ନିଶ୍ଚିନ୍ତକୋଇଲି, ୨୧/୧୦: ଚିତ୍ରୋପ୍ତଳା ନଦୀରୁ ଉଦ୍ଧାର ହେଲା ଦୁଇ ଯୁବକଙ୍କ ମୃତଦେହ । ମୃତକ ମହମ୍ମଦପୁର ଗ୍ରାମର ବାବୁଲି ବେହେରାଙ୍କ ପୁତ୍ର ଚନ୍ଦନ ବେହେରା (୨୧) ଏବଂ ଚିତ୍ତରଞ୍ଜନ ପାତ୍ରଙ୍କ ପୁତ୍ର ବିଜୟ କୁମାର ପାତ୍ର (୨୧) ବୋଲି ଜଣାପଡ଼ିଛି । କଟକ ଜିଲ୍ଲା ନିଶ୍ଚିନ୍ତକୋଇଲି ବ୍ଲକ ମହମ୍ମଦପୁର ଗ୍ରାମରେ ଏଭଳି ଘଟଣା ଘଟିଛି । 

ସୂଚନା ମୁତାବକ, ଚନ୍ଦନ ବେହେରା ଏବଂ ବିଜୟ କୁମାର ପାତ୍ର ରବିବାର ଅପରାହ୍ଣରେ ସ୍ଥାନୀୟ ଚାଟରା ଘାଟରେ ଗାଧୋଇବାକୁ ଯାଇଥିଲେ । ସେଠାରେ ଗାଧୋଇବାବେଳେ ଉଭୟ ବୁଡ଼ି ଯାଇଥିଲେ । ଉଭୟଙ୍କ ଚିତ୍କାର ଶୁଣି ସ୍ଥାନୀୟଲୋକେ ତାଙ୍କୁ ସେଠାରୁ ଉଦ୍ଧାର କରିବାକୁ ଉଦ୍ୟମ କରିଥିଲେ । ଏହା ସହ ଅଗ୍ନିଶମ ବାହିନୀ ଏବଂ ପୋଲସକୁ ମଧ୍ୟ ଖବର ଦେଇଥିଲେ । ଖବର ପାଇ କୋରୁଆ ଅଗ୍ନିଶମ ବାହିନୀ, କିଶନ ନଗର ଥାନା ପୋଲିସ, ଓଡ୍ରାଫ ଟିମ୍‌ ସ୍ଥାନୀୟଲୋକଙ୍କ ସହ ନଦୀରେ ଖୋଜା ଖୋଜି କରିଥିଲେ ମଧ୍ୟ ଦୁଇ ଯୁବକଙ୍କ କୌଣସି ପତ୍ତା ମିଳିନଥିଲା । ତେବେ ସୋମବାର ସକାଳେ ଦୁଇ ଯୁବକଙ୍କ ମୃତଦେହ ନଦୀରେ ଭାସୁଥିବାର ସ୍ଥାନୀୟଲୋକେ ଦେଖିବାକୁ ପାଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ କିଶନ ନଗର ଥାନା ପୋଲିସ ଘଟଣା ସ୍ଥଳରେ ପହଞ୍ଚି ଦୁଇ ଯୁବକଙ୍କ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ କଟକ ବଡ଼ ମେଡିକାଲକୁ ପଠାଇଛି । ଏ ସମ୍ପର୍କରେ କିଶନନଗର ଥାନାରେ ଦୁଇଟି ଅପମୃତ ମାମଲା ରୁଜୁ ହୋଇଛି । ଏହି ଘଟଣାଟି ସ୍ଥାନୀୟ ଅଞ୍ଚଳରେ ଗଭୀର ଶୋକର ଛାୟା ଖେଳାଇ ଦେଇଛି ।