ନୂଆଦିଲ୍ଲୀ ୨୪/୦୬: ବିବାହବନ୍ଧନରେ ଶିଳ୍ପପତି ବିଜୟ ମାଲ୍ୟାଙ୍କ ପୁଅ ସିଦ୍ଧାର୍ଥ ମାଲ୍ୟା । ଲଣ୍ଡନରେ ଏକ ସମାରୋହରେ ସେ ନିଜର ଗାର୍ଲଫ୍ରେଣ୍ଡ ଜସ୍ମିନ୍‌ଙ୍କୁ ଶନିବାର ଜୀବନସାଥୀ ରୂପେ ଗ୍ରହଣ କରିଛନ୍ତି । ଉତ୍ସବରେ ଉଭୟଙ୍କର ଘନିଷ୍ଠ ବନ୍ଧୁ ଓ ସଂପର୍କୀୟମାନେ ଯୋଗ ଦେଇଥିଲେ । ବିବାହର କିଛି ଫଟୋକୁ କନ୍ୟା ଜସ୍ମିନ୍‌ ନିଜର ଇନ୍‌ଷ୍ଟାଗ୍ରାମ ଆକାଉଣ୍ଟରେ ଅପଲୋଡ୍‌ କରିଛନ୍ତି । ସେଥିମଧ୍ୟରୁ ଗୋଟିଏ ଫଟୋରେ ତାଙ୍କୁ ଏକ ଧଳା ରଙ୍ଗର ଗାଉନ୍‌ରେ ଦେଖିବାକୁ ମିଳୁଛି । ସେ ବର ସିଦ୍ଧାର୍ଥଙ୍କ ନିକଟରେ ଛିଡ଼ା ହୋଇ ହସୁଛନ୍ତି । 

ଅନ୍ୟ ଏକ ଫଟୋରେ ଦମ୍ପତି ପରସ୍ପରର ହାତ ଧରିଥିବାବେଳେ ଜସ୍ମିନ୍‌ଙ୍କ ହାତର ହୀରା ମୁଦି ମଧ୍ୟ ନଜର ଆସୁଛି । କ୍ୟାପସନ୍‌ରେ ସେ ସାରା ଜୀବନର ବନ୍ଧନ ବୋଲି ଲେଖିଛନ୍ତି । ପୂର୍ବରୁ ସିଦ୍ଧାର୍ଥ ଚଳିତ ସପ୍ତାହରେ ନିଜର ଇନ୍‌ଷ୍ଟାଗ୍ରାମ ଆକାଉଣ୍ଟରେ ବିବାହ ସଂପର୍କରେ ସୂଚନା ଦେଇଥିଲେ । ସେତେବେଳେ ସେ ପୋଷ୍ଟ କରିଥିବା ଫଟୋରେ ତାଙ୍କ ସହିତ ଜସ୍ମିନ୍‌ଙ୍କୁ ବି ଦେଖିବାକୁ ମିଳିଥିଲା । କିଛି ଦିନ ଧରି ପରସ୍ପରକୁ ଡେଟ୍‌ କରିବା ପରେ ଗତବର୍ଷ ଏହି ଦମ୍ପତି ସେମାନଙ୍କର ନିର୍ବନ୍ଧ ସଂପର୍କରେ ଘୋଷଣା କରିଥିଲେ । ତେବେ କନ୍ୟା ଜସ୍ମିନ୍‌ଙ୍କ ସଂପର୍କରେ ଅଧିକ କିଛି ସୂଚନା ମିଳିନାହିଁ । ସେ ଆମେରିକାରେ ରହୁଥିବା ତାଙ୍କର ଇନ୍‌ଷ୍ଟାଗ୍ରାମ ପ୍ରୋଫାଇଲ୍‌ରୁ ଜଣାପଡ଼ିଛି ।