ଦାରିଙ୍ଗବାଡି,୨୫/୧(ଆପ୍ର): ସିମନବାଡ଼ି ଶିବମନ୍ଦିର ପ୍ରାଙ୍ଗଣରେ ଭଗବାନ ବିର୍ସା ମୁଣ୍ଡାଙ୍କ ଶ୍ରାଦ୍ଧ ଶାନ୍ତି ଦିବସ ସହ ଭାରତମାତା ପୂଜନ କାର୍ଯ୍ୟକ୍ରମ ଉଦଘାଟିତ ହୋଇଛି। ମୁଖ୍ୟ ଅତିଥି ଭାବେ କନ୍ଧମାଳ ସାଂସଦ ସୁକାନ୍ତ ପାଣିଗ୍ରାହୀ ଓ ଅତିଥି ଭାବେ ରାଜ୍ୟସଭା ସାଂସଦ ସୁଜିତ କୁମାର ଯୋଗ ଦେଇ ଏହାକୁ ଉଦଘାଟନ କରିଥିଲେ । ଉଦଘାଟନୀ କାର୍ଯ୍ୟକ୍ରମରେ କୃଷି ଭିତ୍ତିକ ଆଲୋଚନା ଚକ୍ରରେ କୃଷି ବିଭାଗର ଅବସରପ୍ରାପ୍ତ ପ୍ରଫେସର ପ୍ରଭୁ ଚରଣ ଲେଙ୍କା, କୃଷି ବିଭାଗର ଅବସରପ୍ରାପ୍ତ ସହ ନିର୍ଦ୍ଦେଶକ ଅମରେଶ ମିଶ୍ର, ଏସିଏଫ ମନୋରଞ୍ଜନ ବାଗ ଭାଗ ନେଇ କୃଷି ସମ୍ପର୍କିତ ବିଷୟବସ୍ତୁ ଉପରେ ଆଲୋଚନା କରିଥିଲେ ।
ସେହିପରି ଆଦିବାସୀଙ୍କ ଜୀବନ ଶୈଳୀ ଉପରେ ଅନନ୍ୟା ସଂଗଠନର ଅଧ୍ୟକ୍ଷ ଦୁର୍ଗା ମାଧବ ଆଚାର୍ଯ୍ୟ, ଶିକ୍ଷାବିତ ଡକ୍ଟର ଚିତ୍ତରଞ୍ଜନ ମିଶ୍ର, ଅଧ୍ୟାପକ ଡମ୍ବୁରୁ ଧର ସାହୁ,ବିଭୂତି ଭୂଷଣ ଶତପଥୀ ,ସୁଦର୍ଶନ ପ୍ରଧାନ, ସୁନାଫୁଲ ପ୍ରଧାନ ପ୍ରମୁଖ ଯୋଗ ଦେଇ ବିଭିନ୍ନ ବିଷୟ ବସ୍ତୁ ଉପରେ ଆଲୋଚନା କରିଥିଲେ । ଏଥିସହିତ ସାଂସ୍କୃତିକ କାର୍ଯ୍ୟକ୍ରମରେ ଭଜନ ସହ ବିଭିନ୍ନ ନୃତ୍ୟ ପରିବେଷଣ ହୋଇଥିଲା । କାର୍ଯ୍ୟକ୍ରମରେ କିଛି ଗ୍ରାମ ବୈଦ୍ୟ, ଜାତି ମୁଖିଆ, ସଙ୍କୀର୍ତ୍ତନ କଳାକାର ଓ ଚିତ୍ର କଳାକାରମାନଙ୍କୁ ସମ୍ମାନିତ କରାଯାଇଥିଲା ।
ଅନନ୍ୟାର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅବିନାଶ ମହାନ୍ତି, ସଂଯୋଜକ ଅଧିକାରୀ ଅଭିଜିତ ଭଟ୍ଟାଚାର୍ଯ୍ୟ,ନିରଞ୍ଜନ ପଣ୍ଡା, ପୂର୍ଣ୍ଣଚନ୍ଦ୍ର ବିନ୍ଧାଣିଙ୍କ ସମେତ ଅନ୍ୟମାନେ ଉପସ୍ଥିତି ଥିଲେ । କାର୍ଯ୍ୟକ୍ରମ ଶୁଭାରମ୍ଭ ପୂର୍ବରୁ ଗାଁ ରେ କଳସୀ ଯାତ୍ରାର ଅନୁଷ୍ଠିତ ହୋଇଥିଲା । ସ୍ୱେଚ୍ଛାସେବୀ ଅନୁଷ୍ଠାନ ଅନନ୍ୟା ଓ ସଂସ୍କାର ଭାରତୀ ଅନୁଷ୍ଠାନ ମିଳିତ ଉଦ୍ୟମ ସହ ଭାରତ ସରକାରଙ୍କ ସଂସ୍କୃତି ମନ୍ତ୍ରାଳୟର ଆର୍ଥିକ ଅନୁଦାନ କ୍ରମେ ଏହା ଆୟୋଜିତ ହୋଇଥିଲା।
