ପୁରୀ,୦୫/୦୪: ଅନ୍ତର୍ଜାତୀୟ ବାଲୁକା ଶିଳ୍ପୀ ମାନସ କୁମାର ସାହୁ ଓଡିଶାର ପୁରୀ ଠାରେ ଭେଟେରିଆନ ଆର୍ଟିଷ୍ଟ ମନୋଜ କୁମାରଙ୍କୁ ହୃଦୟର ସହ ଶ୍ରଦ୍ଧାଞ୍ଜଳି ଜ୍ଞାପନ କରି ଏକ ବାଲୁକା ଆନିମେସନ ପ୍ରସ୍ତୁତ କରିଛନ୍ତି । ଏହି ବାଲୁକା ଆନିମେସନରେ ସେ ମନୋଜ କୁମାରଙ୍କ ପ୍ରତିମୂର୍ତ୍ତି ନିର୍ମାଣ କରିଛନ୍ତି । ଏହାକୁ ନିର୍ମାଣ କରିବାକୁ ମାନସ ସାହୁଙ୍କୁ ୨ ଘଣ୍ଟା ସମୟ ଲାଗିଥିଲା । ମନୋଜ କୁମାର ଯେ କି, ଏକା ଧାରାରେ ଜଣେ ଅଭିନେତା, ନିର୍ଦ୍ଦେଶକ, ସ୍କ୍ରିନ୍ ରାଇଟର୍, ଲିରିକିଷ୍ଟ ଏବଂ ଏଡିଟର୍ ଥିଲେ । ତାଙ୍କର ଦେଶଭକ୍ତି ଫିଲ୍ମ ଗୁଡିକ ବହୁତ ଉଚ୍ଚକୋଟୀର ଥିଲା । ଦର୍ଶକଙ୍କ ପାଖରେ ସେ ଭାରତ କୁମାର ନାମରେ ପ୍ରସିଦ୍ଧ ଥିଲେ । ତାଙ୍କୁ ହୃଦୟର ସହ ଶ୍ରଦ୍ଧାଞ୍ଜଳି ଜ୍ଞାପନ କରି RIP ମନୋଜ କୁମାର ବାର୍ତ୍ତା ଦେଇଛନ୍ତି ମାନସ ସାହୁ ।
ଉଲ୍ଲେଖ ଯୋଗ୍ୟ ଯେ, ବାର୍ଦ୍ଧକ୍ୟଜନିତ ସ୍ୱାସ୍ଥ୍ୟ ସମସ୍ୟା ସହ ଲିଭର୍ ସିରୋସିସ ରୋଗରେ ପୀଡ଼ିତ ଥିଲେ ମନୋଜ କୁମାର । ସପ୍ତାହ ହେବ ହସ୍ପିଟାଲରେ ଚିକିତ୍ସାଧୀନ ଥିଲେ । ଶୁକ୍ରବାର ମନୋଜ କୁମାରଙ୍କର ଦେହାନ୍ତ ହୋଇଥିଲା । ୮୭ ବର୍ଷ ବୟସରେ ଶେଷ ନିଶ୍ୱାସ ତ୍ୟାଗ କରିଥିଲେ ମନୋଜ କୁମାର । ଶନିବାର ପଞ୍ଚଭୂତରେ ବିଲୀନ ହୋଇଛି ବଲିଉଡ଼ କିମ୍ବଦନ୍ତୀ ଅଭିନେତା ତଥା ନିର୍ଦ୍ଦେଶକ ମନୋଜ କୁମାରଙ୍କ ପାର୍ଥିବ ଶରୀର । ରାଷ୍ଟ୍ରୀୟ ମର୍ଯ୍ୟାଦା ସହିତ ମୁମ୍ବାଇ ସ୍ଥିତ ଭିଲେ ପାର୍ଲେରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି । ପୁଅ କୁନାଲ ଗୋସ୍ୱାମୀ ମୁଖାଗ୍ନୀ ଦେଇଛନ୍ତି । ଲୁହ ଭିଜା ଆଖିରେ ଭାରତ କୁମାରଙ୍କୁ ବିଦାୟ ଦେଇଛି ବଲିଉଡ ।