ଦାରିଙ୍ଗବାଡି,୨୭/୧(ଆପ୍ର): ସିମନବାଡ଼ି ଶିବ ମନ୍ଦିର ପ୍ରାଙ୍ଗଣରେ ଭଗବାନ ବିର୍ସାମୁଣ୍ଡାଙ୍କ ଶ୍ରାଦ୍ଧଶାନ୍ତି ଦିବସ ସହ ଭାରତମାତା ପୂଜନ ୩ ଦିନିଆ କାର୍ଯ୍ୟକ୍ରମ ସୋମବାର ଉଦଯାପିତ ହୋଇ ଯାଇଛି । ମୁଖ୍ୟ ଅତିଥି ଭାବେ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ ଯୋଗ ଦେଇଥିଲେ । ସେହିପରି ଅନ୍ୟ ଅତିଥି ଭାବେ ଜିଲ୍ଲା ପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଶମ୍ଭୁନାଥ ନନ୍ଦୀ, କୃଷି ବିଭାଗର ଅବସରପ୍ରାପ୍ତ ଯୁଗ୍ମ ନିର୍ଦ୍ଦେଶକ ଅମରେଶ୍ୱର ମିଶ୍ର, ନାଟ୍ୟଶ୍ରୀ ଗଦାଧର ବାରିକ, ଅନନ୍ୟାର ଅଧ୍ୟକ୍ଷ ଦୁର୍ଗାମାଧବ ଆଚାର୍ଯ୍ୟ, ଓୟୁଏଟିର ଅବସରପ୍ରାପ୍ତ ପ୍ରଫେସର ପ୍ରଭୁଚରଣ ଲେଙ୍କା ପ୍ରମୁଖ ଯୋଗ ଦେଇଥିଲେ ।
ଏହି ଅବସରରେ ନିଆରା ଢଙ୍ଗରେ ସାଧାରଣତନ୍ତ୍ର ଦିବସ ପାଳନ ହୋଇଥିଲା । ସାଂସଦ ସୁକାନ୍ତ ପାଣିଗ୍ରାହୀ ପତାକା ଉତ୍ତୋଳନ କରିବା ପରେ ଉଦବୋଧନ ଦେଇଥିଲେ । ଏହାପରେ ନଦୀଆ କୀର୍ତ୍ତନ କରି ଜଗନ୍ନାଥ, ବଳଭଦ୍ର ଓ ସୁଭଦ୍ରାକୁ ନେଇ ନଗର ପରିକ୍ରମା କରାଯାଇ ବିଭିନ୍ନ ପୂଜା ପାଠ କରାଯାଇଥିଲା । ସନ୍ଧ୍ୟା କାର୍ଯ୍ୟକ୍ରମରେ ଗ୍ରାମ ବୈଦ୍ୟ, ଜାତି ମୁଖିଆ, ସଙ୍କୀର୍ତ୍ତନ କଳାକାର ଓ ଚିତ୍ର କଳାକାର ମାନଙ୍କୁ ଅତିଥି ମାନଙ୍କ ଦ୍ଵାରା ସମ୍ମାନିତ କରାଯାଇଥିଲା । ଏଥି ସହିତ ସାଂସ୍କୃତିକ କାର୍ଯ୍ୟକ୍ରମରେ ଗୋଟିପୁଅ ନୃତ୍ୟ, ସମ୍ବଲପୁରୀ ନୃତ୍ୟ, ଓଡ଼ିଶୀ ନୃତ୍ୟ ସହ ଦେଶାତ୍ମବୋଧକ ନୃତ୍ୟ ସହ ସଂଗୀତ ପରିବେଷଣ ହୋଇଥିଲା । ଉଦଯାପନୀ ଦିବସରେ ବ୍ଲକ ସଭାଗୃହ ଠାରେ କନ୍ଧମାଳର ମସଲା ଜାତୀୟ ଦ୍ରବ୍ୟ ସହ କଫି ଚାଷ କିଭଳି ଅଧିକ ରୁ ଅଧିକ ଉତ୍ପାଦନ ହେବ ଓ ତାହାକୁ ବାହାରକୁ ରପ୍ତାନି କରାଯିବ ସେନେଇ ମସଲା ବୋର୍ଡର ଅଧିକାରୀଙ୍କ ସମେତ ଅନ୍ୟ ମାନଙ୍କ ସହ ଏକ ଆଲୋଚନା ଚକ୍ର ହୋଇଥିଲା ।
ଅନନ୍ୟାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତି, ସଂଯୋଜକ ଅଧିକାରୀ ଅଭିଜିତ ଭଟାଚାର୍ଯ୍ୟ,ନିରଞ୍ଜନ ପଣ୍ଡା ଙ୍କ ସମେତ କମିଟି କର୍ମକର୍ତ୍ତା ଓ ଗ୍ରାମବାସୀବୃନ୍ଦ ସହଯୋଗ କରିଥିଲେ । ସ୍ୱେଚ୍ଛାସେବୀ ଅନୁଷ୍ଠାନ ଅନନ୍ୟା ଓ ସଂସ୍କାର ଭାରତୀ ଅନୁଷ୍ଠାନ ମିଳିତ ଉଦ୍ୟମ ସହ ଭାରତ ସରକାରଙ୍କ ସଂସ୍କୃତି ମନ୍ତ୍ରାଳୟର ଆର୍ଥିକ ଅନୁଦାନ କ୍ରମେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।
