ଦାରିଙ୍ଗବାଡି,୨୭/୧: ଖୁଣ୍ଟି ପୋତିବାକୁ ଗାତ ଖୋଳି ଦେଲେ । ହେଲେ ଖୁଣ୍ଟି ପୋତା ହେଲା ନା ଗାତ ବନ୍ଦ ହେଲା । ରାସ୍ତା କଡରେ ଆଁ କରି ଚାହିଁଛି ବିରାଟ ଗର୍ତ୍ତ । ବିପଦକୁ ନିମନ୍ତ୍ରଣ ଦେଉଛି ରାସ୍ତା କଡରେ ଖୋଳା ହୋଇଥିବା ଗାତ । କେଉଁ ମୂହୁର୍ତ୍ତରେ କିଛି ବି ଅଘଟଣ ଘଟିପାରେ ହେଲେ ଏ ଦିଗରେ କାହାର ନିଘା ନାହିଁ । କନ୍ଧମାଳ ଦାରିଙ୍ଗବାଡି- ବ୍ରାହ୍ମଣୀ ଗାଁ ପୂର୍ତ୍ତ ବିଭାଗ ରାସ୍ତା କଡ଼ରେ ଏଭଳି କିଛି ଦେଖିବାକୁ ମିଳିଛି । ଯାହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ।
ଦାରିଙ୍ଗବାଡି ଠାରୁ ବ୍ରାହ୍ମଣୀ ଗାଁକୁ ଯାଇଥିବା ପୂର୍ତ୍ତ ବିଭାଗ ରାସ୍ତା କଡ଼ରେ ବିଏସଏନଏଲ୍ ବିଭାଗ ବଡ଼ ବଡ଼ ଗାତ ଖୋଳି ଦେଇଛି । ଏହା ସହ ବିଏସଏନଏଲ୍ ଲେଖା ଥିବା ସିମେଣ୍ଟ ଖୁଣ୍ଟ ବି ରାସ୍ତା କଡ଼ରେ ପଡି ରହିଛି । ଗାତର ମାଟି ରାସ୍ତା ଉପରେ ଗଦା ହୋଇଛି । ରାସ୍ତାକୁ ଲାଗି ବଡ ଗାତ ଖୋଳା ହୋଇଛି । ଫଳରେ କିଛି ଦିନ ମଧ୍ୟରେ ୨ଟି ଦୁର୍ଘଟଣା ଘଟି ଲୋକେ ସାମାନ୍ୟ ଆହତ ହୋଇଥିବା ଦେଖିବାକୁ ମିଳିଛି । ଗାତ ପାଇଁ ବଡ ଅଘଟଣ ଘଟିପାରେ । କେତେବେଳେ ଯେ କଣ ଘଟିବ କିଛି କହି ହେବ ନାହିଁ । ହେଲେ ପୂର୍ତ୍ତ ବିଭାଗ ସବୁ ଦେଖି ଚୁପ୍ ଚାପ୍ ହୋଇ ରହିଛି । ଏଥି ପ୍ରତି ଦୃଷ୍ଟି ଦେଉ ନାହିଁ । ଫଳରେ ସଧାରଣ ଲୋକେ ହୁଅନ୍ତୁ ଅବା ପର୍ଯ୍ୟଟକ ଯାତାୟତ ବେଳେ ହଇରାଣ ହେଉଥିବା ଦେଖିବାକୁ ମିଳୁଛି ।
ଉକ୍ତ ରାସ୍ତା ଦେଇ ପ୍ରତିଦିନ ସହ ସହ ଗାଡ଼ି ଯାତାୟତ କରୁଛି । ଏଣୁ ବଡ଼ ଦୁର୍ଘଟଣା ଘଟିବା ପୂର୍ବରୁ ରାସ୍ତା କଡ଼ରେ ହୋଇଥିବା ଗାତ ଗୁଡ଼ିକୁ ପୋତି ଦେବାକୁ ସାଧାରଣରେ ଦାବି ହୋଇଛି । ଏପରିକି ସିମେଣ୍ଟ ଖୁଣ୍ଟ ଗୁଡ଼ିକୁ ରାସ୍ତା କଡ଼ରେ ନପୋତି ରାସ୍ତାକୁ ୨୦ ଫୁଟ ଛାଡି ପୋତିବାକୁ ଦାବି ହୋଇଛି ।
