ଭୁବନେଶ୍ଵର, ୦୩/୦୧ : ଖଲିସ୍ତାନୀ ଆତଙ୍କବାଦୀ ପନ୍ନୁର ପୁଣି ଧମକପୂର୍ଣ୍ଣ ମେଲ୍। ପ୍ରବାସୀ ଭାରତୀୟ ଦିବସରେ ବ୍ୟାଘାତ ପାଇଁ ପୁଣି ଧମକପୂର୍ଣ୍ଣ ଇମେଲ୍ ଆସିଛି। ବରିଷ୍ଠ ସାମ୍ବାଦିକ ଅକ୍ଷୟ ସାହୁଙ୍କୁ ଏହି ମେସେଜ୍ ଆସିଛି। ପ୍ରବାସୀ ଭାରତୀୟ ଦିବସରେ ବ୍ୟାଘାତ ସୃଷ୍ଟି କରିବା ପାଇଁ ଭିଡିଓ ମାଧ୍ୟମରେ ମେସେଜ୍ ଦିଆଯାଇଛି। ଏହି ମେସେଜ୍ରେ ଭୁବନେଶ୍ଵରକୁ ପୁଣି ଟେରର୍ ସିଟି ବୋଲି କୁହାଯାଇଛି। ଏହା ସହ ପ୍ରବାସୀଙ୍କୁ ଭୁବନେଶ୍ଵର ଆସିବାକୁ ମନା କରାଯାଇଛି। ଆତଙ୍କବାଦୀ ହତ୍ୟାର ବଦଲା ନେବାକୁ ଧମକ ଦେଇଛି। ବିମାନ ବନ୍ଦରରୁ ଜନତା ମଇଦାନ ଯାଏଁ ସତର୍କ ରହିବାକୁ କୁହାଯାଇଛି।
ପ୍ରକାଶ ଥାଉକି, ଏହା ପୂର୍ବରୁ ଭୁବନେଶ୍ଵରରେ ଚାଲିଥିବା ଡିଜିପି ସମ୍ମିଳନୀ ବେଳେ ଖଲିସ୍ତାନୀ ଆତଙ୍କୀ ପନ୍ନୁ ଟାର୍ଗେଟ୍ କରିଥିଲା। ସାମ୍ବାଦିକ ଅକ୍ଷୟ ସାହୁଙ୍କୁ ଧମକପୂର୍ଣ୍ଣ ଇମେଲ୍ ପଠାଇଥିଲା। ଏହି ଅଡିଓ ମେସେଜ୍ରେ ଭୁବମେଶ୍ବର ବିମାନ ବନ୍ଦରକୁ ଟାର୍ଗେଟ୍ କରାଯାଇଥିଲା ଏବଂ ଡିଜିପି ସମ୍ମିଳନୀକୁ ଭଣ୍ଡୁର କରିବାକୁ ଧମକ ଦେଇଥିଲା। ଏତଦ୍ ବ୍ୟତୀତ ଖଲିସ୍ତାନୀ ପତାକା ଉଡ଼ାଇଲେ ୨୫ ଲକ୍ଷର ପୁରସ୍କାର ଘୋଷଣା କରାଯିବ ବୋଲି ଅଡିଓ ଜାରି କରିଥିଲା। ଏହାପରେ କ୍ରାଇମ୍ବ୍ରାଞ୍ଚ ତରଫରୁ ତଦନ୍ତ କରାଯାଇଥିଲା। ଏହି ମେସେଜ୍ଟି ପନ୍ନୁ ପାଖରୁ ହିଁ ଆସିଥିବା ସ୍ପଷ୍ଟ ହୋଇଥିଲା।
ତେବେ ପୁଣି ଥରେ ଧମକପୂର୍ଣ୍ଣ ଇମେଲ୍ ଆସିବା ପରେ ଚାଞ୍ଚଲ୍ୟ ଖେଳିଯାଇଛି। ଓଡ଼ିଆ ଭାଷାରେ ଆତଙ୍କୀ ପନ୍ନୁ ଲଗାତର ଧମକପୂର୍ଣ୍ଣ ମେସେଜ୍ ପଠାଇବା ପରେ ସନ୍ଦେହ ବଢିଛି। ପନ୍ନୁ ପାଇଁ ଓଡ଼ିଶାରୁ କିଏ କାମ କରୁଛି ? କିମ୍ଵା ରାଜ୍ୟରେ ଖଲିସ୍ତାନୀ ଆତଙ୍କୀଙ୍କ ସ୍ଲିପର ସେଲ୍ ଚାଲିଛି କି ? ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛ।
