ଉଦଳା,୧୦/୦୮: ଗତ ଶୁକ୍ରବାର ରାତିରେ ଜଣେ ଯୁବତୀଙ୍କୁ କପ୍ତିପଦା ବଜାରରୁ ୪ଜଣ ଯୁବକ ଅପହରଣ କରିଛନ୍ତି । ଘଟଣାକୁ ୨ ଦିନ ବିତି ଯାଇଥିଲେ ବି ଅନ୍ଧ ପରି ବାଡ଼ି ବୁଲାଉଛି ପୁଲିସ୍ । ଏଯାଏଁ ଅପହରଣକାରୀଙ୍କ ଟେର୍ ପାଉନାହିଁ ।
ସୂଚନା ମୁତାବକ, ଶୁକ୍ରବାର ରାତିରେ ଏହି ଘଟଣା ଘଟିଥିଲା । ସୁଡ଼ସୁଡ଼ିଆ ଗାଁର ଅଞ୍ଜଳି ବେହେରା କପ୍ତିପଦା ବଜାରକୁ କିଛି ସାମଗ୍ରୀ କିଣିବାକୁ ଆସିଥିଲେ । ଏହି ସମୟରେ ୪ଜଣ ମୁଖାପିନ୍ଧା ଯୁବକ ତାଙ୍କୁ ଉଠାଇ ନେଇଥିଲେ । ବାପାମାଆ ଏହାକୁ ବିରୋଧ କରିବାରୁ ତାଙ୍କୁ ହତ୍ୟା ଧମକ ଦେଇଥିଲେ । ଏହି ଘଟଣା ପରେ ଯୁବତୀଙ୍କ ପରିବାର ଲୋକ ତୁରନ୍ତ କପ୍ତିପଦା ଥାନାରେ ଅଭିଯୋଗ କରିଥିଲେ । ହେଲେ ଦୁର୍ଭାଗ୍ୟର କଥା ଯେ, ଘଟଣାକୁ ୨ ଦିନ ବିତି ଯାଇଥିଲେ ସୁଦ୍ଧା ଏପର୍ଯ୍ୟନ୍ତ ପୁଲିସ ଅପହରଣକାରୀଙ୍କ ଟେର୍ ପାଉନି ।
