ଆଠଗଡ଼, ୨୫/୧୦: ଆକ୍ସନ ମୋଡରେ ଆଠଗଡ଼ ଅବକାରୀ ବିଭାଗ । କଟକ ମୋବାଇଲ ସ୍କ୍ୱାର୍ଡ ଓ ଆଠଗଡ଼ ଅବକାରୀ ବିଭାଗ ପକ୍ଷରୁ ନରସିଂହପୁର ଏକଡାଳ ପେଟ୍ରୋଲ ଟାଙ୍କି ନିକଟରେ ଏକ ଆଇଚର୍ ଗାଡ଼ି ଉପରେ ଚଢାଉ । ଏହି ରେଡ୍‌ରେ ୨୦୪ ପେଟି ମଦ ଜବତ କରାଯାଇଛି । ଏହା ସହ ଡ୍ରିମର୍ ନାମକ ଲେବୁଲିଂ ଷ୍ଟିକର ମଧ୍ୟ ଜବତ କରାଯାଇଛି । ଏହି ଘଟଣାରେ ଗାଡ଼ିର ଡ୍ରାଇଭର ଗିରଫ ହୋଇଛି । ରାଜ୍ୟ ବାହାରୁ ଏହି ମଦ ଓଡ଼ିଶାକୁ ଆସୁଥିବା ବେଳେ କଟକ ଜିଲ୍ଲା ଆଠଗଡ଼ ବ୍ଲକ୍‌ରେ ଏଭଳି ଘଟଣା ଘଟିଛି । 

ସୂଚନାନୁଯାୟୀ, ଅଭିନବ ଉପାୟରେ ରାଜ୍ୟ ବାହାରୁ ଓଡ଼ିଶାକୁ ଆସୁଥିଲା ବିଦେଶୀ ମଦ । ଗାଡ଼ିର ସାମ୍ନା ଏବଂ ପଛପଟେ ଇଟା ରଖି ମଝିରେ ଚାଲାଣ ହେଉଥୁଲା ମଦପେଟି । ଆଠଗଡ଼ ଅଞ୍ଚଳରେ ମଦ ଚାଲାଣ ହେଉଥିବା ନେଇ ପୂର୍ବରୁ ଏକ ବିଶେଷ ସୂତ୍ରରୁ ଖବର ପାଇଥିଲା ଅବକାରୀ ବିଭାଗ । ଖବର ପାଇ ଅବକାରୀ ବିଭାଗ ଏବଂ ମୋବାଇଲ ସ୍କ୍ୱାର୍ଡ ମିଳିତ ଭାବରେ ନରସିଂହପୁର ଏକଡାଳ ପେଟ୍ରୋଲ ଟାଙ୍କି ନିକଟରେ ଏକ ଆଇଚର୍ ଗାଡ଼ି ଉପରେ ଚଢାଉ କରିଥିଲେ । ତେବେ ଏହି ରେଡ୍‌ରେ ୨୦୪ ଟି ମଦ ପୋଟି ଜବତ କରାଯାଇଥିଲା । ପ୍ରତ୍ୟେକ ପେଟିରେ ୧୪ଟି ମଦ ବୋତଲ ରହିଥିଲା । ଅର୍ଥାତ ଉକ୍ତ ଗାଡ଼ିରୁ ସମୁଦାୟ ୨,୮୫୬ଟି ମଦ ବୋତଲ ଜବତ ହୋଇଥିଲା । ପ୍ରତ୍ୟେକ ବୋତଲରେ ୭୫୦ ମିଲିଲିଟର ମଦ ରହିଛି । ଏହି ମଦ ରାଜ୍ୟ ବାହାରୁ ଓଡ଼ିଶାକୁ ଆସୁଥିଲା ବୋଲି ଜଣାପଡ଼ିଛି । ଏହି ଘଟଣାରେ ଡ୍ରିମର୍ ନାମକ ଲେବୁଲିଂ ଷ୍ଟିକର ଜବତ କରି ଡ୍ରାଇଭରକୁ ଅଟକ ରଖିଛି ପୋଲିସ । ଏନେଇ ସୂଚନା ଦେଲେ ଅବକାରୀ ସୁପରିଟେଡେଣ୍ଟ କରୁଣା ଶଙ୍କର ତିୱାରୀ।