ଲକ୍ଷ୍ନୌ: ଉତ୍ତର ପ୍ରଦେଶର ମିରଟରେ ବହୁଚର୍ଚ୍ଚିତ ସୌରଭ ହତ୍ୟା ମାମଲା । ଏବେ ପୋଷ୍ଟମର୍ଟମ ରିପୋର୍ଟ ସାମ୍ନାକୁ ଆସିଛି । ଏହି ରିପୋର୍ଟରେ ଅନେକ ଆଶ୍ଚର୍ଯ୍ୟଜନକ ଖୁଲାସା ହୋଇଛି । ହତ୍ୟାକାରୀ ପତ୍ନୀ ମୁସ୍କାନ ସୌରଭଙ୍କ ଛାତିରେ ତିନିଥର ଛୁରୀ ଭୁସି ହତ୍ୟା କରିଥିଲା । ମୁସ୍କାନ ନିଷ୍ଠୁରତାର ସମସ୍ତ ସୀମା ଅତିକ୍ରମ କରି ସୌରଭଙ୍କ ଛାତିରେ ଛୁରୀ ଭୁସି ଦେଇଥିଲା । ଏହା ପରେ ତାଙ୍କ ଶରୀରରୁ ମୁଣ୍ଡ ଅଲଗା କରି ଦେଇଥିଲା । 

ପୋଷ୍ଟମର୍ଟମ ରିପୋର୍ଟ ଅନୁସାରେ, ମୁସ୍କାନ ସୌରଭଙ୍କ ଛାତିକୁ ଚିରିବା ପରେ ତାଙ୍କ ମୁଣ୍ଡ କାଟି ଦେଇଥିଲା । ମୃତଦେହକୁ ଡ୍ରମରେ ରଖିବା ଲାଗି ସୌରଭଙ୍କ ଶରୀରକୁ ଅନେକ ଖଣ୍ଡ କରି କାଟି  ଦିଆଯାଇଥିଲା । ପୋଷ୍ଟମର୍ଟମ କରିଥିବା ଡାକ୍ତରମାନେ ମଧ୍ୟ ଏହି ଘଟଣା ଦେଖି ଆଶ୍ଚର୍ଯ୍ୟ ହୋଇଛନ୍ତି । ଏହି ଘଟଣାର ତଦନ୍ତ ପାଇଁ ଏକ ପୋଲିସ ଟିମ୍‌ ହିମାଚଳ ପ୍ରଦେଶ ମଧ୍ୟ ଯାଇଛି ।

ପୋଲିସ ଛୁରୀ, ଔଷଧ ଏବଂ ଡ୍ରମ୍ ବିକ୍ରି କରୁଥିବା ଦୋକାନୀମାନଙ୍କୁ ମଧ୍ୟ ପଚରାଉଚରା କରିଛି । ଦ୍ୱାଦଶ ପାସ୍ ସୌରଭଙ୍କ ଲଣ୍ଡନ ଯିବା ଘଟଣାର ମଧ୍ୟ ତଦନ୍ତ କରାଯାଉଛି। ପୋଲିସ ସିସି କ୍ୟାମେରାର ଫୁଟେଜ୍ ଯାଞ୍ଚ କରିଛି । ଏସପି କହିଛନ୍ତି ଯେ, ପ୍ରମାଣ ସଂଗ୍ରହ କରି ଅଭିଯୁକ୍ତଙ୍କୁ କଠୋର ଦଣ୍ଡ ଦେବା ପୋଲିସର ଲକ୍ଷ୍ୟ ।

ପୂର୍ବତନ ମର୍ଚ୍ଚାଣ୍ଟ ନେଭି ଅଧିକାରୀ ସୌରଭ ରାଜପୁତଙ୍କୁ ତାଙ୍କ ପତ୍ନୀ ମୁସ୍କାନ ରସ୍ତୋଗୀ ପ୍ରେମିକ ସାହିଲ ଶୁକ୍ଳା ସହାୟତାରେ ମାର୍ଚ୍ଚ ୬ ରେ ନିର୍ମମ ହତ୍ୟା କରିଥିବା ଅଭିଯୋଗ ହୋଇଛି। ମୁସ୍କାନ ସୌରଭଙ୍କୁ ହତ୍ୟା କରିବାକୁ ବହୁ ପୂର୍ବରୁ ଯୋଜନା କରିଥିଲା ।  ହତ୍ୟା ମାମଲାରେ ମଙ୍ଗଳବାର ମୁସ୍କାନ ଏବଂ ତା ପ୍ରେମିକ ସାହିଲକୁ ପୋଲିସ ଗିରଫ କରିଥିଲା । ବୁଧବାର ସେମାନଙ୍କୁ ୧୪ ଦିନିଆ ନ୍ୟାୟିକ ହେପାଜତକୁ ପଠାଯାଇଛି । 

Meerut Case: ମିରଟରେ ଚାଞ୍ଚଲ୍ୟ; ସ୍ୱାମୀକୁ ହତ୍ୟାକରି ସିମେଣ୍ଟରେ ପୋତିଦେଲା ସ୍ତ୍ରୀ

ସୌରଭଙ୍କ ମୃତଦେହ ଖଣ୍ଡ ଖଣ୍ଡ ହୋଇ ସିମେଣ୍ଟ ଭର୍ତ୍ତି ଏକ ଡ୍ରମରୁ ମିଳିଥିଲା । ସୌରଭଙ୍କ ମାଆ ରେଣୁ ଦେବୀ ଦାବି କରିଛନ୍ତି ଯେ, ୬ ବର୍ଷର ଝିଅ ତାଙ୍କ ବାପାଙ୍କ ହତ୍ୟା ବିଷୟରେ ଜାଣିଥିଲା ଏବଂ "ପାପା ଡ୍ରମରେ ଅଛନ୍ତି" ବୋଲି କହିଥିଲା । ଏସପି ଆୟୁଷ ବିକ୍ରମ ସିଂହ ଏହି ଦାବିକୁ ଖଣ୍ଡନ କରି କହିଛନ୍ତି, ‘ଝିଅଟି ନିଶ୍ଚିତ ଭାବରେ ମୁସ୍କାନକୁ ପରିବାର ସଦସ୍ୟଙ୍କୁ ଘଟଣା ବିଷୟରେ କହୁଥିବା ଶୁଣିଥିବ । ସେ ପୂର୍ବରୁ ହତ୍ୟା ବିଷୟରେ ଜାଣି ନଥିଲା।’ ସେପଟେ ମୁସ୍କାନକୁ ଫାଶୀ ମିଳୁ ବୋଲି ଦାବି କରୁଥିବା ମହିଳା ତା’ର ନିଜ ମା’ ନୁହେଁ ବରଂ ସାବତ ମା’ ବୋଲି ଜଣାପଡ଼ିଛି ।