାତୃତ୍ୱ ଛୁଟି ମହିଳାମାନଙ୍କ ପ୍ରଜନନ ଅଧିକାରର ଏକ ଗୁରୁତ୍ୱପୂର୍ଣ୍ଣ ଅଂଶ ବୋଲି କହିଲେ ସୁପ୍ରିମକୋର୍ଟ । ତାମିଲନାଡ଼ୁ ସରକାରଙ୍କ ଏଭଳି ନିଷ୍ପତ୍ତି ମହିଳାଙ୍କ ମୌଳିକ ଅଧିକାରର ଉଲ୍ଲଙ୍ଘନ ବୋଲି କହିଲେ ଆବେଦନକାରୀଙ୍କ ଓକିଲ । ଶୁକ୍ରବାର ସୁପ୍ରିମକୋର୍ଟ କହିଛନ୍ତି ଯେ, ମାତୃତ୍ୱ ଛୁଟି ମହିଳାମାନଙ୍କ ପ୍ରଜନନ ଅଧିକାରର ଏକ ଗୁରୁତ୍ୱପୂର୍ଣ୍ଣ ଅଂଶ । ତାମିଲନାଡ଼ୁର ଜଣେ ମହିଳା ସରକାରୀ ଶିକ୍ଷକଙ୍କ ଦ୍ୱାରା ଦାୟର କରାଯାଇଥିବା ଏକ ଆବେଦନରେ ସୁପ୍ରିମକୋର୍ଟ ଏକ ଐତିହାସିକ ରାୟ ଶୁଣାଇଛନ୍ତି । ଏହି ମହିଳାଙ୍କୁ ତାଙ୍କ ଦ୍ୱିତୀୟ ବିବାହରୁ ଜନ୍ମିତ ସନ୍ତାନ ପାଇଁ ମାତୃତ୍ୱ ଛୁଟି ଅସ୍ୱୀକାର କରାଯାଇଥିଲା । ତାଙ୍କ ଆବେଦନରେ ମହିଳା ଜଣେ କହିଛନ୍ତି ଯେ, ତାଙ୍କର ପ୍ରଥମ ବିବାହରୁ ଦୁଇଟି ସନ୍ତାନ ଥିବା କାରଣରୁ ତାଙ୍କୁ ମାତୃତ୍ୱ ଛୁଟି ଦିଆଯାଇନଥିଲା ।
କହିରଖୁ କି, ତାମିଲନାଡ଼ୁରେ ଏକ ନିୟମ ରହିଛି ଯେ, ମାତୃତ୍ୱ ସୁବିଧା କେବଳ ପ୍ରଥମ ଦୁଇଟି ସନ୍ତାନ ପାଇଁ ହିଁ ପ୍ରଦାନ କରାଯିବ । ଆବେଦନକାରୀ କହିଛନ୍ତି ଯେ, ସେ ତାଙ୍କ ପ୍ରଥମ ବିବାହରୁ ଜନ୍ମିତ ଦୁଇ ସନ୍ତାନ ପାଇଁ କୌଣସି ମାତୃତ୍ୱ ଛୁଟି କିମ୍ବା ସୁବିଧା ଗ୍ରହଣ କରିନଥିଲେ । ମହିଳା ଏହା ମଧ୍ୟ ଦାବି କରିଛନ୍ତି ଯେ, ସେ ଦ୍ୱିତୀୟ ବିବାହ ପରେ ହିଁ ସରକାରୀ ଚାକିରିରେ ଯୋଗଦେଇଥିଲେ । ଆବେଦନକାରୀଙ୍କ ପକ୍ଷରୁ ଓକିଲ କେଭି ମୁଥୁକୁମାର କହିଛନ୍ତି ଯେ, ରାଜ୍ୟ ସରକାରଙ୍କ ଏହି ନିଷ୍ପତ୍ତି ତାଙ୍କ ମୌଳିକ ଅଧିକାରର ଉଲ୍ଲଙ୍ଘନ କରିଛି, କାରଣ ସେ ପୂର୍ବରୁ ତାମିଲନାଡ଼ୁର ମାତୃତ୍ୱ ସୁବିଧା ନିୟମାବଳୀର କୌଣସି ଲାଭ ଉଠାଇନଥିଲେ ।
