ଉଦଳା, ୦୨/୦୮: ସାପ କାମୁଡାରେ ଚାଲିଗଲା ଦୁଇ ମହିଳାଙ୍କ ଜୀବନ। ଜଣେ ଘରେ ଶୋଇଥିବା ବେଳେ ଏବଂ ଆଉ ଜଣେ ରୋଷେଇ ପାଇଁ କାଠ ବାହାର କରୁଥିବା ବେଳେ ସାପ କାମୁଡ଼ିବାରୁ ହୋଇଛି ମୃତ୍ୟୁ। ମୟୂରଭଞ୍ଜ ଜିଲ୍ଲା ଉଦଳା ଏବଂ କପ୍ତିପଦା ଥାନା ଅଞ୍ଚଳରେ ଏଭଳି ଘଟଣା ଘଟିଛି ।
ସୂଚନା ମୁତାବକ, କପ୍ତିପଦା ଥାନା ଗୋଳାଗଡିଆ ଗାଁର ଜୟନ୍ତୀ ବେହେରା ଶୁକ୍ରବାର ରାତିରେ ଖାଇ ସାରି ଘରେ ଶୋଇଥିଲେ । ବିଳମ୍ବିତ ରାତିରେ ଏକ ଚିତ୍ତି ସାପ ତାଙ୍କୁ କାମୁଡି ଦେଇଥିଲା। ପରିବାର ଲୋକେ ତାଙ୍କୁ ଚିକିତ୍ସା ପାଇଁ ଉଦଳା ଡାକ୍ତରଖାନାରେ ଭର୍ତ୍ତି କରିଥିବା ବେଳେ ଅବସ୍ଥା ଗୁରୁତର ଥିବାରୁ ତାଙ୍କୁ ବାରିପଦା ସ୍ଥାନାନ୍ତର କରାଯାଇଥିଲା। ହେଲେ ସେଠାରେ ଚିକିତ୍ସାଧୀନ ଅବସ୍ଥାରେ ମୃତ୍ୟୁ ହୋଇଥିଲା।
ସେହିପରି ଉଦଳା ଥାନା ମଉଦା ଗାଁର ସୁକାନ୍ତି ବାସ୍କେ ମନ୍ଦିର ପୂଜା ସାରି ଘରେ ପହଞ୍ଚି ରୋଷେଇ କରିବାକୁ ଯାଇଥିଲେ। ରୋଷେଇ ପାଇଁ କାଠ ଆଣିବାକୁ ଯାଇଥିବା ବେଳେ କାଠ ଭିତରେ ଲୁଚି ରହିଥିବା ବିଷାକ୍ତ ନାଗ ସାପ ତାଙ୍କୁ କାମୁଡି ଥିଲା। ମେଡିକାଲରେ ଚିକିତ୍ସା ନିମନ୍ତେ ଭର୍ତ୍ତି କରିଥିବା ବେଳେ ତାଙ୍କର ମୃତ୍ୟୁ ହୋଇଛି।
