ଭୁବନେଶ୍ୱର,୦୫/୦୧: ବଦଳିଲା ସରକାରୀ ରେକର୍ଡ ତଥ୍ୟ । ୪୭୬ କିଲୋମିଟର ନୁହେଁ, ଓଡ଼ିଶା ଉପକୂଳ ଲମ୍ବିଛି ୫୭୪ କିମି । ସମୁଦ୍ର ଉପକୂଳକୁ ନେଇ ଗୃହ ମନ୍ତ୍ରଣାଳୟ ଏଭଳି ନୂଆ ତଥ୍ୟ ସାମ୍ନାକୁ ଆଣିଛି । ପୂର୍ବରୁ ଓଡ଼ିଶାର ସମୁଦ୍ର ଉପକୂଳ ଯେତିକି ଦର୍ଶାଯାଇଥିଲା, ତାହାଠାରୁ ୯୮ କିଲୋମିଟର ଅଧିକ ଉପକୂଳ ଲମ୍ବିଛି । ସାଟେଲାଇଟ ସହାୟତାରେ କରାଯାଇଥିବା ଅତ୍ୟାଧୁନିକ ସର୍ଭେରୁ ଏଭଳି ତଥ୍ୟ ଜଣାପଡ଼ିଛି ।
୫୩ ବର୍ଷ ପୂର୍ବରୁ ୧୯୭୦ ମସିହାରେ ଭାରତର ସାମୁଦ୍ରିକ ଉପକୂଳ ସର୍ଭେ କରାଯାଇଥିଲା । ସେ ସମୟରେ ନା ସାଟେଲାଇଟ ତଥ୍ୟ ଥିଲା, ନା ଅତ୍ୟାଧୁନିକ ଜ୍ଞାନ କୌଶଳ ଉପଲବ୍ଧ ଥିଲା । ସମୁଦ୍ର କୂଳେ କୂଳେ ଉପକୂଳକୁ ମାପଚୁପ କରି ହିସାବ କରାଯାଇଥିଲା । ସେଇ ପୁରୁଣା ସର୍ଭେ ଅନୁସାରେ ଓଡ଼ିଶାର ସମୁଦ୍ର ଉପକୂଳ ୪୭୬.୪୦ କିଲୋମିଟର ଥିବା କୁହାଯାଇଥିଲା । ସେବେଠାରୁ ଓଡ଼ିଶାର ସମୁଦ୍ର ଉପକୂଳ ୪୮୦ କିମି ଥିବା କୁହାଯାଉଛି । ମାତ୍ର ଏବେ ଗୃହ ମନ୍ତ୍ରଣାଳୟର ସାନି ସର୍ଭେ ପରେ ସରକାରୀ ସ୍ତରରେ ଏ ରେକର୍ଡ ବଦଳିଛି ।
୫୩ ବର୍ଷ ପରେ ଗୃହ ମନ୍ତ୍ରଣାଳୟ କରିଥିବା ସର୍ଭେର ସଂଶୋଧିତ ତଥ୍ୟ ଅନୁସାରେ ଭାରତର ସମୁଦ୍ର ଉପକୂଳ ୧୧ ହଜାର ୯୮ କିମି । ୧୯୭୦ ସର୍ଭେରେ ଦର୍ଶାଯାଇଥିଲା ୭୫୧୬ କିମି । ଓଡ଼ିଶା ସମେତ ପଶ୍ଚିମବଙ୍ଗ ଗୁଜରାଟ, ମହାରାଷ୍ଟ, ଗୋଆ, କର୍ଣ୍ଣାଟକ, ତାମିଲନାଡ଼ୁ, ଆନ୍ଧ୍ରପ୍ରଦେଶର ସମୁଦ୍ର ଉପକୂଳ ଲମ୍ବ ପୂର୍ବ ରେକର୍ଡଠାରୁ ଢେର ଅଧିକ ଥିବା ଜଣାପଡ଼ିଛି ।
ବ୍ରହ୍ମପୁର ବିଶ୍ୱବିଦ୍ୟାଳୟର ସାମୁଦ୍ରିକ ବିଜ୍ଞାନ ବିଭାଗ ମୁଖ୍ୟ ପ୍ରଫେସର ତମୋଘ୍ନ ଆଚାର୍ଯ୍ୟ କହିଛନ୍ତି, ନୂଆ ସର୍ଭେରେ ପ୍ରକୃତ ତଥ୍ୟ ସାମ୍ନାକୁ ଆସିଛି । ନୂଆ ସର୍ଭେ ଅତ୍ୟାଧୁନିକ ଜ୍ଞାନ, କୌଶଳ ଉପଯୋଗ କରି ଉପକୂଳର ତଥ୍ୟ ସଂଗ୍ରହ କରାଯାଇଛି । ସାଟେଲାଇଟ, ଜିଆଇଏସ ସହ ରିମୋଟ ସେନସିଂ ଫଟୋ ଚିତ୍ର ପୂରା ଟିକିନିଖି ତଥ୍ୟ ପ୍ରଦାନ କରିଛି । ତେଣୁ ୧୯୭୦ ମସିହା ତଥ୍ୟଠାରୁ ସଂଶୋଧିତ ତଥ୍ୟରେ ଏତେ ଫରକ ଦେଖିବାକୁ ମିଳିଛି । ଅନ୍ୟପକ୍ଷରେ ପୂର୍ବରୁ କେବଳ ସମୁଦ୍ର ସଂଲଗ୍ନ ସ୍ଥଳଭାଗକୁ ନେଇ ଉପକୂଳର ହିସାବ କରାଯାଉଥିଲା । ଏବେ ଏଥିରେ ମୁହାଣକୁ ବି ସାମିଲ କରାଯାଇଛି । ଗତ ୫ ଦଶନ୍ଧି ଭିତରେ ଅନେକ ନୂଆ ମୁହାଁଣ ସୃଷ୍ଟି ହୋଇଛି । ବିଭିନ୍ନ ସ୍ଥାନରେ ସମୁଦ୍ର କୂଳ ଲଘିଂ ଯେଉଁଭଳି ଭାବେ ଉପକୂଳକୁ ମାଡ଼ି ଆସୁଛି, ତେଣୁ ଉପକୂଳ ଲମ୍ବ ବି ବଢ଼ୁଛି । ଗଞ୍ଜାମ ଓ ଭିତରକନିକା ଅଞ୍ଚଳରେ ସମୁଦ୍ର ଉପକୂଳ ପୂର୍ବ ରେକର୍ଡଠାରୁ ଅଧିକ ବଢ଼ିଥିବା ଅନୁମାନ କରାଯାଉଛି ।
ଫକୀର ମୋହନ ବିଶ୍ୱବିଦ୍ୟାଳୟର ଭୂଗୋଳ ପ୍ରଫେସର ମନୋରଞ୍ଜନ ମିଶ୍ର କହିଛନ୍ତି, ପୂର୍ବ ହିସାବର ଆଧାର ଭିନ୍ନ ଥିଲା । ସେତେବେଳେ ମୁହାଣ ଆଦିକୁ ହିସାବକୁ ନିଆଯାଇନଥିଲା । ସମସ୍ତ ଦିଗକୁ ହିସାବ କରିବା ପରେ ନୂଆ ରିପୋର୍ଟ ଜାରି ହୋଇଛି ।
